“Oktubre 31–Nobiembre 6. Daniel 1–6: ‘Awan ti Sabali a Dios a Makabalin a Mangispal,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Oktubre 31–Nobiembre 6. Daniel 1–6,” Umaykayo, Sumurot Kaniak—Para kadagiti Indibidual ken Pamilia: 2022
Ibuksilan ni Daniel ti Tagtagainep ni Nabucodonosor, ni Grant Romney Clawson
Oktubre 31–Nobiembre 6
Daniel 1–6
“Awan ti Sabali a Dios a Makabalin a Mangispal”
Inlawlawag ni Elder Richard G. Scott a ti panangisurat iti pammaregta “mangiipakita iti Dios a sagrado kadatayo dagiti pannakisaritana. Ti panangisurat ti mangpadur-asto pay iti kabaelantayo a manglagip iti paltiing” (“How to Obtain Revelation and Inspiration for Your Personal Life,” Ensign wenno Liahona, Mayo 2012,46).
Isuratmo dagiti Impresionmo
Mabalin nga awanto ti agamak a mangitappuak kadakayo iti umap-apuy nga urno wenno iti rukib dagiti leon gapu iti pammatim ken ni Jesucristo. Ngem awan kadatayo ti makalasat iti daytoy a biag nga awan ti pannakausig ti pammati. Mabalin a pagimbagantayo amin manipud iti pagwadan dagiti tao a kas kada Daniel, Sidrac, Misac ken Abdenago, nga innala a balud kas agtutubo a lallaki ti maingel nga Imperio ti Babilonia (kitaen iti 2 Ar-ari 24:10–16). Dagitoy nga agtutubo naalikubkobdan ti saan a pamiliar a kultura iti nadumaduma nga ik-ikkan pateg, ket naipasango kadakuada dagiti naindaklan a pannulisog a mangliklik iti pammati ken nalinteg a kannawidan. Ngem nagtalinaedda a pudno kadagiti katulaganda. Kas ken ni Jose iti Egipto ken ni Ester iti Persia, tinungpal ni Daniel ken dagiti gagayyemna iti Babilonia ti pammatida iti Dios, ken nagaramid ti Dios kadagiti milagro a mangparegta pay laeng kadagiti mamati iti daytoy nga aldaw.
Kasano a nasarakanda ti pigsa nga agtalinaed a napudno unay? Saanda nga inaramid dagiti babassit ken gagangay a banag nga indawat ti Dios nga aramidentayo amin—panagkararag, panagayuno, panangpili kadagiti nasayaat a gagayyem, panagtalek iti Dios, ken panagbalin a silaw kadagiti dadduma. No mapapigsatayo babaen ti panangaramid kadagitoy isu met la a babassit ken gagangay a banag, mabalintayo a sanguen dagiti leon ken dagiti umap-apuy nga urno iti bukodtayo a biag nga addaan iti pammati.
Para iti pakagupgopan ti libro ti Daniel, kitaen iti “Daniel, libro ni” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Makapagtalekak iti Apo no mapadas ti pammatik.
Iti kaipapananna, agbibiagtayo amin iti Babilonia. Napno ti lubong iti aglawlawtayo iti adu a pannulisog a mangikompromiso kadagiti pagrukodantayo ken agduaduatayo iti pammatitayo ken ni Jesucristo. Bayat ti panangbasam iti Daniel 1, 3, ken 6, ilistam dagiti wagas a nakapilitan da Daniel, Sidrac, Misac ken Abdenago tapno mangaramid kadagiti banag nga ammoda a biddut. Nariknam kadin ti pammilit a mangikompromiso kadagiti pammatim? Ania ti nasursurom manipud kadagitoy a lallaki a makatulong kenka nga agtalek iti Apo no maipasangoka iti oposision?
Naisurat iti libro ni Daniel ken adu a dadduma pay a nasantuan a kasuratan dagiti padpadas a ti nabileg a pammati ket nangiturong iti adu a milagro. Ngem ania no ti pammatitayo ket saan a mangiturong kadagiti milagro a kalkalikagumantayo a gun-oden? (kitaen, kas pagarigan, iti Alma 14:8–13). Maibatay iti no ania ti nabasam iti Daniel 3:13–18, kasano iti panagkunam no sinungbatan koma da Sidrac, Misac, ken Abdenago daytoy a saludsod? Kasano a makaapekto ti pagwadanda iti no kasano a sanguem dagiti pannubokmo iti pammati? Para iti ad-adu pay maipapan kadagitoy a bersikulo, kitaen iti mensahe ni Elder Dennis E. Simmons “But If Not…” (Ensign wenno Liahona, Mayo 2004, 73–75).
Ipakita pay ti libro ni Daniel no kasano a makaiturong iti dadduma dagiti nalinteg a pili ti maysa a tao iti dakdakkel a pammati iti Apo. Ania dagiti pagarigan daytoy a masarakam kadagiti kapitulo 1, 3, ken6? Utobem dagiti epekto dagiti pilim a mabalin nga adda kadagiti dadduma (kitaen iti Mateo 5:16).
Kitaen met iti Dieter F. Uchtdorf, “Be Not Afraid, Only Believe,” Ensign wenno Liahona, Nob. 2015, 76–79; David R. Stone, “Zion in the Midst of Babylon,” Ensign wenno Liahona, Mayo 2006, 90–93.
