Ni Jesus iti Sinagoga iti Nazaret, ni Greg K. Olsen

Oktubre 3–9

Isaias 58–66

“Ti Mannubbot Umayto iti Zion”

Bayat ti panagadalmo iti Isaias 58–66, ibilangmo no kasano a mangisangbay dagiti balikas ni Isaias iti rag-o ken namnama para iti masakbayan.

Isuratmo dagiti Impresionmo

Iti nasapa a panagministrona iti daga, simmarungkar ni Jesucristo iti sinagoga iti Nazaret, ti purok a dimmakkelanna. Sadiay a timmakder a nagbasa kadagiti nasantuan a kasuratan, linuktanna ti libro ti Isaias, ken binasana ti ammotayo itan nga Isaias 61:1–2. Kalpasanna impakaammona, “Ita nga aldaw naidanon iti lapayagyo daytoy a surat.” Daytoy ti maysa kadagiti kapudnuan a palawag ti Mangisalakan nga Isu ti Maysa a Napulotan, tapno “lukatak dagiti maparparigat” ken “mangipakaammo ti pannakalukat dagiti nakayawan” (kitaen iti Lucas 4:16–21). Pudno a matungpal daytoy a nasantuan a kasuratan iti dayta nga aldaw. Ket kas iti adu a padto ni Isaias, agtultuloy daytoy a matungpal iti aldawtayo. Agtultuloy ti Mangisalakan a mangpaimbag iti amin nga agrigrigat nga umasideg Kenkuana. Adu dagiti balud a nasken a makasabaan iti pannakawayawaya. Ken adda maysa a nadayag a masakbayan tapno agsagana para iti—maysa a panawen intono ti Apo “mamarsua[nto] iti baro a langlangit ken baro a daga” (Isaias 65:17) ken “panangpatubo iti kinalinteg ken panagdayaw iti saklang dagiti amin a nasnasion” (Isaias 61:11). Ti panagbasa iti Isaias ti manglukat kadagiti matatayo no ania ti inaramiden ti Apo, no ania ti ar-aramidenna, ken no ania pay ti aramidennanto para kadagiti taona.

Dagiti Kapanunotan para iti Bukod a Panagadal iti Nasantuan a Kasuratan

Isaias 58:3–12

Mangisangbay ti panagayuno kadagiti bendision.

Isingasing dagitoy a bersikulo nga iti adu a nagkauna nga Israelita, a ti panagayuno ad-adda a maysa a dagensen ngem maysa a bendision. Adu kadatayo ti makarikna no dadduma iti kasta. No kayatmo a mangsarak iti ad-adu pay a kaipapanan ken panggep iti panagayunom, basaen ti Isaias 58:3–12 a mangsapul kadagiti sungbat ti Apo iti saludsod “Apay nga agayunotayo?” Iti padasmo, kasano a ti panagayuno ti “pangketta kadagiti galut ti kinadangkes” ken “pangwarwar kadagiti patapat ti sangol”? (Isaias 58:6). Kasano a nangisangbay ti panagayuno kenka kadagiti bendision a nailadawan iti Isaias 58:8–12? Kasano a mangaring ti Isaias 58:3–12 iti wagas a panangpanunotmo maipapan iti panagayuno?

Iti mensahena a “Is Not This the Fast That I Have Chosen?” (Liahona, Mayo 2015, 22–25), imbinglay ni Presidente Henry B. Eyring ti sumagmamano a pagarigan ti no kasano a nabendisionan dagiti tao babaen ti panagayuno ken dagiti daton iti panagayuno. Kasano a nasaksiamon dagiti isu met la a bendision iti biagmo?

Kitaen met iti Gospel Topics, “Fasting and Fast Offerings” (topics.ChurchofJesusChrist.org).

Isaias 59:9–21; 61:1–3; 63:1–9

Ni Jesucristo ti Mangisalakan ken Mannubbotko.

Iti Isaias 58–66 masarakamto ti adu a reperensia iti pangsubbot a mision ni Jesucristo. Adtoy ti sumagmamano a pagarigan, karagpin ti sumagmamano a saludsod a mangtulong kenka a mangutob kadagitoy.

• Isaias 59:9–21. Kasano ti pananggupugopmo iti naespirituan a kasasaad dagiti tao a nailadawan kadagiti bersikulo 9–15? Ania ti makaawis kenka maipapan iti panangiladawan iti “mangibabaet” kadagiti bersikulo 16–21 ken ti katulagan nga inaramidna kadagiti umasideg Kenkuana?

• Isaias 61:1–3. Kasano a nabendisionannaka ni Jesucristo kadagiti wagas a nailadawan kadagitoy a bersikulo? Ania dagiti “naimbag a damdamag” nga inyegna kenka? Kasano nga intedna kenka ti kinapintas a kasukat dagiti dapu?

• Isaias 63:7–9. Ania ti “kinamanagayat ni Jehova” a mabalinmo a dakamaten? Ania dagiti rikna para iti Mangisalakan a mangparegta dagitoy a bersikulo iti pusom?

Ania dagiti dadduma pay a reperensia iti Mangisalakan a masarakam iti Isaias 58–66?

