“Nobiembre 7–13. Oseas 1–6; 10–14; Joel: “Ayatekto Ida a Nawadwad,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Nobiembre 7–13. Oseas 1–6; 10–14; Joel,” Umaykayo, Sumurot Kaniak—Para kadagiti Indibidual ken Pamilia: 2022
Nobiembre 7–13.
Oseas 1–6; 10–14; Joel
“Ayatekto Ida a Nawadwad”
Awisem iti Espiritu nga agbalin a paset ti panagadalmo iti Oseas ken Joel. Ilistam dagiti mensahe a yawis ti Espiritu iti pusom ken panunotmo.
Isuratmo dagiti Impresionmo
Nairanta a nauneg ken napnuan kaipapanan ti katulagan ti Israel iti Apo gapu ta indasig ti Apo daytoy iti maysa a kallaysa. Mairaman iti katulagan, kas maysa a kallaysa, ti agnanayon a panagkumit, naibinglay a padas, agkadua a mangbangbangon iti biag, naipangpangruna a loyalidad, ken kangrunaan iti amin, napudnuan nga ayat. Immay daytoy a kita ti kinapasnek nga addaan kadagiti nangato a namnamaen—ken dagiti napeggad a bunga ti kinamangliliput. Babaen ken ni propeta Oseas, inladawan ti Dios ti sumagmamano kadagiti bunga a nakaipasanguan dagiti Israelita gapu iti pananglabsingna iti katulaganda. Ket ti mensahena saan a kastoy “Dikayonto awaten iti agnanayon gapu iti panagbalinyo a saan a napudno.” Ngem ketdi kastoy “Awisenkayo nga agsubli” (kitaen iti Oseas 2:14–15). “Makiasawaakto kenka iti kinalinteg,” impakdaar ti Apo (Oseas 2:19). “Agasakto ti pananglikudda, ayatekto ida a nawadwad” (Oseas 14:4). Daytoy ti isu met laeng a mensahe nga it-itedna kadatayo iti agdama bayat ti panagkalikagumtayo a tungpalen dagiti katulagantayo nga addaan iti ayat ken kinapasnek.
Imbinglay ni Joel ti isu met la a mensahe: “Agsublikay ken Jehova a Diosyo: ta isu managparabur ken manangngaasi, natanang nga agunget ket aglablabes iti kinamanangngaasi” (Joel 2:13). “Ni Jehova isu ti pagkamanganto dagiti taona, ken ti sarikedked kadagiti annak ti Israel” (Joel 3:16). Bayat ti panangbasam iti Oseas ken Joel, utobem ti bukodmo a relasion iti Apo. Panunotem no kasano a paregtaennaka ti kinapudnona tapno agbalinka a napudno Kenkuana.
Para iti pakagupgopan ti libro ti Oseas ken Joel, kitaen iti “Oseas,“ ken “Joel” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Kanayon nga awisennak ti Apo nga agsubli Kenkuana.
Ti asawa ni Oseas, ni Gomer, saan a napudno kenkuana, ket intudo ti Dios daytoy naliday a pasamak a mangisuro kadagiti Israelita no kasano ti panagriknana maipapan kadakuada ken dagiti katulaganda Kenkuana. Bayat ti panangbasam iti Oseas 1–3, utobem no kasano ti pannirigan ti Apo iti relasionna kadagiti natulagan a tattaona. Mabalin nga utobem dagiti wagas a pakapagbalinam a saan a napudno, kas kadagiti Israelita, iti Apo ken no kasano a tinulongannaka. Kas pagarigan, ania ti isuro kenka ti Oseas 2:14–23 ken Oseas 14 maipapan iti ayat ken asi ti Apo? Kasano nga ipakitam Kenkuana ti ayatmo ken kinapudnom?
Kitaen met iti Dieter F. Uchtdorf, “Point of Safe Return,” Liahona, Mayo 2007, 99–101.
Ti managbasol a ni Gomer, a mangibagi iti Israel, naidiayaan iti pannubbot ti Apo. Panangiladawan ni Deb Minnard, lisensiado manipud iti goodsalt.com
Nasken a marikna iti uneg ti kinapasnek iti Dios saan laeng a mayebkas iti ruar.
Binilin ti Apo dagiti taona a mangidaton kadagiti sakripisio iti ayup. Ngem uray pay tungtungpalen dagiti tao iti aldaw ni Oseas dayta a linteg, lablabsingenda dagiti bilin a dakdakkel ti pategna (kitaen iti Oseas 6:4–7). Ania iti panagkunam ti kayat a sawen ti Apo a “tinarigagayan[na] ti kinaimbag a saan ket a daton; ken ti panangbigbig iti Dios naim-imbag pay ngem dagiti daton a mapuoran”? (Oseas 6:6). Ania iti panagkunam ti kayat a sawen ti kinalinteg a mayarig iti ulep wenno kas linnaaw? Ania ti nasken a pakayarigan ti kinalintegtayo? (kitaen iti Isaias 48:18; 1 Nephi 2:9–10).
Mabalinmo pay a basaen ti Mateo 9:10–13; 12:1–8 tapno kitaen no kasano nga inusar ti Mangisalakan ti Oseas 6:6 kabayatan ti panagministrona. Kasano a makatulong kenka dagitoy a binatog a makaawat kadagiti sao ni Oseas?
