Ni Jonas iti Sang-at ti Baybay iti Nineve, ni Daniel A. Lewis

Nobiembre 21–27

Jonas; Mikias

“Pagay-ayatanna iti Kinamanagayat”

Bayat ti panangisuratmo kadagiti impresionmo, panunotem no kasano a mainaig kadagiti pagbatayan iti Jonas ken Mikias iti no ania ti masursurom kadagiti nasantuan a kasuratan.

Isuratmo dagiti Impresionmo

Adda ni Jonas iti bapor nga agturong iti Tarsis. Awan biddut iti panaglayag nga agturong iti Tarsis, malaksid nga adayo daytoy manipud iti Nineve, a nasken a papanan koma ni Jonas tapno mangyeg iti mensahe ti Dios. Isu nga idi naipasango ti bapor iti napigsa a bagyo, ammo ni Jonas a gapu daytoy ti kinasukirna. Gapu iti pammilit ni Jonas, intappuak dagiti padana a marino iti kaadalman a paset ti baybay tapno mangpasardeng iti bagyo. Kasla daytoy ti gibus ni Jonas ken ti panagministrona. Ngem saan nga insuko ti Apo ni Jonas—kas met laeng iti saanna a panangisuko kadagiti tao ti Nineve ken iti saanna a panangisuko iti asino man kadatayo. Kas iti insuro ni Mikias, saan a maragsakan ti Apo iti panangkednganda kadatayo, ngem “pagay-ayatanna iti kinamanagayat.” No umasidegtayo Kenkuana, “kaasiannatayto manen; baddekennanto dagiti kinadakestayo; ken ipuruak[nanto] amin dagiti basbasol[tayo] kadagiti kaadalman ti baybay” (Mikias 7:18–19).

Para iti pakagupgopan dagiti libro ti Esdras ken Nehemias, kitaen iti “Jonas” ken “Mikias” iti Pangiwanwan iti Nasantuan a Kasuratan.

Dagiti Kapanunotan para iti Bukod a Panagadal iti Nasantuan a Kasuratan

Jonas 1–4; Mikias 7:18–19

Manangngaasi ti Apo iti amin nga umasideg Kenkuana.

Ipakita ti libro ni Jonas, kadagiti dadduma pay a banag, no kasano ti kinamanangngaasi ti Apo no agbabawitayo. Bayat ti panangbasam iti Jonas, sapulem dagiti pagarigan ti kaasina. Utobem no kasano a napadasam dayta a panangngaasi iti biagmo. Ania ti masursurom a makatulong kenka nga agbalin a naas-asi kadagiti dadduma?

Masansan a ti panagsaksi iti kaasi ti Apo ket mangparegta iti rikna ti ayat ken panagyaman. Nupay kasta, ni Jonas “naapas unay” ken “nagunget” (Jonas 4:1) idi nangipaay ti Apo iti asi kadagiti tao ti Nineve, a kabusor ti Israel. Apay a mabalin a nakarikna ni Jonas iti kastoy? Naaddaanka kadin iti kasta met la a padas? Ania ti mariknam ti padpadasen ti Apo a mangtulong ken ni Jonas a makaawat iti kapitulo 4?

Utobem dagiti pannursuro iti Mikias 7:18–19. Kasano a nakatulong dagitoy a kinapudno ken ni Jonas a mangbalbaliw iti galadna maipapan iti Apo ken dagiti tao ti Nineve?

Kitaen met iti Lucas 15:11–32; Jeffrey R. Holland, “The Justice and Mercy of God,” Ensign, Sept. 2013, 16–21.

Maibinglaytayo ti ebanghelio kadagiti annak ti Dios.

Jonas 1; 3–4

Nasken a dumngeg iti ebanghelio ti amin nga annak ti Dios.

Ti Nineve ti paset ti imperio ti Asiria, a kabusor ti Israel a maam-ammo iti kinaranggas ken kinadawelna. Ken ni Jonas, nalabit a kasla saan a napaypayso a nakasagana dagiti tao ti Nineve nga umawat iti balikas ti Dios ken agbabawi. Ngem, kas iti insuro ni Presidente Dallin H. Oaks: “Nasken a ditayo kaano man aramiden ti bagbagitayo kas ukom a ti tao ket nakasagana ken saan a nakasagana. Ammo ti Apo ti puspuso dagiti amin nga annakna, ket no agkararagtayo para iti pammaregta, tulongannatayonto a mangsapul kadagiti tao nga ammona nga ‘agsagsagana a dumngeg iti balikas’ (Alma 32:6)” “Sharing the Restored Gospel,” Ensign wenno Liahona, Nob. 2016, 58–59). Ania ti nasursurom manipud iti Jonas 3 a mangparegta kenka a mangibinglay iti ebanghelio uray dagitay mabalin a kasla saan a nakasagana nga agbalbaliw?

