“Septiembre 26–Oktubre 2. Isaias 50–57: ‘Inturedna dagiti Lidaytayo, ken Inawitna dagiti Ladingittayo,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Septiembre 26–Oktubre 2. Isaias 50–57,” Umaykayo, Sumurot Kaniak—Para kadagiti Indibidual ken Pamilia: 2022
Ti Pananglalais ken ni Cristo, ni Carl Heinrich Bloch
Septiembre 26–Oktubre 2
Isaias 50–57
“Inturedna dagiti Lidaytayo, ken Inawitna dagiti Ladingittayo”
Utobem dagiti nalawag a pannakaammo ken pannakaawat manipud iti Isaias 50–57 a makatulong kenka a nasingsinged iti Mangisalakan. Isuratmo dagiti impresion a maawatmo.
Isuratmo dagiti Impresionmo
Iti unos ti panagministrona, nagsao ni Isaias ti maysa a mannakabalin a mangisalakan (kitaen, kas pagarigan, iti Isaias 9:3–7). Dagitoy a padto koma ti nangnangruna a napateg kadagiti Israelita kalpasan ti adu a siglo idi addada iti pagbaludan iti Babilonia. Maysa a tao a makatumba kadagiti pader ti Babilonia ti agbalin a pudno a nabileg a mangparmek. Ngem saan kadi dayta ti kita ti Mesias nga inladawan ni Isaias kadagiti kapitulo 52–53: “Isu nauy-uyaw ken binaybay-an dagiti tao; maysa a tao ti ladladingit, ken nakaam-ammo iti lidliday, ket naum-umsi kas iti maysa a tao a kenkuana dagiti tao ilingedda dagiti rupada.… Isu impatotayo a nasaplit, nakabil iti Dios, ket napagsagaba” (Isaias 53:3–4). Babaen ti panangtedna iti saan a ninamnama a mangisalakan, insuro ti Dios kadatayo maipapan iti pudno a pannakaisalakan. Tapno maisalakantayo manipud iti pannakailupitlupit ken rigat, imbaon ti Dios ti Maysa nga Isu Mismo “naparigat, ken … napagsagaba.” A sumagmamano ti nangnamnama iti maysa a leon, nangibaon iti kordero (kitaen iti Isaias 53:7). Awan duadua, saantayo a wagas dagiti wagas ti Dios (kitaen iti Isaias 55:8–9). Wayawayaannatayo ni Jesucristo saan laeng a babaen ti pananglukat iti pagbaludan ngem babaen ti panangala iti lugartayo sadiay. Pagin-awaennatayo manipud kadagiti kawar ti ladingit ken liday babaen ti panangibturna kadagitoy Mismo (kitaen iti Isaias 53:4–5,12). Personal nga isalakannatayo. Makipagsagaba kadatayo, iti maysa nga aramid ti “agnanayon a kinamanagayat” a “saanto a pumanaw kenka” (Isaias 54:8, 10).
Dagiti Kapanunotan para iti Bukod a Panagadal iti Nasantuan a Kasuratan
Naraniag ti masakbayan para kadagiti tao ti Apo.
Nupay binubos dagiti Israelita ti adu a tawen iti pagbaludan—ken uray pay dayta a pannakabalud ti bunga dagiti bukodda a nakapuy a pili—kayat ti Apo makitada iti masakbayan nga addaan iti namnama. Ania dagiti manamnama a mensahe a masarakam iti Isaias 50–52? Ania ti insuro ti Apo kadatayo maipapan iti Bagina iti kadagitoy a kapitulo, ken apay a daytoy ti mangted kenka iti namnama? (kitaen, kas pagarigan, iti Isaias 50:2, 5–9; 51:3–8, 15–16; 52:3, 9–10).
Mabalinmo pay nga ilista ti amin a banag kadagiti kapitulo 51–52 nga awisen ti Apo ti Israel a mangaramid iti daytoy a manamnama a masakbayan a kinapudno. Ania ti mariknam nga aw-awisennaka ti Apo nga agaramid babaen dagitoy a balikas? Kas pagarigan, no ania iti panagkunam ti kayat a sawen ti “agriingka” ken “iyusongmo ti kinabileg”? (Isaias 51:9; kitaen met iti Isaias 52:1; Doktrina ken Katulagan 113:7–10). Apay iti panagkunam ti awis a “dumngeg” (wenno “dumngeg nga addaan iti panggep nga agtungpal) ket masansan unay a maulit? (Russell M. Nelson, “Hear Him,” Liahona, Mayo 2020,89).
Kitaen met iti Mosiah 12:20–24; 15:13–18; 3 Nephi 20:29–46.
Gapu iti Ayat, ni sculptor Angela Johnson
Imbaklay ni Jesucristo iti Bagina dagiti basol ken ladingitko.
Sumagmamano a kapitulo iti nasantuan a kasuratan ti mangiladawan iti pangsubbot a mision ni Jesucristo a napimpintas ngem iti Isaias 53. Maaddaan iti oras a mangutob kadagitoy a balikas. Iti tunggal bersikulo, agsardeng tapno panunoten no ania ti sinagaba ti Mangisalakan—dagiti “ladingit,” liday,” ken “basbasol” nga imbaklayna—para iti amin a tao ken nangnangruna para kenka. Mabalinmo a sukatan dagiti balikas a kas “datayo” ken “dakami” iti “siak” bayat ti panagbasam. Ania dagiti rikna wenno kapanunotan nga iparegta kenka dagitoy a bersikulo? Ibilangmo ti panangisurat kadagitoy.