No agbasbasaka iti Joel 2:12–13, mabalin a makatulong a mangammo a ti naikannawidan a panagray-ab wenno panangpigis ti maysa a kawes ket maysa nga akinruar a pagilasinan ti panagladingit wenno sakit ti nakem (kas pagarigan, kitaen iti 2 Cronicas 34:14–21,27). Kasano a maigiddiat ti panangpigis ti puspusotayo iti panagpigis kadagiti pagan-anaytayo?
Kitaen met iti Isaias 1:11–17; Mateo 23:23; 1 Juan 3:17–18.
“Ibukbokkonto ti espirituk iti amin a lasag.”
Idi impadto ni Joel “ti aldaw ni Jehova,” inladawanna daytoy a kas “aldaw a nasipnget ken nakudrep,” “dakkel ken nakaal-allingek” (Joel 2:1–2,11). Naipasango ti Israel iti adu a dadakkel ken nakaal-allingek nga aldaw iti unos ti pakasaritaan, ket maipasangonto dagiti natulagan a tattao ti Dios iti ad-adu pay iti masakbayan. Ania ti makaawis kenka maipapan iti balakad nga inted ti Apo iti Joel 2:12–17? Kitaen met dagiti bendision nga inkarina iti Joel 2:18–32. Apay a naipangpangruna a napateg dagiti bendision a naikari kadagiti bersikulo 27–32 kadagiti aldaw a kas kadagiti nailadawan iti Joel 2, agraman iti aldawtayo?
Ania iti panagkunam ti kayatna a sawen a ti Apo “ibukbokna ti espiritu[na] iti amin a lasag”? (Joel 2:28). Kasano a maipatpatungpalen dagiti padto iti Joel 2:28–29 ? (Kitaen iti Dagiti Aramid 2:1–21; Joseph Smith—Pakasaritaan 1:41.)
Mabalin nga utobem dagitoy a balikas manipud ken ni Presidente Russell M. Nelson: Kadagiti umay nga aldaw, saanto a mabalin a makapagbiag a naespirituan no awan ti panangtarabay, panangiturong, panangliwliwa, ken kanayon nga impluensia ti Espiritu Santo” (“Revelation for the Church, Revelation for Our Lives,” Liahona, Mayo 2018,96). Apay a napateg ti paltiing iti naespirituan a panagtultuloy ti panagbiag? Kasano a mapadakkelmo ti kabaelam nga umawat iti bukod a paltiing?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Oseas 2:19–20.Inusar ti Apo ti metapora iti kallaysa a pangiladawan iti natulagan a pakainaiganna iti Israel (kitaen met iti Pangiwanwan iti Nasantuan a Kasuratan, “Nobio,” scriptures.ChurchofJesusChrist.org). Mabalin a paglilinnawagan ti pamiliam no apay a mabalin ti kallaysa a nasayaat a metapora para kadagiti katulagantayo iti Dios. Kasano a makatulong kadatayo ti Oseas 2:19–20 a makaawat no kasano ti marikna ti Dios maipapan kadatayo? Kasano a makapagbalintayo a napudno kadagiti katulagantayo a sumurot Kenkuana?
-
Oseas 10:12.Magustuan dagiti ubbing ti panangidrowing iti pagorasan ket panangplano kadagiti wagas a mabalin a pangsapulanda iti Apo iti nadumaduma a gundaway iti agmalem.
-
Joel 2:12–13.Tapno matulongan ti pamiliam nga agsarita maipapan iti Joel 2:12–13, mabalinmo ti mangikabil iti maysa a ladawan ti Mangisalakan iti maysa a bangir ti maysa a siled ken ti balikas a basol iti agsumbangir a suli. Awisem dagiti miembro ti pamilia nga agsisinnublat iti panangsango iti tanda ket kalpasanna panagpusipos a mapan iti Mangisalakan bayat ti panangibinglayda kadagiti banag a makatulong kadatayo nga umasideg Kenkuana “iti amin a puso[tayo].” Allukoyem dagiti miembro ti pamilia a mangpanunot maipapan iti amin nga aspeto ti biagda, agraman dagiti aktibidad, aramid, pagadalan, ken pannakilangen.
-
Joel 2:28–29.Ania ti mabalin a kayat a sawen ti Espiritu a “maibukbok” kadatayo? Nalabit a mabalinmo nga ipakita daytoy babaen ti panangibukbok iti danum ket kalpasanna panangidilig iti daytoy iti maysa a tedted wenno patak.
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “Come unto Jesus,” Hymns, no.117.
Panangpadur-as iti Panangisurotayo
Isuro ti doktrina. “Saanmo koma libtawan iti kaano man ti gundaway a mangummong kadagiti ubbing tapno agsursuro maipapan iti doktrina ni Jesucristo. Manmano laeng dagiti kasta a kanito no maidasig kadagiti panagkagumaan ti kabusor” (Henry B. Eyring, “The Power of Teaching Doctrine,” Ensign, Mayo 1999,74).
Umaykayo Kaniak, ni Kelly Pugh