“Oktubre 10–16. Jeremias 1–3; 7; 16–18; 20 “Kasakbayan ti Panangbukelko Kenka iti Tian Nabigbigankan,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Oktubre 10–16. Jeremias 1–3; 7; 16–18; 20,” Umaykayo, Sumurot Kaniak—Para kadagiti Indibidual ken Pamilia: 2022
Jeremias, ni Walter Rane
Oktubre 10–16
Jeremias 1–3; 7; 16–18; 20
“Kasakbayan ti Panangbukelko Kenka iti Tian Nabigbigankan”
Kinuna ni Elder David A. Bednar: “Maysa kadagiti wagas a mangngegak [ti Apo] ket kadagiti nasantuan a kasuratan. Dagiti nasantuan a kasuratan ti naisakbay a naisurat a timek ti Apo” (“‘Hear Him’ in Your Heart and in Your Mind,” ChurchofJesusChrist.org).
Isuratmo dagiti Impresionmo
Idi damo, saan a napanunot ni Jeremias nga agbalin a maysa a nasayaat a propeta. “Adtoy, saanko nga ammo ti agsao,” nagkeked idi damo nga immawag ti Apo kenkuana (Jeremias 1:6). Impanamnama ti Apo kenkuana, “Inkabilko dagiti sasaok dita ngiwatmo” (bersikulo 9). Narikna ni Jeremias nga isu ket maysa nga “ubing” nga awan pay padasna (bersikulo 6), ngem inlawlawag ti Apo a talaga nga ad-adda a naisagana isuna ngem iti naamirisna—naordenan isuna iti daytoy a takem uray pay sakbay ti pannakayanakna (kitaen iti bersikulo 5). Iti kasta inikkat ni Jeremias dagiti butengna ket inawatna ti awag. Binallaaganna dagiti ari ken saserdorte a dagiti sinsinan a kinasantoda saanto a mangispal kadakuada manipud iti pannakadadael ti Jerusalem. Ti “ubing” a nangipagarup a saan a makapagsao nakarikna iti balikas ti Dios “iti puso[na] kas makauram nga apuy” ket saan a makapagulimek (Jeremias 20:9).
Maipadatayo met iti estoria ni Jeremias. Ammonatayo met ti Dios, sakbay a nayanak ken naisaganatayo nga agaramid iti trabahona iti daga. Maibilang iti dadduma pay a banag, iraman dayta nga aramid ti maysa a banag a nasirmata ni Jeremias: panangummong kadagiti tao ti Dios, a saggaysa, tapno “ipan[na] [ida] idiay Sion” (Jeremias 3:14). Ket uray no ditayo ammo eksakto no ania ti aramiden wenno sawentayo, a nasken a “saan[tayo] nga agbuteng …; ta addaak kenka, kuna ni Jehova” (Jeremias 1:8, 19).
Para iti pakagupgopan ti libro ti Jeremias, kitaen iti “Jeremias” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Jeremias 1:4–19; 7:1–7; 20:8–10
Naawagan dagiti propeta nga agsao iti balikas ti Apo.
Bayat ti panangbasam iti Jeremias 1:4–19 maipapan iti awag ni Jeremias nga agbalin a maysa a propeta, utobem ti akem dagiti propeta iti biagmo. Ania ti masursurom maipapan kadagiti propeta manipud iti balikas ti Apo ken ni Jeremias? (kitaen met iti Jeremias 7:1–7). Masansan a saan a naawat ti panangaskasaba ni Jeremias (kitaen iti Jeremias 20:8, 10). Ania ti masursurom manipud kadagiti balikas ni Jeremias iti Jeremias 20:9? Laglagipem dagitoy a kapanunotan iti unos ti panagadalmo kadagiti pannursuro ni Jeremias. Ania ti masarakam kadagitoy a pannursuro a mangparegta kenka a mangsurot kadagiti propetatayo iti ud-udina nga aldaw?
Am-ammonak ti Dios sakbay a nayanakak.
Sakbay a nayanak ni Jeremias, am-ammo ti Dios isuna ket pinilina, wenno naipasakbay a naordenan isuna, a mangipatungpal iti masinunuo a mision iti daga (kitaen iti Jeremias 1:5). Panagkunam apay a napateg ken ni Jeremias a mangammo iti daytoy?
Kasta met nga am-ammonakan ti Dios sakbay a maipasngayka ket naipasakbay a naordenanka kadagiti nalawag a pagrebbengan (kitaen iti Alma 13:1–4; Doktrina ken Katulagan 138: 53–56; Abraham 3:22–23). Ania ti pagdumaan a maaramid daytoy a pannakaammo iti biagmo? No naawatmon ti bendisionmo iti patriarka, mabalinmo a sikakararag nga irebyu daytoy ket agdamag iti Dios no kasano a maipatungpal no ania ti naipasakbay a naordenan nga aramidem.
Kitaen met iti Gospel Topics, “Foreordination,” “Premortality,” topics.ChurchofJesusChrist.org.
Inusar dagiti tao iti nagkauna nga Israel dagiti bubon a pagurnongan iti napateg a danum.
“Naglikudandak nga ubbog dagiti dandanum a sibibiag.”