Kitaen met iti Mosiah 3:7; Doktrina ken Katulagan 133:46–53.

““Ni Jehova isunto ti agnanayon a silawmo” (Isaias 60:19). Ti Sagut ti Lawag, ni Eva Timothy

Isaias 60; 62

“Ni Jehova isunto ti agnanayon a silawmo.”

Isarita tiIsaias 60 ken62 maipapan iti lawag ken sipnget, mata ken panagkita, a mangisuro maipapan iti no kasano a mangbendisionanto ti ebanghelio ni Jesucristo iti lubong kadagiti maudi nga aldaw. Sapulem dagitoy a konsepto nangnangruna iti Isaias 60:1–5, 19–20; 62:1–2. Bayat ti panangbasam kadagitoy a kapitulo, utobem no kasano nga um-ummongen ti Dios dagiti annakna nga iruar iti kasipngetan nga agturong iti lawag. Ania ti akemmo iti daytoy nga aramid?

Kitaen met iti 1 Nephi 22:3–12; 3 Nephi 18:24; Doktrina ken Katulagan 14:9; Bonnie H. Cordon, “That They May See,” Liahona, Mayo 2020, 78–80.

Isaias 64:1–5; 65:17–25; 66

Agturayto ni Cristo iti daga kabayatan ti Milenio.

Nagsao ni Isaias maipapan iti maysa nga aldaw no “dagiti immun-una a riribuk malipatandan” (Isaias 65:16). Idinto nga addaan daytoy a padto iti sumagmamano a pannakaipatungpal, iti kangrunaan a kaipapanan, dumtengto pay laeng dayta nga aldaw—no agsublinto ni Jesus iti daga ken mangipasdek iti panawen ti kappia ken kinalinteg a maawagan iti Milenio. Inladawan ni Isaias daytoy a masakbayan nga aldaw iti Isaias 64:1–5; 65:17–25; 66. Kitaen no kasano ti kasansan nga inusarna dagiti balikas a kas “agrag-o” ken “agragragsak.” Utobem no apay a ti panagsubli ti Mangisalakan agbalinto nga aldaw a panagrag-o para kenka. Ania ti maaramidmo tapno maisaganam ti yaayna?

Kitaen met iti Pagannurotan ti Pammati 1:10; Russell M. Nelson, “The Future of the Church: Preparing the World for the Savior’s Second Coming,” Ensign, Abr. 2020, 13–17.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Isaias 58:3–11.Mabalin a maawatan a nasaysayaat dagiti miembro ti pamilia ti mensahe ni Isaias maipapan iti panagayuno no yakemda ti kita ti panagayuno a nailadawan iti Isaias 58:3–5 ken ti kita ti panagayuno a nailadawan iti Isaias 58:6–8. Kasano a mapagbalintayo dagiti panagayunotayo nga ad-adda a kas iti “panagayuno a pinili ti [Dios]? Ania dagiti bendision a nakitatayon manipud iti panagayuno?

Isaias 58:13–14.Ania ti pagdumaan ti “panangsapul iti bukod[tayo] a pagragsakan” ken panagsapul iti “rag-o … ken Jehova” iti Sabbath? Kasano a mapagbalintayo ti Sabbath a “rag-o”?

Isaias 60:1–5.Bayat ti panangbasam iti Isaias 60:1–3, mabalin dagiti miembro ti pamilia ti mangsindi iti silaw no maagapad kadagiti bersikulo ti lawag ken iddepem daytoy no dakamaten dagiti bersikulo ti sipnget. Kasano a maipada ti ebanghelio ni Jesucristo iti maysa a lawag kadatayo? Ania ti nasirmata ni Isaias a mapasamakto no ibinglay dagiti tao ti Dios ti lawag ti ebanghelio? (kitaen iti Isaias 60:3 5).

Isaias 61:1–3.Kasano nga impatungpal ti Mangisalakan dagiti padto ni Isaias kadagitoy a bersikulo? Mabalinmo nga awisen dagiti miembro ti pamilia a sarakenda dagiti ladawan ti Mangisalakan a mariknada a mangiladawan kadagitoy nga aspekto ti misionna (masarakan dagiti ladawan kadagiti magasin iti Simbaan wenno iti Libro ti Arte ti Ebanghelio). Mabalin pay ti agkansion iti kanta maipapan iti no kasano a bendisionannatayo ti Mangisalakan, kas iti “I Feel My Savior’s Love” (Children’s Songbook, 74–75).

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Naisingasing a kanta: “When He Comes Again,” Children’s Songbook, 82–83.

Panangpadur-as iti Bukod a Panagadal

Isaganam dagiti aglawlawmo. Makaapekto dagiti aglawlawtayo iti kabaelantayo nga agsursuro. Mangsapul iti maysa a lugar a mangadal kadagiti nasantuan a kasuratan a pakariknaam iti impluensia ti Espiritu. (Kitaen iti Panangisuro iti Wagas ti Mangisalakan, 15.)

“Tumakderka, agraniagka; ta ti lawagmo umay, ket ti dayag ni Jehova lumgak kenka” (Isaias 60:1). Silaw ken Biag, ni Mark Mabry