“Disiembre 5–11. Haggeo; Zacarias 1–3; 7–14: ‘Kinasantuan ken Jehova,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Disiembre 5–11. Haggeo; Zacarias 1–3; 7–14,” Umaykayo, Sumurot Kaniak—Para kadagiti Indibidual ken Pamilia: 2022
Templo iti Laie Hawaii
Disiembre 5–11
Haggeo; Zacarias 1–3; 7–14
“Kinasantuan ken Jehova”
Ti panagbasa kadagiti nasantuan a kasuratan ket mangyawis iti paltiing. Agbalin a nabatad kadagiti mensahe nga ipalgak ti Espiritu Santo kenka bayat ti panangbasam iti Haggeo ken Zacarias.
Isuratmo dagiti Impresionmo
Kalpasan dagiti dekada ti pannakabalud, maysa a grupo dagiti Israelita, a nalabit a pakairamanan da propeta Haggeo ken Zacarias, ket napalugodan nga agsubli iti Jerusalem. Nalagip ti sumagmamano iti daytoy a grupo no ania ti langa ti Jerusalem sakbay a nadadael daytoy. Panunotem dagiti riknada bayat ti pannakakitada iti narumrumek a batbato a naminsan a pagtaenganda, dagiti lugarda a pagdaydayawan, ken ti temploda. Kadagiti nasdaaw no kapadanto manen ti templo “ti balay [ti Apo] idi immun-una a dayagna” (Haggeo 2:3), nagsarita ni propeta Haggeo kadagiti mangparparegta a balikas ti Apo: “Pumigsakayo, dakayo amin nga umili iti daga, kuna ni Jehova ket agtrabahokayo: ta addaak kadakayo, … dikayo koma agbuteng.” “Pusekekto daytoy a balay iti kinadayag, … ket iti daytoy a disso mangtedakto iti talna.” (Haggeo 2:4–5, 7,9.)
Ngem saan laeng a ti nasantuan a templo ti agkasapulan iti pannakabangon manen. Iti adu a wagas, adda dagiti tao ti Dios a nadadael iti kinaespirituan. Ket ti panangbangon manen iti nasantuan a tattao ad-adda pay ngem iti panagtikap iti batbato ken panangyurnos kadagitoy a mangbangon iti pader iti templo. Iti agdama, addaan dagiti templo iti inskripsion a “Nasantuan ken Jehova,” ken maaramat dagita a balikas saan laeng iti maysa a pasdek ngem iti maysa a wagas ti biag. Ti panangikitikit kadagitoy a balikas iti “barongbarong dagiti kabalio” ken “tumunggal banga idiay Jerusalem” (Zacarias 14:20–21) ket makatulong laeng no maikitikitda pay iti tunggal puso. Agkasapulan iti pudno a kinasantuan a dagiti balikas ken paglintegan ti Apo a “maikapet” (Zacarias 1:6) kadatayo, a mangpalpalugod iti bileg a mangbalbaliw kadagiti kinataotayo tapno agbalintayo a nasantuan a kas Kenkuana (kitaen iti Levitico 19:2).
Para iti pakagupgopan dagiti libro ti Haggeo ken Zacarias, kitaen iti “Haggeo” ken “Zacarias” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
“Ibilangyo dagiti daldalanyo.”
Adda dagiti napapateg a banag nga aramiden a mangbangon manen iti Jerusalem. Ngem kalpasan a napalabas dagiti 15 a tawen manipud pay idi nagsubli dagiti Israelita, saan a naragsakan ti Apo gapu ta saan a naikkan iti nangatngato a prayoridad ti panangbangon manen iti templo (kitaen iti Haggai 1:2–5; kitaen met iti Esdras 4:24). Bayat ti panangbasam iti Haggeo 1; 2:1–9, panunotem dagiti saludsod kas kadagitoy: Ania dagiti bunga a nakaipasanguan dagiti Israelita gapu ta saanda a nalpas ti templo? Ania dagiti bendision nga inkari ti Apo kadakuada no nalpasdan ti pannakabangon ti balayna? Mabalinmo nga usaren daytoy a gundaway nga “utobem dagiti daldalanmo”—a mangpanunot maipapan kadagiti prioridadmo ken no kasano a mayurnosmo dagitoy iti Apo.
Kitaen met iti Doktrina ken Katulagan 95; Terence M. Vinson, “True Disciples of the Savior,” Ensign wenno Liahona, Nob. 2019, 9–11.
Mapagbalinnak a nasantuan ti Apo.
Insuro ni Sister Carol F. McConkie: “Ti kinasantuan ti panagaramid kadagiti pili a mamagtalinaedto iti Espiritu Santo kas tarabaytayo. Ti kinasantuan ket panangipakni kadagiti gagangay nga ayotayo ken panagbalin a ‘maysa a santo babaen ti pannubbot ni Cristo nga Apo’ [Mosiah 3:19]. … Namnamatayo para iti kinasantuan ket naisentro ken ni Cristo, iti asina ken paraburna” “The Beauty of Holiness,” Ensign wenno Liahona, Mayo 2017, 9–10). Laglagipem dagitoy a pannursuro bayat ti panangbasam kadagiti balikas ti Apo, naited babaen ken ni propeta Zacarias, a mangguyguyugoy iti Israel nga agbalin a nasansantuan: Zacarias 1:1–6; 3:1–7; 7:8–10; 8:16 –17. Ilistam dagiti banag nga indawat ti Apo iti Israel nga aramiden tapno mapagbalinna ida a nasantuan. Kasano a tultulongannaka nga agbalin a nasansantuan?
