Umaykayo, Sumurot Kaniak, ni Scott Sumner

Oktubre 24–30

Ezequiel 1–3; 33–34; 36–37; 47

“Maysa a Baro a Puso Isaadkonto iti Unegyo”

Naawis ni Ezequiel a simboliko a “nangan” iti balikas ti Dios—tapno punnuen ti bagina iti daytoy (kitaen iti Ezequiel 2:9–3:3, 10). Kasano ti panangpunnom iti bagim iti balikas ti Dios itoy a lawas?

Isuratmo dagiti Impresionmo

Maysa a propeta ni Ezequiel a napapanaw iti siudadna. Maibilang kadagiti dadduma pay nga Israelita, natiliw ken naibaon iti Babilonia iti sumagmamano a tawen sakbay a nadadael ti Jerusalem iti kamaudiananna. Iti Jerusalem, maysa koma ni Ezequiel a saserdote nga agserserbi iti templo. Iti Babilonia, maibilang isuna “kadagiti nakayawan,” ket isu “nagtugaw iti nagbabaetanda” (Ezequiel 3:15), ginasgasut a milia manipud iti templo ken bassit ti namnamana nga agsubli iti maipatpateg a balay ti Dios. Kalpasanna maysa nga aldaw naaddaan iti parmata ni Ezequiel. Nakitana “ti dayag ni Jehova” (Ezequiel 1:28)—saan nga idiay templo iti Jerusalem ngem iti Babilonia kadagiti napapanaw iti siudadda. Ti kinadangkes iti Jerusalem, naammuanna, ket nagbalin a nakaro unay ta awanen ti presensia ti Dios sadiay (kitaen iti Ezequiel 8–11; 33:21).

Maysa kadagiti trabaho ni Ezequiel ti mangballaag kadagiti Israelita maipapan iti bunga ti yaalsada—maysa a ballaag a saan a naipangag unay. Ngem ad-adda pay iti mensahe ni Ezequiel: impadtona nga, iti baet ti kinadakes dagiti banag, adda dalan nga agsubli. No awaten dagiti tao ti Dios ti awis a “denggen ti sao ni Jehova” (Ezequiel 37:4), no ania ti naminsan a natay ket mapagbiag. Mabalin a masukatan ti “bimmato a puso” iti “baro a puso” (Ezequiel 36:26). “Ipaaykonto ti espirituk kadakayo,” imbaga ti Apo kadakuada, “ket agbiagkayto” (Ezequiel 37:14). Ket iti maudi nga aldaw, ti Apo mangbangon iti baro a templo ken ti baro a Jerusalem, ket ti naganto ti siudad iti daydiay nga aldaw ni Jehova adda dita” (Ezequiel 48:35).

Dagiti Kapanunotan para iti Bukod a Panagadal iti Nasantuan a Kasuratan

Ezequiel 1–3

“Sawemto kadakuada dagiti saok.”

Ti panagbasa maipapan iti awag ni Ezequiel nga agministro iti Ezequiel 1–3 mabalin a mangguyugoy kenka a mangpanunot maipapan kadagiti gundaway nga inted kenka ti Dios tapno “isaom dagiti sao[na]” kadagiti dadduma (Ezequiel 3:4). Iti Ezequiel 2–3, kitaem dagiti saona a pammaregta ken panangisuro ken ni Ezequiel. Nupay nalabit a saan a managsukir dagiti tao a pagserbiam a kas dagiti tattao ni Ezequiel, ibilangmo no kasano a mangapekto dagiti sao ti Dios ken ni Ezekiel iti wagas a panangkitam iti panagserbim iti Simbaan, iti pagtaengan, ken iti sadino man.

Kitaen met iti Ezekiel 33:1–9; D.Todd Christofferson, “The Voice of Warning,” Ensign wenno Liahona, Mayo 2017, 108–11.

Ezequiel 33:10–19

Kayat ti Apo a mamakawan.

“”No…dagiti basbasolmi addada iti rabawmi,” napanunot dagiti naibalud nga Israelita, “kasano ngarud ti panagbiagmi?” (Ezequiel 33:10). Kas sungbat, insuro ti Apo kadakuada dagiti napapateg a kinapudno maipapan iti panagbabawi ken pannakapakawan. Dagitoy a saludsod ti mabalin a makatulong kenka a mangutob kadagita a kinapudno:

• Ania iti panagkunam ti kayat a sawen ti “agtalekka iti [bukodmo] a kinalinteg”? (kitaen iti Ezequiel 33:12–13).

• Ania koma ti isaom iti maysa a tao a makarikna a ti nalinteg a tao ken ti nadangkes a tao a nailadawan iti Ezequiel 33:12–19 ket saan nga agpada ti pannakatratoda? (kitaen met iti Mateo 21:28–31; Lucas 18:9–14).

• Ania dagiti ragup ti balikas a masarakam kadagitoy a bersikulo a makatulong kenka a makaawat no ania ti kaipapanan ti agbabawi? Ania dagiti nayon a pannakaammo ken pannakaawat a masarakam iti Ezequiel 36:26–27 ken Alma 7:14–16?

Ezekiel 34

Awisennak ti Apo a mangpakan kadagiti karnerona.

