“Septiembre 19–25. Isaias 40–49: ‘Liwliwaenyo dagiti Taok,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)

“Septiembre 19–25. Isaias 40–49,” Umaykayo, Sumurot Kaniak—Para kadagiti Indibidual ken Pamilia: 2022

Ladawan

Ni Jesus a mangag-agas iti bulsek a lalaki

Ni Jesus a Mangag-agas iti Bulsek a Lalaki, ni Carl Heinrich Bloch

Septiembre 19–25

Isaias 40–49

“Liwliwaenyo dagiti Taok”

Masansan nga usaren ni Isaias ti naisimbolo a pagsasao. Ikasom dagiti kapanunotan ken rikna nga isangbay dagitoy a simbolo iti panunotmo ken pusom. Daytoy ti mabalin a makatulong kenka a maawatam a nasaysayaat no ania ti insurona.

Isuratmo dagiti Impresionmo

“Liwliwa” ti umuna a balikas ni Isaias kapitulo 40. Daytoy ti rugi ti nadumaduma a tono, a nadumaduma a panangyunay-unay iti mensahe ti propeta. Numan pay nangballaag dagiti immun-una a sinurat ni Isaias iti Israel ken Juda maipapan iti pannakadadael ken pannakabalud a sumangbay gapu iti basbasolda, dagitoy a padto idi agangay naisangrat a mangliwliwa kadagiti Judio iti nasurok a 150 a tawen iti masakbayan—kalpasan a nadadael ti Jerusalem, narugitan ti templo, ken naala a balud dagiti tao iti Babilonia. Ngem dagitoy a padto ti nangaring uray pay iti masakbayan dagiti naabak, naupay nga Israelita. Ibagada kadatayo, a no dadduma makariknatayo met iti pannakaabak, pannakaupay, ken uray pay pannakapukaw.

Simple ti mensahe ni Isaias kadakuada ken kadatayo: “Dika agbuteng” (Isaias 43:1). Adda pay la namnama. Saannakayo a nalipatan ti Apo, ken addaan iti bileg kadagiti kasasaad a kasla saanmo a makontrol. Saan kadi a ti Apo “isu a namarsua kadagiti langlangit, ken … isu a nangpalawa iti daga, ken … isu a mangited iti anges kadagiti tao iti rabawna”? (Isaias 42:5). Saan kadi a nabilbileg Isuna ngem iti Babilonia, ngem iti basol, ngem iti ania man a manglapped kenka a balud? “Agsublika kaniak,” impakaasina, “Ta siak sinubbotka” (Isaias 44:22). Mabalinna ti mangagas, mangisubli, mangpapigsa, mamakawan, ken mangliwliwa—ania man ti kasapulan para kadakayo, iti kasasaadyo, tapno masubbot.

Tapno masursuro no kasano nga inyarig da Nephi ken Jacob ti Isaias 48–49 kadagiti taoda, kitaen iti 1Nephi22 ken 2Nephi6.

Ladawan

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Isaias 40–49

Maliwliwanak ni Jesucristo ken mangted kaniak iti namnama.

Mabalin a makaup-upay, uray pay makadadael para kadagiti Israelita a nakatakuat iti bagbagida a naibalud iti Babilonia. Nalabit nga adu ti nasdaaw no napukawdan iti agnanayon ti lugarda kas napili, ken natulagan a tattao ti Dios. Bayat ti panangbasam iti Isaias 40–49, sapulem dagiti binatog a mabalin a nakaipaay iti liwliwa ken namnama. Para iti tunggal binatog a masarakam, utobem ket isuratmo no ania ti mabalin a kinuna ti Apo kenka kadagitoy a bersikulo. Adtoy dagiti sumagmamano a bersikulo a mabalin nga irugim:

Kasano a maibinglaymo dagitoy a mensahe iti maysa a tao nga agkasapulan iti pammaregta wenno namnama? (kitaen iti Isaias 40:1–2).

Kitaen met iti Jeffrey R. Holland, “A Perfect Brightness of Hope,” Ensign wenno Liahona, Mayo 2020, 81–84.

Babaen ti panagtungpal iti Apo, maaddaantayo iti “talna … kas koma iti maysa a karayan” (Isaias 48:18).

Isaias 40:3–8, 15–23; 42:15–16; 47:7–11

Dakdakkel ti bileg ti Dios ngem iti nainlubongan a bileg.

Inulit-ulit nga impalagip ni Isaias kadagiti taona maipapan iti awan kaaspingna a bileg ti Dios, a kas maidilig iti nailubongan a bileg a nanglawlaw kadakuada. Sapulem daytoy a mensahe bayat ti panangbasam iti Isaias 40:3 8, 15–23; 42:15–16; ken 47:7–11 (kitaen a ti kapitulo 47 ket maiturong iti nangibalud iti Israel, ti Babilonia). Ania ti isuro dagitoy a binatog kadakayo maipapan kadagiti nailubongan a banag? Ania ti isuro kenka dagitoy maipapan iti Dios? Utobem no apay daytoy a mensahe ti mabalin a napateg kadagiti Judio iti pagbaludan. Apay a napateg daytoy kenka?

