Nobiembre 7–13.

Oseas 1–6; 10–14; Joel

“Ayatekto Ida a Nawadwad,”

Bayat ti panagadalmo kadagiti nasantuan a kasuratan ken agsagana a mangisuro, agkiddawka iti pammaregta manipud iti Espiritu Santo. Ania ti mariknam a pakaguyugoyam nga ipamaysa kabayatan ti klase daytoy a lawas?

Isuratmo dagiti Impresionmo

Yawis ti Panagbibinninglay

Ipakitam ti maysa a ladawan ti Mangisalakan, ken awisem dagiti ubbing a mangibinglay iti maysa a banag nga ammoda maipapan Kenkuana daytoy a lawas. Pagsisinnublatem ida iti panangiggem iti ladawan bayat ti panangibinglayda.

Isuro ti Doktrina: In-inaudi nga Ubbing

Oseas 10:12

Mabalinko a sapulen ti Apo.

Usaren tiOseas 10:12 dagiti ladawan ti panagmula, panagani, oras, ken tudo a mangawis kadatayo a mangsapul iti Apo. Bayat ti panangbasam iti daytoy a bersikulo, ania dagiti managpartuat nga ideya a mapanunotmo a mabalin a mangparegta kadagiti ubbing a mangsapul Kenkuana?

Dagiti Mabalin nga Aktibidad

• Ibasam ti Oseas 10:12 kadagiti ubbing, ken awisem ida nga agaramid kadagiti simple a tignay a makatulong kadakuada a makaawat iti bersikulo, kas koma iti panagpammarang nga agmula iti bukbukel, agpuros iti natnateng manipud iti maysa a mula, wenno agtakder iti katuduan. Wenno ipakitam dagiti ladawan ti bukbukel, mulmula, ken tudo. Tulongam dagiti ubbing a mangidilig ti panagmula iti bukel ken panagani iti nasayaat a taraon iti panagbiag a sililinteg ken panangawat kadagiti bendision ti Apo. Paneknekam maipapan dagiti bendision ti Apo a naibukbok kenka bayat ti panagikarigatam a mangsapul Kenkuana.

• Mangidrowing iti pagorasan iti pisarra, ket kiddawen kadagiti ubbing a mangibinglay kadagiti wagas a mabalin a sapulentayo ti Apo iti sabali nga oras ti aldaw. Awisem dagiti ubbing a mangulit a kaduadaka ti ragup ti balikas a “Panawen ti panangsapulyo ken ni Jehova” (Oseas 10:12). Tulongam ida a makaawat a daytoy ti kanayon a gundaway a mangsapul iti Apo. Ibinglaymo no ania ti aramidem a manglaglagip Kenkuana iti amin a panawen.

Ni Jesucristo ti Mangisalakan ken Mannubbottayo.

Oseas 13:4,14

Ni Jesucristo ti Mangisalakanko.

Bayat ti panangisurom maipapan iti Mangisalakan ken ti Pannubbotna, a mangiburay iti pammaneknek iti ayatna para iti tunggal maysa kadagiti ubbing.

Dagiti Mabalin nga Aktibidad

• Ipakitam dagiti ladawan ti sumagmamano a tao, agraman ken ni Jesus, ket kiddawem kadagiti ubbing a mangsapul no asino kadagitoy a tao ti Mangisalakantayo. Basaem ti Oseas 13:4, ket yunay-unay nga awan ti Mangisalakan malaksid ken ni Jesucristo. Paneknekam a gapu iti Pannubbot ni Jesucristo, makasublitayo a makipagnaed manen iti Nailangitan nga Ama.

• Pagsisinnublatem dagiti ubbing nga agiggem iti ladawan ni Jesus iti krus wenno iti tanem ken maysa a ladawan ni Jesus iti ruar ti awan nagyanna a tanem. Awisem dagiti ubbing a mangisarita maipapan iti no ania ti ipakita dagiti ladawan. Basaem manipud iti Oseas 13:14 ti ragup ti balikas “Subbotekto ida iti pannakabalin ni tanem; subbotekto ida ken patay.” Paneknekam nga insalakannatayo ni Jesucristo manipud iti ipapatay ken mabalintayo ti agungar. Aggigiddan nga agkansion iti maysa a kanta maipapan iti Panagungar, a kas iti “Did Jesus Really Live Again” (Children’s Songbook,64). Tulongam dagiti ubbing a mangbigbig iti Espiritu kabayatan ti panagkantada.