Mabalin a makatulong nga idilig ti galad ni Jonas (kitaen iti Jonas 1; 3–4) iti rikna ni Alma ken dagiti lallaki nga annak ni Mosiah (kitaen iti Mosiah 28:1–5; Alma 17:23–25).

Kitaen met iti 3 Nephi 18:32.

Mikias 4:11–13; 5:8–15; 7:5–7

Inadaw ni Jesucristo dagiti sinurat ni Mikias.

Ammo unay daytoy nga inadaw ti Mangisalakan ti Isaias, ken dagiti Salmo. Ammoyo kadi nga inadawna pay ti Mikias iti sumagmamano a gundaway? Ibilangmo dagiti sumaganad a pagarigan, ket utobem no apay a mabalin a napateg iti Mangisalakan dagitoy a binatog. Apay a napateg dagitoy kenka?

Mikias 4:11–13 (kitaen met iti 3 Nephi 20:18–20). Indasig ti Apo ti panaguummong iti ud-udina nga aldaw iti apit a trigo (kitaen met iti Alma 26:5–7; Doktrina ken Katulagan 11:3–4). Ania ti isingasing kenka daytoy a panagidasig maipapan iti panaguummong ti Israel?

Mikias 5:8–15 (kitaen iti 3 Nephi 21:12–21). Ania ti isingasing dagitoy a bersikulo kenka maipapan kadagiti tao ti Dios (“ti natda ni Jacob”) kadagiti maudi nga aldaw?

Mikias 7:5–7 (kitaen iti Mateo 10:35–36). Segun kadagitoy a bersikulo, apay a napateg ti “kumita ken ni Jehova” nga umuna? Apay a napateg daytoy a balakad iti agdama?

Mikias 6:1–8

“Ania aya ti iparebbeng ni Jehova kenka?”

Awisennatayo ni Mikias a mangpanunot no ania ti mabalin a kayarigan iti “saklang ni Jehova, ket agruknoyak … iti saklang ti nangato a Dios” (Mikias 6:6). Ania ti isingasing kenka dagiti bersikulo 6–8 maipapan iti no ania ti napateg iti Apo bayat ti panangamirisna iti biagmo?

Kitaen met iti Mateo 7:21–23; 25:31–40; Dale G. Renlund, “Do Justly, Love Mercy, and Walk Humbly with God,” Ensign wenno Liahona, Nob. 2020, 109–12.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Jonas 1–4.Mabalin a magustuan dagiti annakmo ti agaramid kadagiti tignay a mangisarita iti estoria ni Jonas, kas koma iti panagpammarang nga agtaray, panagaramid kadagiti uni kas iti nabagyo a baybay, wenno panagpammarang nga inalun-on ti maysa a dakkel nga ikan (kitaen iti “Ni Jonas a Propeta” iti Dagiti Estoria iti Daan a Tulag). Saludsodem kadagiti miembro ti pamilia no ania ti masursuroda manipud iti padas ni Jonas. Para iti maysa a pagarigan ti maysa nga adalen manipud iti Jonas, kitaen iti bersikulo 7 ti “Follow the Prophet” (Children’s Songbook, 110–11).

Jonas 3.Ania ti nasursuro ni Jonas maipapan iti panangibinglay iti ebanghelio? Asino ti ammotayo a mabendisionanto iti panagdengngeg iti mensahe ti naisubli nga ebanghelio ni Jesucristo?

Mikias 4:1–5.Segun kadagitoy a bersikulo, anianto ti mangisangbay iti talna ken panagrang-ay kadagiti tao ti Apo? Ania ti maaramidtayo a mangtulong a mangipatungpal iti daytoy a padto iti pagtaengantayo?

Mikias 5:2.Mabalinmo nga ipakita ti ladawan ni Jesus idi ubing pay a kaduana ti inana (kitaen iti Libro ti Arte ti Ebanghelio, num.33) iti maysa a bangir ti siled ken maysa a ladawan dagiti Masirib a Lallaki iti sabali a bangir. Aggigiddan a mangbasa iti Mikias 5:2 ken Mateo 2:1–6. Kasano a nakatulong ti padto ni Mikias kadagiti Masirib a Lallaki a nangsarak ken ni Jesus? Mabalin dagiti miembro ti pamilia a mangyalis iti ladawan dagiti Masirib a Lallaki iti abay ti ladawan ni Jesus. Kasta met a mabalin a magustuan ti pamiliam ti panagbuya iti video “The Christ Child: A Nativity Story” (ChurchofJesusChrist.org).

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Naisingasing a kanta: “I’ll Go Where You Want Me to Go,” Hymns, no. 270.

Panangpadur-as iti Bukod a Panagadal

Sapulen ti ayat ti Dios. Bayat ti panagbasam kadagiti nasantuan a kasuratan, ibilangmo ti panangisurat kadagiti pakakitaan iti ayat ti Dios a napateg kenka. Kas pagarigan, sapulem no kasano a nangipakita ti Dios iti ayatna para kadagiti annakna iti estoria ni Jonas.

Panangiladawan ni Kevin Carden