Sagrado a Kakaywan, ni Brent Borup

Septiembre 12–18

Isaias 13–14; 24–30;35

“Maysa a Nakaskasdaaw nga Aramid ken Datdatlag,”

Insuro ni Presidente Bonnie H. Cordon, “Lawlawagan dagiti nasantuan a kasuratan dagiti panunottayo, taraonanna dagiti espiritutayo, sungbatanna dagiti saludsodtayo, nayonanna ti panagtalektayo iti Apo, ken tulongannatayo a mangisentro iti biagtayo Kenkuana” (“Trust in the Lord and Lean Not,” Liahona, Mayo 2017,7).

Isuratmo dagiti Impresionmo

Mangballaag maipapan kadagiti bunga ti basol ti maysa kadagiti banag nga idawat ti Apo kadagiti propeta nga aramidenda. Iti kaso dagiti propeta iti Daan a Tulag, masansan a kaipapanan daytoy ti panangibaga kadagiti nabileg nga agturay kadagiti naindaklan a pagarian a nasken nga agbabawida wenno madadaelda. Maysa daytoy a napeggad nga aramid, ngem saan a nagbuteng ni Isaias, ken nawada dagiti ballaagna kadagiti pagarian ti aldawna—agraman ti Israel, Juda, ken dagiti nailikmut a pagilian (kitaen iti Isaias 13–23).

Nupay kasta, addaan pay ni Isaias iti mensahe ti namnama. Nupay in-inut nga immay dagiti naipadto a pannakadadael kadagitoy a pagarian, nasirmata ni Isaias ti gundaway para iti pannakaisubli ken panangpabaro. Awisen ti Apo dagiti taona nga agsubli Kenkuana. Aramidenna a “ti sumilsilap a darat agbalinto a libtong, ken ti mawaw a daga agbalinto nga ub-ubbog ti danum” (Isaias 35:7). Aramidenna a “maysa a nakaskasdaaw nga aramid ken datdatlag” (Isaias 29:14), a mangisubsubli iti Israel dagiti bendision ti inkarina kadakuada. Saan a nagbiag ni Isaias wenno asino man iti dayta a panawen a mangkita iti daytoy nakaskasdaaw nga aramid. Ngem makitkitatayo ti kangrunaan a pannakaipatungpalna iti agdama. Kinapudnona, pasettayo daytoy!

Dagiti Kapanunotan para iti Bukod a Panagadal iti Nasantuan a Kasuratan

Isaias 13:1–11, 19–22; 14:1–20

Matnagto dagiti nadangkes a pagarian iti lubong ken dagiti agtuturayda.

Maawagan tiIsaias 13–14 iti “sagabaen (naimpadtuan a mensahe maipapan iti) Babilonia (Isaias 13:1). Naminsan a maingel a pagarian nga addaan iti maysa a nabileg nga agturay, ti Babilonia ita maibilang a nagkauna a pakasaritaan. No kasta apay a napateg ti mensahe iti Babilonia kadatayo iti agdama? Kadagiti nasantuan a kasuratan, isimbolo iti Babilonia ti kinapalangguad, nainlasagan, ken basol, ken iti agdama napalawlawantayo amin kadagitoy. Panunotem ti maipapan iti daytoy a simbolismo bayat ti panangbasam iti Isaias 13:1–11, 19–22; 14:1–20. Mabalinmo met a padasen dagiti saludsod kas kadagitoy:

• Kasano a maipada dagiti ballaag ni Isaias iti Babilonia maipapan iti lubong sakbay ti Maikadua a Yaay ti Mangisalakan? (kitaen iti Isaias 13:1–11; Doktrina ken Katulagan 45: 26–42).

• Ania dagiti pagpapadaan a makitam iti kinapalangguad ti ari ti Babilonia ken ti kinapalangguad ni Satanas? (kitaen iti Isaias 14:4–20; Moises 4:1–4). Ania dagiti ballaag a masarakam para iti bagim kadagitoy a bersikulo?

• Kasano a mangted ti Mangisalakan iti “panaginanam iti ladingitmo, ken iti riribukmo”? (Isaias 14:3).

Umay Manen Tapno Agturay ken Agari, ni Mary R. Sauer

Isaias 24:21–23; 25:6–8; 26:19; 28:16

Dagiti sinurat ni Isaias ti mangitudo kaniak ken ni Jesucristo.

Masansan a mangitudo kadagiti pannursuro ni Isaias iti mision ti Mangisalakan, agraman ti pangsubbot a sakripisiona, Panagungar, ken ti Maikadua a Yaay. Ania nga aspeto ti misionna nga umay iti panunotmo bayat ti panangbasam kadagiti sumaganad a bersikulo: Isaias 24:21–23; 25:6–8; 26:19; 28:16? Ania dagiti dadduma pay a binatog iti panagkunam a mangipalagip kenka maipapan iti Mangisalakan?

Kitaen met iti Isaias 22:22–25.

Isaias 24:1–12; 28:7–8; 29:7–10; 30:8–14

Ti ikakalilis kaipapananna ti panangtallikud iti Apo ken dagiti propetana.