Panangiladawan ni Daniel ken dagiti gagayyemna nga agkedkedked iti taraon ti ari, ni Brian Call
Ti Simbaan ni Jesucristo dagiti Santo iti Ud-udina nga Aldaw ti pagarian ti Dios iti daga.
Babaen ti paltiing, nakita ni Daniel a ti tagtagainep ni Nabucodonosor nangisirmata kadagiti masakbayan a nainlubongan a pagarian, a kasta met iti masakbayan a pagarian ti Dios, a kaano man dinto madadael” (Daniel 2:44). “Ti Simbaan ti naipadto a pagarian iti ud-udina nga aldaw,” insuro ni Elder D. Todd Christofferson, “saan a pinarsua ti tao ngem impasdek ti Dios iti langit ken agtulidtulid kas maysa a bato a ‘natagaan iti bantay a saan a gapuanan dagiti ima’ tapno mangpunno iti daga” (“Why the Church,” Ensign wenno Liahona, Nob. 2015,111). Panunotem ti maipapan iti pagarian ti Dios iti ud-udina nga aldaw bayat ti panangbasam kadagiti pannakailadawan ti bato iti Daniel 2:34–35, 44–45. Ania dagiti pagpapadaan a makitam iti nagbaetan ti bato ken ti pagarian? Kasano a makitam ti pagarian ti Dios a mangpumpunno iti daga iti agdama?
Kitaen met iti Gordon B. Hinckley, “The Stone Cut Out of the Mountain,” Ensign wenno Liahona, Nob. 2007, 83–86; L.Whitney Clayton, “The Time Shall Come,” Ensign wenno Liahona, Nob. 2011, 11–13.
Tulongannakto ti Mangisalakan kadagiti pannubokko.
Ania dagiti nalawag a pannakaammo ken pannakaawat nga umay kenka bayat ti panangbasam maipapan iti maikapat a ladawan a makitkita iti umap-apuy nga urno nga adda da Sidrac, Misac ken Abdenago? Kasano a matulongannaka daytoy a pakaammuan kadagiti pannubok a pakaipasanguam? Mabalin a makasarakka kadagiti nayon a nalawag a pannakaammo ken pannakaawat iti Mosiah 3:5–7; Alma 7:11–13; Doktrina ken Katulagan 61:36–37; 121:5–8.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Daniel 1–2.Bayat ti panangbasayo iti Daniel 1 ken2 nga aggigiddan, mabalinyo a sapulen dagiti bendision a naawat ni Daniel ken dagiti gagayyemna babaen ti saanda a panagsida iti karne ken pananginum iti arak ti ari. (Kitaen iti video “God Gave Them Knowledge,” ChurchofJesusChrist.org.) Mabalinmo nga idilig dagita a bendision kadagiti kari ti Apo kadatayo bayat ti panagtungpaltayo kadagiti bilinna, a kas iti Word of Wisdom (kitaen iti Doktrina ken Katulagan 89:18–21). Kasano a binendisionannatayo ti Apo iti panagtungpal iti Word of Wisdom?
-
Daniel 3.Kasano a matulongam ti pamiliam nga agsursuro maipapan iti estoria iti Daniel 3? ”Da Sidrac, Misac, ken Abdenago” iti Dagiti Estoria iti Daan a Tulag ti makatulong. Ania ti pakaawisantayo maipapan kada Sidrac, Misac, ken Abdenago? Ania dagiti situasion a pakaipasanguantayo a mangkarit iti pammatitayo ken agkasapulan kadatayo a mangipakita nga agtalektayo iti Dios?
-
Daniel 6:1–23.Mabalin a magustuan ti pamiliam ti panangyakem kadagiti paset iti estoria iti Daniel 6:1–23 (kas pagarigan, dagiti bersikulo 10–12 wenno 16–23). Ania ti masursurotayo manipud iti pagwadan ni Daniel? Ania ti maaramidtayo tapno agbalin nga ad-adda pay a kas kenkuana?
-
Daniel 6:25–27.Segun kadagitoy a bersikulo, kasano a naapektuan ni Ari Dario idi insalakan ti Apo ni Daniel manipud kadagiti leon? Mabalinmo pay a basaen iti Daniel 2:47; 3:28–29 maipapan no kasano a naapektuan ni Ari Nabucodonosor iti kasta met la a wagas. Ania dagiti gundaway nga adda kadatayo tapno mangimpluensia iti dadduma? Ilawlawag dagiti pagarigan a nakitamon maipapan no kasano a nakaimpluensia kadagiti dadduma ti pammati dagiti dadduma a tao, a pakairamanan dagiti miembro ti pamilia, para iti pagimbagan.
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “I Want to Live the Gospel,” Children’s Songbook,148.
Panangpadur-as iti Panangisurotayo
Isuro ti doktrina. Ti ebanghelio ti Apo ket napintas iti kinasimplena (kitaen iti Doktrina ken Katulagan 133:57). Dagiti simple nga aktibidad ken panaglilinnawag a naipamaysa iti doktrina ket mabalin a mangawis iti Espiritu Santo a mangidanon iti mensahe ti ebanghelio iti puspuso ti pamiliam.
Ni Daniel iti Rukib dagiti Leon, 1872. Rivière, Briton (1840–1920). Credit: Walker Art Gallery, National Museums Liverpool/Bridgeman Images