Iti Ezekiel 34, itudo ti Apo kadagiti lider dagiti taona a kas “agpaspastor.” Bayat ti panagbasam, ibilangmo no ania ti isingasing kenka daytoy a wagayway maipapan iti no ania ti kaipapanan ti agbalin a maysa a lider. Asino dagiti “karnero” a kayat ti Apo a pakanem? Kasano a masurotmo ti pagwadan nga ipakita ti Mangisalakan a kas agpaspastortayo? (kitaen kadagiti bersikulo 11–31).

Kitaen met iti Juan 21:15–17.

Nakita ni Ezekiel iti parmata ti maysa a karayan nga agay-ayus manipud iti templo ken mangpaimbag iti Natay a Baybay.

Ezequiel 37

Um-ummongen ti Apo dagiti taona ken it-itedna kadakuada ti baro a biag.

Nailadawan ti panaguummong ti Israel iti Ezequiel 37 babaen ti dua a simbolo. Bayat ti panangbasam maipapan iti umuna a maysa—maisubsubli dagiti natay a tulangda nga agbiag (kitaen kadagiti bersikulo 1–14)—utobem no ania ti masursurom maipapan iti panaguummong ti Israel iti agsumbangir ti belo (kitaen met iti Ezequiel 36:24–30).

Ti maikadua a simbolo (kitaen kadagiti bersikulo 15–28) iramanna ti dua a sarukod [stick], nga ibukbuksil ti adu nga iskolar a kas pagsuratan a kayo a tabla a napagtipon babaen ti bisagra. Ti sarukod [stick] ni Juda ket mabalin a mangibagi iti Biblia (gapu ta adu iti Biblia ti insurat dagiti an-annabo ni Juda), ken ti sarukod [stick] ni Jose ket mabalin a mangibagi iti Libro ni Mormon (gapu ta ti kaamaan ni Lehi ti an-annabo ni Jose iti Egipto). Sipapanunot iti dayta, ania ti isuro kenka dagitoy a bersikulo maipapan iti akem dagiti nasantuan a kasuratan iti pannakaummong ti Israel? Ania ti inayon ti 2 Nephi 3:11–13 (maysa a padto maipapan ken ni Joseph Smith ken ti Libro ni Mormon) iti pannakaawatmo?

Kitaen met iti 2 Nephi 29:14; “The Book of Mormon Gathers Scattered Israel” (video, ChurchofJesusChrist.org).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Ezequiel 33:1–5.Tapno mailadawan dagitoy a bersikulo, maysa a miembro ti pamilia ti mabalin nga agpammarang nga “agbambantay” babaen ti panagtamdagna iti tawa ken panangibagana iti dadduma pay iti pamilia no ania ti mapaspasamak iti ruar. Kasano a kas maysa nga agbambantay kadatayo ti sibibiag a propetatayo?

Ezequiel 33:15–16Ania ti isuro kadatayo dagitoy a bersikulo maipapan iti pammakawan a maawattayo babaen ken ni Jesucristo?

Ezequiel 36:26–27.Ipakitam iti pamiliam iti sumagmamano a bato bayat ti panangilawlawagmo no ania ti kayat a sawen ti maaddaan iti “bimmato a puso.” Paisingasingmo kadakuada dagiti balikas a mangiladawan iti “baro a puso” ken “baro nga espiritu” nga ited ti Mangisalakan kadatayo (kitaen iti Mosiah 3:19; 5:2).

Ezequiel 37:15–28.Mabalin a sapulen dagiti miembro ti pamilia ti dua a sarukod [stick] ket mangisurat iti maysa a Para iti Juda (Biblia) ken iti sabali pay a Para ken Jose (Libro ni Mormon) (kitaen kadagiti bersikulo 16–19). Kalpasanna mabalinda ti mangibinglay kadagiti estoria wenno nasantuan a kasuratan manipud iti Biblia ken Libro ni Mormon a makatulong kadakuada a makarikna nga as-asidegda iti Mangisalakan ken agbalin a “tattao[na]” (bersikulo 23).

Ezequiel 47:1–12.Iladawan dagitoy a bersikulo ti parmata maipapan iti danum nga agay-ayus manipud iti templo ken mangpapaimbag iti Natay a Baybay—maysa a baybay a naapgad unay tapno saan a makapagbiag dagiti ikan ken mula iti daytoy. Mabalin a magustuan dagiti ubbing nga idrowing ti ladawan daytoy a parmata. Ania ti mabalin nga isimbolo ti danum nga agay-ayus manipud iti templo? (kitaen iti video “And the River Will Grow,” ChurchofJesusChrist.org). Kasano a makatulong iti templo a mangagas kadatayo? (kitaen iti Ezequiel 47:8–9,11).

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Naisingasing a kanta: “Dear to the Heart of the Shepherd,” Hymns, no. 221.

Panangpadur-as iti Panangisurotayo

Saanmo a padasen nga isuro ti amin a banag. Mabalin a saanmo a kabaelan a sukisoken ti tunggal kinapudno iti Ezequiel a kaduam ti pamiliam. Sapulem dagiti naespirituan a pannarabay tapno maikeddeng no ania ti ipamaysam. (Kitaen iti Panangisuro iti Wagas ti Mangisalakan, 7.)

“Adtoy, dagiti danum nagayusda manipud iti sirok ti dapian ti balay.… Ket amin a banag agbiagto iti sadino man a danonan ti karayan” (Ezequiel 47:1, 9). Naaramat ti imahe babaen ti lisensia manipud iti shutterstock.com.