Iti lugar nga awan tudona a nagindegan dagiti Israelita, nagurnong dagiti tao iti napateg a danum iti uneg ti daga a maawagan iti bubbubon [cistern]. Apay a nasaysayaat ti umaw-awat iti danum manipud iti maysa nga ubbog ngem iti agpanpannuray iti maysa a bubon [cistern]? Ania ti kayat a sawen “ti ubbog dagiti dandanum a sibibiag”? Ania iti panagkunam nga isimbolo dagiti “bubbubon a nagrengngat” a nadakamat iti Jeremias 2:13 ? Bayat ti panangbasam iti Jeremias 2 ken7, kitaem no kasano ti pananglipat dagiti tao kadagiti dandanum a nabiag ti Apo, ket panunotem maipapan no kasano ti panangawat iti danum a sibibiag iti biagmo.
Maiturong tiJeremias 7 kadagiti sumsumrek iti “ruangan ti balay ni Jehova … tapno agrukbab ken Jehova” (Jeremias 7:2). Ngem iti baet daytoy akinruar a langa ti kinapasnek, nagbasolda iti nakaro a kinadangkes (kitaen dagiti bersikulo 2–11). Ania dagiti mensahe a mariknam a mabalin nga adda iti Apo para kenka kadagiti bersikulo 21–23?
Ummongento ti Apo dagiti taona.
Idi impadto ni Jeremias ti panangummong iti nawarawara nga Israel, kinunana nga ad-adda a napapapaut daytoy ngem iti Ipapanaw manipud iti Egipto (kitaen iti Jeremias 16:14–15). Iti isu met la a kaipapanan, kinuna ni Presidente Russell M. Nelson: “Naibaonkayo iti daga iti daytoy umisu a panawen … tapno tumulong a mangummong iti Israel. Awan ti mapaspasamak ditoy daga ita a napatpateg ngem iti dayta a [panaguummong]. … Nasken a kayat a sawen daytoy a panaguummong ti amin a banag kadakayo” (Russell M. Nelson ken Wendy W. Nelson, “Hope of Israel” [worldwide youth devotional, June3, 2018], pangsuplemento iti New Era ken Ensign, Ago. 2018,12, ChurchofJesusChrist.org).
Bayat ti panagadalmo iti Jeremias 3:14–18; 16:14–21, ania ti makaparegta kenka maipapan iti panaguummong ti Israel iti ud-udina nga aldaw? Ania ti isingasing dagitoy a bersikulo maipapan iti no kasano a mapasamak dayta a panaguummong? Ania dagiti nayon a nalawag a pannakaammo ken pannakaawat a masarakam iti dadduma pay a mensahe ni Presidente Nelson a nadakamat iti ngato?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Jeremias 1:5.Mabalinmo nga usaren daytoy a bersikulo tapno pagsasaritaan maipapan iti biagtayo iti Nailangitan nga Ama sakbay a nayanaktayo. Makatulong dagiti resources kas iti “I Lived in Heaven” (Children’s Songbook,4) ken “Introduction: Our Heavenly Father’s Plan” (iti Dagiti Estoria iti Baro a Tulag, 1–5). Kasano a ti pannakaammo maipapan iti biag sakbay daytoy a biag ket mangapekto iti wagas ti panagbiagtayo iti mortal a biag?
-
Jeremias 2:13; 17:13–14.Tapno makatulong kadagiti miembro ti pamiliam a mangiladawan iti panunotda kadagitoy a bersikulo, mabalinmo nga ipakita no ania ti mapasamak no ikabilmo ti danum iti maysa a nagrekka wenno nabuong a pagkargaan. Ania ti mabalin nga ibagi ti “ubbog dagiti dandanum a sibibiag” ken dagiti “bubbubon a nagrengngat”? (Jeremias 2:13). Kasano nga uminumtayo manipud iti danum a sibibiag ti Apo?
-
Jeremias 16:16.Indasig ni Presidente Russell M. Nelson dagiti mangngalap ken mangnganup iti daytoy a bersikulo kadagiti misionario iti ud-udina nga aldaw (kitaen iti “The Gathering of Scattered Israel,” Ensign wenno Liahona, Nob. 2006, 81). Mabalin nga “aganup” dagiti miembro ti pamilia kadagiti banag iti lawlaw ti pagtaenganyo ket isaritam no kasano a makatulongka nga “agkalap” ken “aganup” para iti nawarawara nga Israel.
-
Jeremias 18:1–6.Tapno agsukisok kadagitoy a bersikulo, mabalinmo nga ilawlawag wenno ipakita no kasano ti mangaramid iti damili. Ania ti adda a mensahe ti Apo para iti Israel iti Jeremias 18:1–6? Ania ti kayat a sawen ti agbalin a pila kadagiti ima ti Apo? (kitaen met iti Isaias 64:8). Para iti sabali pay nga estoria a maidilig iti pila ti agdamdamili, kitaen iti mensahe ni Elder Richard J. Maynes “The Joy of Living a Christ-Centered Life” (Ensign wenno Liahona, Nob. 2015, 27–30).
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “Israel, Israel, God Is Calling,” Hymns, no. 7.
Panangpadur-as iti Panangisurotayo
Agusar kadagiti estoria. Masansan a nangisuro ti Mangisalakan a nagusar kadagiti estoria. Mangpanunot kadagiti estoria manipud iti bukodmo a biag a makaaramid a sibibiag kadagitoy a pagbatayan ti ebanghelio. (Kitaen iti Panangisuro iti Wagas ti Mangisalakan, 22.)
“Adtoy, kas iti pila iti ima ti agdamdamili, kastakayo iti imak, O balay ti Israel” (Jeremias18:6).