Ti Araraw ni Jeremias a Propeta, manipud iti kitikit ti Nazarene School

Oktubre 17–23

Jeremias 30–33; 36; Dagiti Un-unnoy 1; 3

“Pagbalinekto ti Leddaangda a Rag-o”

Bayat ti panangisuratmo kadagiti impresionmo, panunotem no kasano a mainaig dagiti pagbatayan iti Jeremias ken Dagiti Un-unnoy iti dadduma pay a banag iti Daan a Tulag.

Isuratmo dagiti Impresionmo

Idi umuna nga inawagan ti Apo ni Jeremias tapno agbalin a propeta, imbagana kenkuana a ti misionna a “mangparut ken mangrebba” (Jeremias 1:10)—ken iti Jerusalem, adu ti kinadangkes a maparut ken marebba. Ngem daytoy laeng ti paset ti mision ni Jeremias—isu naawagan pay a mangbangon, ken mangimula” (Jeremias 1:10). Ania ti mabalin a mabangon wenno maimula kadagiti naliday a dadael nga imbati ti panagalsa ti Israel? Maipada, a no imbati ti basol wenno rigat dagiti dadael it biagtayo, kasano a makabangon ken makapagmulatayo manen? Masarakan ti sungbat iti “sanga ti kinalinteg” (Jeremias 33:15), ti naikari a Mesias. Mangisangbay ti Mesias iti “baro a tulag” (Jeremias 31:31)—maysa nga agkasapulan iti ad-adda pay ngem iti superpisial a panagkumit wenno akinruar a langa ti kinapasnek. Nasken nga adda ti lintegna “iti akin-uneg a paset[tayo],” a naisurat “iti [puspuso[tayo].” Dayta ti talaga a kaipapananna tapno “agbalin a Dios[tayo]” ti Apo ken tapno “agbalintayo a tattaona” (Jeremias 31:33). Daytoy ti tungpal biag a proseso, ken agbidduttayo pay laeng ket mangigaputayo iti panagladingit no dadduma. Ngem no aramidentayo, addaantayo iti daytoy a kari manipud iti Apo: “Pagbalinekto ti leddaangda a rag-o” (Jeremias 31:13).

Para iti pakagupgopan dagiti Un-unnoy, kitaen iti “Un-unnoy, Libro dagiti” iti Pangiwanwan iti nasantuan a Kasuratan (scriptures.ChurchofJesusChrist.org).

Dagiti Kapanunotan para iti Bukod a Panagadal iti Nasantuan a Kasuratan

Jeremias 30–31; 33

Iruarto ti Apo ti Israel manipud iti pannakabalud ken ummongenna ida.

Iti Jeremias 30–31; 33 binigbig ti Apo ti “un-unnoy ken napait a panangsangit” (Jeremias 31:15) a mapadasan dagiti Israelita a bayat ti papanda iti pagbaludan. Nupay kasta, indatonna pay dagiti balikas ti liwliwa ken namnama. Ania dagiti ragup ti balikas kadagitoy a kapitulo nga iti panagkunam a nangted koma kadagiti Israelita iti linglingay ken namnama? Ania dagiti kari a masarakam manipud iti Apo kadagiti taona? Kasano a mayaplikar kenka dagitoy a kari iti agdama?

Jeremias 31:31–34; 32:37–42

“Isudanto dagiti taok, ket Siakto ti Diosda.”

Nupay linabsing dagiti Israelita ti katulaganda iti Apo, impadto ni Jeremias nga ipasdekto manen ti Apo ti “baro” ken “agnanayon a katulagan” kadagiti taona (Jeremias 31:31; 32:40). Ti baro ken agnanayon a katulagan ket “ti pakabuklan ti ebanghelio ni Jesucristo [kitaen iti Doktrina ken Katulagan 66:2]. Daytoy ket baro tunggal kanito a maipalgak ti baro kalpasan ti panawen ti ikakalilis iti kinapudno. Daytoy ket agnanayon gapu ta katulagan daytoy ti Dios a nagragsakan iti tunggal dispensasion ti ebanghelio a nangawatan dagiti tao a sitatallugod” (Pangiwanwan iti Nasantuan a Kasuratan,”Baro ken Agnanayon a Katulagan,” scriptures.ChurchofJesusChrist.org; nainayon dagiti nagiray a balikas).

Bayat ti panangbasam iti Jeremias 31:31–34; 32:37–42, utobem no ania ti kaipapanan kenka ti agbalin a paset ti natulagan a tattao ti Dios. Kasano nga apektuan dagitoy a bersikulo iti wagas a panangkitam iti pakainaigam iti katulagan iti Dios? Ania ti kayat a sawen ti paisurat ti lintegna iti pusoyo? (kitaen iti Jeremias 31:33).

Kitaen met iti Jeremias 24:7; Hebreo 8:6–12.

Dagiti nasantuan a kasuratan ti makaparegta kadatayo nga agbabawi ket agsubli iti Apo.

Jeremias 36

Addaan dagiti nasantuan a kasuratan iti bileg a mangyadayo kaniak iti dakes.