Tapno mangballaag maipapan kadagiti bunga ti itatallikud iti Apo ken panangilaksid kadagiti propetana, inusar ni Isaias iti nadumaduma a metapora. Iraman dagitoy ti awan nagyanna a daga (Isaias 24:1–12), panagbarbartek (Isaias 28: 7–8), mabisinan ken mawaw (Isaias 29:7–10), ken nadadael a pader wenno pagikkan (Isaias 30:8–14). Batay iti no ania ti nabasam kadagitoy a bersikulo, apay a napateg nga agtungpal kadagiti katulagantayo? Ibilangmo no ania ti ar-aramidem tapno agtalinaed a napudno iti Apo ken kadagiti katulonganna.

Kitaen met iti M.Russell Ballard, “Stay in the Boat and Hold On!” Liahona, Nob. 2014, 89–92; Gospel Topics, “Apostasy,” topics.ChurchofJesusChrist.org.

Isaias29; 30:18–26;35

Maisubli ti Apo dagiti banag a napukaw wenno nadadael.

No tumallikud dagiti tao wenno gimong manipud iti Apo, kayat ni Satanas a panunotentayo a saan a maisublin dagiti bunga. Nupay kasta, inladawan ni Isaias ti sumagmamano kadagiti nakaskasdaaw a banag nga aramidento ti Apo no agbabawi dagiti tao ken umasidegda Kenkuana. Ania ti masursurom manipud iti Isaias 29:13–24; 30:18–26;35 maipapan iti Apo, iti ayatna, ken iti bilegna?

Maysa a wagas a nangipakitaan ti Apo iti bilegna iti panawentayo ket babaen ti Pannakaisubli ti ebangheliona. Naglaon tiIsaias29 iti sumagmamano a binatog a maipada kadagiti pasamak kadayta a Pannakaisubli. Kas pagarigan:

• Idilig ti Isaias 29:11–12 iti 2Nephi 27:6–26 ken Joseph Smith—Pakasaritaan 1:63–65.

• Idilig ti Isaias 29:13–14 iti Doktrina ken Katulagan4 ken Joseph Smith—Pakasaritaan 1:17–19.

• Idilig ti Isaias 29:18–24 iti panid ti paulo ti Libro ni Mormon.

Ania dagiti kapanunotan wenno impresion nga adda kenka maipapan iti Pannakaisubli ti ebanghelio bayat ti panangbasam kadagitoy a binatog?

Kitaen met iti “The Restoration of the Fulness of the Gospel of Jesus Christ: A Bicentennial Proclamation to the World” (ChurchofJesusChrist.org).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Isaias 25:4–9.Napasaran kadin ti pamiliam dagiti bendision ti natalged a pagkamangan kabayatan ti maysa a bagyo wenno manglinong iti napudot a kalgaw nga aldaw? (kitaen iti bersikulo4). Isaritam maipapan iti daytoy bayat ti panangbasam kadagitoy a bersikulo ken dadduma pay a pakailadawan ti Apo a masarakan iti Isaias 25:4–9. Kasano a maipada ti Apo kadagitoy a banag?

Isaias 25:8–9; 26:19.Ti panangipakita kadagiti ladawan ti Mangisalakan iti Getsemani, iti krus, ken kalpasan ti Panagungarna ket makatulong iti pamiliam a mangkita kadagiti koneksion iti nagbaetan dagitoy a bersikulo ken ni Jesucristo (kitaen iti Libro ti Arte ti Ebanghelio, dagiti num. 56, 57, 58,59). Awisem ti pamiliam a mangibinglay no apay nga “agrag-oda iti pannakaisalakanna” (Isaias 25:9).

Isaias 29:11–18.Makatulong dagitoy a bersikulo iti pamiliam a paglilinnawagan dagiti nakaskasdaaw nga aramid ken datdatlag” (bersikulo14) ti Pannakaisubli ti ebanghelio ken idadateng ti Libro ni Mormon. Apay a nakaskasdaaw dagitoy a banag ken datdatlag kadatayo? Awisem dagiti miembro ti pamilia a mangbirok kadagiti banag iti pagtaenganyo a mangibagi kadagiti nakaskasdaaw a bendision ti Pannakaisubli.

Isaias35.Mabalin a magustuan ti pamiliam ti panagdrowing kadagiti ladawan dagiti imahe iti daytoy a kapitulo a makatulong kadatayo a makaawat no kasano ti panangbangon ni Jesucristo iti Zion iti aldawtayo. Ania ti masursurotayo manipud kadagitoy nga imahe? Ania ti maaramidtayo a makatulong a mangbangon iti Zion?

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Naisingasing a kanta: “On a Golden Springtime,” Children’s Songbook,88.

Panangpadur-as iti Panangisurotayo

Palugodam dagiti ubbing a mangipakita iti kinamanagpartuatda. No agpartuat dagiti ubbing iti maysa a banag a mainaig iti maysa a pagbatayan ti ebanghelio, tulongam ida a makaawat a nasaysayaat iti pagbatayan. Palugodam ida nga agbangon, agdrowing, agkolor, agsurat, ken agpartuat. (Kitaen iti Panangisuro iti Wagas ti Mangisalakan,25.)

“Adtoy, daytoy ti Diostayo; isu ti inur-uraytayo, ket isalakannatayto” (Isaias 25:9). James Tissot (French, 1836–1902). Babai, Adtoy ti Anakmo (Stabat Mater), 1886–1894. Opaque watercolor over graphite on gray wove paper, Image: 11 11/16 x 6 in. (29.7 x 15.2 cm). Brooklyn Museum, Purchased by public subscription, 00.159.300