Mabalin a kayatmo nga irebyu ti Mosiah14; 15:1–13 tapno makita no kasano nga inusar ni propeta Abinadi dagiti balikas ni Isaias a mangisuro maipapan iti Mangisalakan.
Kayat ni Jesucristo nga agsubliak Kenkuana.
Addaantayo amin iti panawen no mariknatayo nga adayotayo manipud iti Apo gapu kadagiti basol wenno pagkapsutantayo. Sumagmamano ti naawanan iti namnama ket pakawanennanto ida. Isaias 54 ken57 dagiti naindaklan a kapitulo a basaen para iti pammatalged ken pammaregta kabayatan dagiti kasta a panawen. Nangnangruna kadagiti Isaias 54:4–10; 57:15–19, ania ti masursurom maipapan iti asi ti Mangisalakan ken dagiti riknana maipapan kenka? Ania ti pakaidumaan nga aramidenna iti biagmo a mangammo kadagitoy a banag maipapan Kenkuana?
Kasano a mayaplikar kenka dagiti bendision a nailadawan iti Isaias 54:11–17 ?
Awisen ti Apo ti amin a “mangsalimetmet iti katulagak.”
Para kadagiti henerasion, nabigbig ti Israel kas natulagan a tao ti Dios. Nupay kasta, kanayon a nairaman ti plano ti Dios iti ad-adu ngem maysa laeng a nasion, gapu ta maawis ti “tunggal mawaw” nga “umaykayo kadagiti dandanum” (Isaias 55:1). Laglagipem daytoy bayat ti panangbasam iti Isaias 55 ken56, ken utobem no ania ti kaipapanan ti agbalin a tattao ti Dios. Ania ti mensahe ti Dios kadagiti makarikna a “naisina a di bumurong” manipud Kenkuana? (Isaias 56:3). Ibilangmo ti panangmarka kadagiti bersikulo a mangiladawan kadagiti ugali ken tignay dagiti “mangsalimetmet iti katulagak” (kitaen iti Isaias 56:4–7).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Isaias 51–52.Bayat ti panangilawlawagmo kadagiti awis ti Apo kadagitoy a kapitulo, mabalinmo nga awisen dagiti miembro ti pamilia a mangyakem kadagitoy. Kas pagarigan, ania ti langa ti “itangadyo dagiti matayo kadagiti langlangit,” “agriingka, bumangonka” wenno “pagpagem ta bagim iti tapok”? (Isaias 51:6,17; 52:2). Ania ti isuro kadatayo dagitoy a ragup ti balikas maipapan iti panangsurot ken ni Jesucristo?
-
Isaias 52:9.Kalpasan ti panangbasam iti daytoy a bersikulo, mabalin nga “agkanta a sangsangkagiddan” ti pamiliam iti maysa a himno wenno kanta dagiti ubbing a mangisangbay kadakuada iti rag-o. Ania dagiti kari iti Isaias 52 ti makaigapu kadatayo tapno “pumgaak iti rag-o”?
-
Isaias 52:11; 55:7.Makaiturong dagitoy a bersikulo iti panaglilinnawag maipapan iti no ania ti mabalin a kayat a sawen ti ragup ti balikas nga “Agtalinaedkayo a nadalus”. Kas paset daytoy a panaglilinnawag, mabalinmo nga irebyu ti topiko iti Para iti Pigsa dagiti Agtutubo (booklet, 2011) wenno basaen dagiti nasantuan a kasuratan maipapan kadagiti bendision ti panagbalin a naespirituan a nadalus (kitaen iti 3 Nephi 12:8; Doktrina ken Katulagan 121:45–46).
-
Isaias 53.Tapno mayam-ammo ti panangiladawan ni Isaias iti Mangisalakan, mabalin nga isarita ti pamiliam maipapan no kasano nga iladawan dagiti estoria, sine, ken dadduma pay a media dagiti bannuar a nangispal kadagiti tao. Mabalinmo nga idasig dagita a panangiladawan kadagiti pangiladawan ti Mangisalakan a mabasam iti Isaias 53. Mabalinmo met a buyaen ti video a “Ti Pagariak ket Saan Nga Iti Daytoy a Lubong” (ChurchofJesusChrist.org) ket isaritam no kasano a natungpal dagiti padto iti Isaiah53 . Ania dagiti sumagmamano a ladingit ket liday nga ibakbaklay ti Mangisalakan para kadatayo?
-
Isaias 55:8–9.Kasano a maigidiat ti langa dagiti banag no addaka iti ngatuen ti daga? Ania ti kaipapanan kenka ti Dios a nangatngato dagiti wagas ken pampanunotna ngem dagiti wagas ken pampanunottayo?
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “I Stand All Amazed,” Hymns, no. 193.
Panangpadur-as iti Bukod a Panagadal
Usaren ti musika. Sibibileg a mangisuro dagiti himno kadagiti pagbatayan ti ebanghelio. Ibilangmo ti panagdengngeg wenno panagbasa kadagiti himno ti sakramento a makatulong kenka tapno maawatam dagiti kinapudno maipapan iti Pannubbot ni Jesucristo a naisuro iti Isaias 53. (Kitaen iti Panangisuro iti Wagas ti Mangisalakan, 22.)
Ti Silawna, ni Michael T. Malm