Joel 2:28

Matarabaynak ti Espiritu Santo.

Bayat ti panangisurom maipapan ti padto ni Joel iti Joel 2:28, ibilangmo no kasano a matulongam dagiti ubbing nga agsagana nga umawat iti sagut ti Espiritu Santo kalpasan a mabuniaganda.

Dagiti Mabalin nga Aktibidad

• Ibasam ti Joel 2:28 kadagiti ubbing, ket ilawlawag a ti kaipapanan ti balikas nga “amin a lasag” ket tunggal maysa, agraman dagiti “annak a lallaki” ken “annak a babbai” kas kadakuada. Awisem dagiti ubbing a mangidrowing kadagiti ladawan dagiti tao a naitudo iti daytoy a bersikulo (annak a lallaki ken annak a babbai, nataengan ken agtutubo a lallaki, nataengan ken agtutubo a babbai), agraman ti bagbagida. Ilawlawag a ti maysa a wagas a pangibukbokan ti Nailangitan nga Ama iti Espirituna ket babaen ti pannangtedna kadatayo iti sagut ti Espiritu Santo no mabuniagantayo.

• Awisem dagiti ubbing a mangibinglay no ania ti ammoda maipapan iti Espiritu Santo. Tulongam ida a makaawat a masuruannatayo ti Espiritu Santo maipapan iti Nailangitan nga Ama ken ni Jesucristo ken makatulong kadatayo a mangammo no ania ti pudno (kitaen iti Juan 14:26; Doktrina ken Katulagan 42:17). Ibinglay dagiti padas a makatulong kadagiti ubbing a makaawat kadagiti wagas a pakatulongan kadatayo ti Espiritu.

Isuro ti Doktrina: In-inauna nga Ubbing

Oseas 2:19–20

Makapagtungpalak a sipupudno kadagiti katulagak.

Iti libro ti Oseas, indilig ti Apo ti katulaganna kadagiti Israelita iti maysa a kallaysa. Iti baet ti kinasukir dagiti Israelita, inayatna pay laeng ida ken kayatna ida nga agsubli. Daytoy a panangidasig ti makatulong kenka a mangisuro kadagiti ubbing maipapan iti kinapateg ti panagtungpal kadagiti katulagantayo iti Apo.

Dagiti Mabalin nga Aktibidad

• Isaritam kadagiti ubbing nga iti libro ti Oseas, indilig ti Apo dagiti katulaganna iti Israel iti maysa a kallaysa. Ipakitam kadagiti ubbing ti ladawan ti maysa a nobia ken nobio. Kasano ti kayat ti Nailangitan nga Ama a panangtrato dagiti agassawa iti tunggal maysa? Kasano a maipakitatayo a patpatgentayo ti Apo ken agbalintayonto a napudno Kenkuana?

• Tulongam dagiti ubbing a makaawat a ti katulagan nga inaramidtayo iti Apo ket nairanta nga agpaut iti agnanayon. Awisem ti maysa kadagiti ubbing a mangbasa iti Oseas 2:19–20, a mangsapsapul kadagiti balikas a mangiladawan no kasano ti rikna ti Apo maipapan kadagiti katulagan kadatayo. Ania ti pakitulagantayo nga aramiden no mabuniagantayo? Kasano a mapagtalinaedtayo daytoy a katulagan nga inaramidtayo iti Apo?

Oseas 13:4,14

Ni Jesucristo ti Mangisalakan ken Mannubbotko.

Kasano a mausarmo dagiti balikas ni Oseas a mangpapigsa kadagiti pammaneknek dagiti ubbing maipapan iti Mangisalakan ken Mannubbotda? Bayat ti panangisurom, tulongam dagiti ubbing a makarikna iti rag-o ken ayat ti Pannubbot ni Jesucristo.