Binilin ti Apo ni Jeremias a mangisurat kadagiti padtona iti “sangkalukot a libro,” wenno maysa a nalukot a papel, a mangilawlawag a no nasken a denggen dagiti tao dagitoy a padto, “bareng no … agsublida koma tunggal tao manipud iti dakes a dalanna; tapno pakawanek koma ti kinadangkesda” (Jeremias 36:2–3). Bayat ti panangbasam iti Jeremias 36, ibilangmo ti panangisurat no kasano ti panagrikna dagiti sumaganad a tao maipapan kadagitoy a padto:

Ti Apo:

Jeremias:

Baruc:

Jehudi ken Ari Joakim:

Elnatan, Dalaias, ken Gemarias:

Utobem no kasano ti riknam maipapan kadagiti nasantuan a kasuratan ken ti akemda iti biagmo. Kasano a natulongandaka nga umadayo manipud iti dakes?

Kitaen met iti Julie B. Beck, “My Soul Delighteth in the Scriptures,” Ensign wenno Liahona, Mayo 2004, 107–9.

Dagiti Un-unnoy 1; 3

Mabalin a palag-anen ti Apo ti ladingit a mapadasantayo gapu iti basol.

Maysa a napagtitipon a dandaniw ti libro Dagiti Un-unnoy a naisurat kalpasan ti pannakadadael ti Jerusalem ken ti templona. Apay iti panagkunam a napateg a mataginayon dagitoy nga un-unnoy ken nairaman iti Daan a Tulag? Ibilangmo no ania ti makatulong kenka a makaawat kadagiti metapora iti Dagiti Un-unnoy 1 ken3 maipapan iti nakaro a liday a narikna ti Israel. Ania dagiti mensahe ti namnama ken ni Cristo a masarakam? (kitaen nangnangruna iti Dagiti Un-unnoy 3:20–33; kitaen met iti Mateo 5:4; Santiago 4:8–10; Alma 36:17–20).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Jeremias 31:3.Kasano a nangipakitan ti Nailangitan nga Ama ken ni Jesucristo iti “agnanayon a panagayat[da]” para kadatayo? Ti panangipakita kadagiti ladawan dagiti banag a pinarsua para kadatayo ni Cristo wenno kabayatan ti mortal a panagministrona ket makatulong iti pamiliam a makarikna iti “kinamanangngaasina.”

Jeremias 31:31–34; 32:38–41.Ibilang ti panangaramid iti listaan dagiti banag kadagitoy a bersikulo nga ikari ti Apo no agaramidtayo kadagiti katulagan Kenkuana. Ania ti isuro kadatayo dagitoy a bersikulo maipapan iti pateg dagiti katulagantayo?

Mabalin nga isurat (wenno idrowing) pay dagiti miembro ti pamilia iti papel a sinanpuso ti maysa a banag a mangipakita no kasano ti riknada maipapan iti Mangisalakan. Ania ti kayat a sawen ti paisurat ti lintegna iti puspusotayo? (kitaen iti Jeremias 31:33). Kasano nga ipakitatayo ti Apo a kayattayo ti agbalin a tattaona?

Jeremias 36.Kasano a mausarmo ti Jeremias 36 a mangtulong iti pamiliam nga agsursuro maipapan iti kinapateg dagiti nasantuan a kasuratan? (kitaen, kas pagarigan, kadagiti bersikulo 1–6, 10, 23–24, 27–28,32). Mabalinmo nga idawat iti maysa a miembro ti pamilia a mangbasa iti maysa a bersikulo manipud iti daytoy a kapitulo idinto nga isurat daytoy ti sabali pay a miembro ti pamilia, kas iti inaramid ni Baruc para ken ni Jeremias. Apay nga agyamantayo kadagiti panagkagumaan dagiti tao kas ken ni Baruc, a nangtaginayon kadagiti balikas dagiti propeta? Ania ti maaramidtayo tapno ipakita iti Apo ti panangipategtayo kadagiti balikasna iti nasantuan a kasuratan?

Dagiti Un-unnoy 3:1–17, 21–25, 31–32.Kas maysa a pamilia, mabalinmo nga isarita maipapan no kasano a mainaig dagiti rikna a nayebkas iti Dagiti Un-unnoy 3:1–17 iti rikna nga adda kadatayo no agbasoltayo. Kasano a makaimpluensia dagiti mensahe kadagiti bersikulo 21–25, 31–32 iti biagtayo?

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Naisingasing a kanta: “I Feel My Savior’s Love,” Children’s Songbook, 74–75.

Panangpadur-as iti Bukod a Panagadal

Agkalikagum a manggun-od iti paltiing. Bayat ti panangutobmo iti unos ti agmalem, maawatmo dagiti mainayon a kapanunotan ken impresion maipapan kadagiti nasantuan a kasuratan nga inadalmo. Saanmo a panunoten ti panagadal iti ebanghelio kas maysa a banag a pagbubosam iti oras no di ketdi maysa a banag a kanayonmo nga ar-aramiden. (Kitaen iti Panangisuro iti Wagas ti Mangisalakan, 12.)

Ni Jeremias nga Agladladingit iti Pannakadadael ti Jerusalem, ni Rembrandt van Rijn