Kitaen met iti “Abide with Me!” Hymns, no.166.

Isaias 41:8–13; 42:1–7; 43:9–12; 44:21–28; 45:1–4; 48:10; 49:1–9

“Sika ti katulongak.”

Iti intero nga Isaias 40–49 agsao ti Apo maipapan iti “katulonganna” ken dagiti “saksina.” Iti sumagmamano a binatog kasla maitudo dagitoy a balikas ken ni Jesucristo (kitaen iti Isaias 42:1–7), maitudo dagiti dadduma iti balay ti Israel (kitaen iti Isaias 45:4), ken maitudo dagiti dadduma ken ni Ari Ciro, a nangipalubos kadagiti Judio nga agsubli iti Jerusalem ket bangonenda manen iti templo (kitaen iti 44:26–45:4). Iti tunggal kasasaad, nupay kasta, mabalinmo met nga ibilang no kasano a mayaplikar dagiti binatog kas maysa a katulongan ken maysa a saksi ti Apo. Kas pagarigan, utobem dagiti saludsod kas kadagitoy:

Isaias 41:8–13; 42:6; 44:21. Ania ti inyawag kenka ti Apo nga aramidem? Ibilangmo dagiti pormal nga awag iti Simbaan a kas met iti dadduma pay a pagrebbengan iti katulagan nga agserbi Kenkuana. Kasano a tulongannaka ken “petpetanna ta imam” (Isaias 42: 6) bayat ti panagserbim? Kasano a “ginugorannaka” tapno agbalin a katulonganna? (kitaen met iti Isaias 48:10).

Isaias 43:9–12. Iti ania a kaipapanan a maysaka a saksi ni Jesucristo? Ania dagiti padas iti biagmo a nangipakita kenka nga Isu ti Mangisalakan?

Isaias 49:1–9. Ania dagiti mensahe a masarakam kadagitoy a bersikulo a makatulong no kasla “maipaay iti awan, ken kinaubbaw” dagiti panangkagumaanmo ken panangserbim? (bersikulo4).

Kitaen met iti Mosiah 18:9; Henry B. Eyring, “A Child and a Disciple,” Ensign wenno Liahona, Mayo 2003, 29–32.

Ladawan

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Isaias 40:3–4.Tapno masukisok no ania ti kayat a sawen ti “isaganayo … ti dalan ni Jehova,” mabalin a palintegen ti pamiliam ti maysa a banag a nakillo, dalusan ti narugit a suelo, agaramid iti nalinis a pagnaan iti nabato a daga. Mabalinmo pay nga ipakita dagiti ladawan da Juan Bautista ken Joseph Smith (kitaen iti Libro ti Arte ti Ebanghelio, dagiti num. 35,87). Kasano nga isaganada iti dalan para iti yaay ti Apo? (kitaen iti Lucas 3:2–18; Doktrina ken Katulagan 135: 3). Kasano a makatulongtayo a mangisagana iti dalan para Kenkuana? (kas pagarigan, kitaen iti Doktrina ken Katulagan 33:10).

Isaias 40:28; 43:14–15; 44:6.Ania dagiti nagan wenno pangawag ken ni Jesucristo a masarakantayo kadagitoy a bersikulo? Ania ti isuro kadatayo ti tunggal nagan maipapan Kenkuana?

Isaias 41:10; 43:2–5; 46:4.Naipakita dagitoy a bersikulo iti himno a “How Firm a Foundation” (Hymns, no. 85.). Mabalin a magustuan ti pamiliam nga aggigiddan iti panagkanta kadagiti himno ken panagsapul kadagiti ragup ti balikas iti daytoy a maipada kadagiti ragup ti balikas kadagitoy a bersikulo. Ania ti isuro kadatayo dagitoy a ragup ti balikas maipapan ken ni Jesucristo?

Isaias 44:3–4; 45:8.Kalpasan ti panangbasa kadagitoy a bersikulo, mabalin ti pamiliam ti agsibug iti mula bayat ti panangisaritam maipapan kadagiti bendision nga imbukbok ti Apo kadakuada. Ania ti mapasamak iti maysa a mula no sibugantayo daytoy? Ania ti namnamaen ti Apo kadatayo no bendisionannatayo?

Isaias 48:17–18.Ibilang ti panangipakita kadagiti ladawan wenno video dagiti karayan, ken dagiti dalluyon ti taaw. Kasano a maipada ti talna iti maysa a karayan? Kasano a maipada ti kinalinteg kadagiti dalluyon?

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Naisingasing a kanta: “How Firm a Foundation,” Hymns, no. 85.

Panangpadur-as iti Bukod a Panagadal

Ilawlawag ti kaipapanan dagiti balikas. Padasem ti panangkita kadagiti depinision dagiti balikas iti nasantuan a kasuratan a dimo maawatan—uray pay dagiti balikas a panagkunam a dimo maawatan. No dadduma makatulong kenka dagiti depinision a mangbasa iti maysa a bersikulo iti naiduma ken manggun-od kadagiti baro a naespirituan a pannakaammo ken pannakaawat.