Dagiti Mabalin nga Aktibidad

• Awisem dagiti ubbing a mangbasa iti Oseas 13:4,14, nga agsapsapul kadagiti balikas wenno ragup ti balikas a mangiladawan ken ni Jesucristo. Ania ti isuro kadatayo dagitoy a balikas maipapan Kenkuana? Awisem dagiti ubbing a mangusar iti Topical Guide wenno Pangiwanwan iti Nasantuan a Kasuratan a mangsarak ken mangibinglay iti dadduma pay a nasantuan a kasuratan a mangisuro maipapan ken ni Jesucristo kas Mangisalakan ken Mannubbottayo. Ibinglaymo ti pammaneknekmo maipapan iti Mangisalakan, ken ikkam dagiti ubbing iti gundaway nga aramidenda met ti kastoy.

• Tapno matulongan dagiti ubbing a makaawat no kasano nga alawen wenno subbotennatayo ti Mangisalakan manipud iti patay, ipabuya ti video “Handel’s Messiah: Debtor’s Prison” (ChurchofJesusChrist.org). Ania ti masursurotayo manipud iti daytoy a video a makatulong kadatayo a makaawat no ania ti inaramid ti Mangisalakan para kadatayo?

Joel 2:28–29

Matarabaynak ti Espiritu Santo.

Adu kadagiti ubbing a sursuruam a nalabit a nabuniagan ken immawatdan iti sagut ti Espiritu Santo. Kasano a mausarmo dagitoy a nasantuan a kasuratan a makatulong kadakuada a makaawat iti bileg ken dagiti bendision a sumangbay manipud iti pannakangngegda iti timek ti Espiritu?

Dagiti Mabalin nga Aktibidad

• Awisem dagiti ubbing nga aggigiddan a mangbasa iti Joel 2:28–29, a mangisingsingit iti nagan ti tunggal maysa a kasukat dagiti ragup ti balikas nga “annakmo a lallaki” ken “annakmo a babbai.” Isurat iti pisarra ti maysa a binatog kas Ti Espiritu Santo mabalin… ket awisem dagiti ubbing nga agsisinnublatda iti panangileppas iti binatog. Allukoyem ida a mangiraman kadagiti banag a masursuroda manipud iti Juan 14:16; Moroni 10:5; Doktrina ken Katulagan 42:17, ken dadduma pay a nasantuan a kasuratan.

• Ikabil ti maysa a banag iti maysa a malukong, ken pagsisinnublaten dagiti ubbing a mangibukbok iti danum iti daytoy. Ilawlawag a ti banag ti mangibagi kadatayo, ken ti danum ti mangibagi iti Espiritu Santo. No mabuniagantayo, awatentayo ti sagut ti Espiritu Santo, a daytoy ti maysa a wagas nga ipatungpal ti Apo ti karina nga “ibukbokna ti espiritu[na].” Ania ti nasken nga aramidentayo tapno umawat iti Espiritu Santo? Awisem dagiti ubbing a mangibinglay kadagiti panawen idi nariknada ti impluensia ti Espiritu.

Yallukoy ti Panagsursuro iti Pagtaengan

Tulongam dagiti ubbing a mangilasin iti maysa a banag a nasursuroda maipapan iti Nailangitan nga Ama, ni Jesucristo, wenno ti Espiritu Santo ita nga aldaw iti klase. Allukoyem ida a mangibinglay iti daytoy kadagiti pamiliada.

Panangpadur-as iti Panangisurotayo

Agkalikagum a maaddaan iti paltiing iti inaldaw. Bayat ti panagsaganam a mangisuro, agkararagka ken utobem dagiti nasantuan a kasuratan iti uneg ti makalawas. Dagiti kapanunotan ken impresion maipapan iti no kasano ti mangisuro ket umay kenka iti ania man nga oras ken sadino man a lugar. (Kitaen iti Panangisuro iti Wagas ti Mangisalakan, 12.)