Iladawan tiZacarias 2:10–11; 8:1–8; 14:9–11, 20–21 no ania ti kayarigan ti biag iti masanguanan nga aldaw no agindegtayo iti sidong ti Apo iti nasantuan a kasasaad. Ania koma ti mabalin a kaipapanan dagitoy a panangiladawan kadagiti mangbangbangon manen iti Jerusalem iti panawen ni Zacarias? Ania ti kayat a sawen dagitoy kenka?
“Adtoy, ti Arim umay kenka: isu nalinteg, ken addaan panangisalakan; napakumbaba, ket agsakay iti maysa nga asno” (Zacarias 9:9). Naballigian nga Iseserrek, ni Harry Anderson
Zacarias 9:9–11; 11:12–13; 12:10; 13:6–7; 14:1–9
Ni Jesucristo ti naipadto a Mesias.
Sumagmamano kadagiti sinurat ni Zacarias ti mangitudo iti naindagaan a panagministro ni Jesucristo ken ti agangay a Maikadua a Yaayna. Idilig dagiti sumaganad a padto manipud iti Zacarias kadagiti mainaig a binatog manipud iti dadduma pay a libro ti nasantuan a kasuratan:
-
Zacarias 9:9–11 (kitaen iti Mateo 21:1–11; 1 Pedro 3:18–19)
-
Zacarias 11:12–13 (kitaen iti Mateo 26:14–16; 27:1–7)
-
Zacarias 12:10 (kitaen iti Juan 19:37; Apocalipsis 1:7)
-
Zacarias 13:6–7; 14:1–9 (kitaen iti Mateo 26: 31; Doktrina ken Katulagan 45:47–53)
Ania ti masursurom maipapan iti Mangisalakan kabayatan ti panagadalmo kadagitoy a binatog? Apay a napateg kenka a maawatam dagitoy a binatog?
Kitaen met iti Pangiwanwan iti Nasantuan a Kasuratan, “Mesias” (scriptures.ChurchofJesusChrist.org).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Haggeo 1:2–7.Mabalin a maguyugoy dagitoy a bersikulo ti pamiliam tapno “utobenyo dagiti daldalanyo.” Nalabit a mabalin a yakem dagiti miembro ti pamilia dagiti ragup ti balikas iti bersikulo 6. Ania ti isuro daytoy a bersikulo maipapan iti panangipateg kadagiti banag iti lubong a nangnangruna ngem kadagiti banag ti Dios? Mabalinyo ti aggiinnuman maipapan kadagiti prayoridad ti pamiliam. Mabalin a makatulong iti pamiliam ti panangkansion iti maysa a kanta kas iti “I’m Trying to Be like Jesus” (Children’s Songbook, 78–79) tapno mangamiris no ania ti ar-aramidenyo a nasayaat ken kadagiti tay-ak a mabalinyo a pasayaaten.
-
Haggeo 2:1–9.Tapno mayam-ammo dagitoy a bersikulo, mabalinmo nga ibinglay ti estoria ti Provo City Center Temple, a nabaliwan a nabangon manipud iti maipatpateg a tabernakulo a napuoran (kitaen iti video “Provo City Center Temple Completed,” ChurchofJesusChrist.org). Bayat ti panangbasa ti pamiliam iti Haggeo 2:1–9, mabalinmo nga idawat kadagiti miembro ti pamilia a mangpanunot iti maysa a banag iti biagtayo a mabalin a kasla iti aramid ti panangbangon manen iti templo a nadadael. Kasano a bangonennatayo manen ti Apo kalpasan ti trahedia wenno rigat?
-
Zacarias 3:1–7.Bayat ti panangbasam kadagitoy a bersikulo, mabalinmo nga ipakita iti pamiliam ti sumagmamano a narugit a kawes. Kasano ti mabalin a narikna ni Josue idi nagtakder iti sango ti anghel a nakakawes iti narugit? Kasano a maipada ti basol iti narugit a kawes? Ania ti isuro ti Zacarias 3:1–7 kadatayo maipapan iti pammakawan? Kalpasanna mabalinyo a dalusan nga aggigidaan ti kawes ket pagsasaritaan ti pangdalus a bileg ti Pannubbot ti Mangisalakan.
-
Zacarias 8:1–8.Ania ti pakaawisantayo maipapan iti parmata ni Zacarias maipapan iti masakbayan ti Jerusalem? Ania ti masarakantayo sadiay a kayattayo a makita iti komunidadtayo? Kasano a maawistayo ti Mangisalakan nga “agtaeng iti nagbabaetan[tayo]”? (kitaen iti Gary E. Stevenson, “Sacred Homes, Sacred Temples,” Ensign wenno Liahona, Mayo 2009, 101–3).
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “I’m Trying to Be like Jesus,” Children’s Songbook, 78–79.
Panangpadur-as iti Bukod a Panagadal
Mangala kadagiti gundaway para iti panangamiris iti bagi. Bayat ti panagadalmo kadagiti nasantuan a kasuratan, masansan a maparegtakanto a mangutob iti bukodmo a panagkumit iti Nailangitan nga Ama ken ni Jesucristo. Agtignayka kadagiti impresion a maawatmo.