Ipadto ni Propeta Isaias ti Pannakayanak ni Cristo, ni Harry Anderson

Septiembre 5–11

Isaias 1–12

“Ti Dios Isu ti Pakaisalakanak”

Sapulem dagiti naespirituan a pannarabay bayat ti panagadalmo. Kasayaatan a maawatan dagiti balikas ni Isaias no “mapnotayo iti espiritu ti pammadto,” kas iti insuro ni Nephi (2Nephi 25:4).

Isuratmo dagiti Impresionmo

Uray no daytoy ti umuna a gundaway a panagbasam iti libro ni Isaias, mabalin a masarakam dagiti binatog a kasla pamiliar. Dayta ket gapu ta, kadagiti amin a propeta ti Daan a Tulag, ni Isaias ti maysa a kaaduan a nagadawan iti dadduma pay a libro ti nasantuan a kasuratan, agraman ti Mangisalakan Mismo. Masansan pay a makita dagiti balikas ni Isaias kadagiti himno ken dadduma pay a sagrado a musika. Apay a masansan unay a maadaw ti balikas ni Isaias?

Awan duadua a paset ti gapu ket addaan maysa a sagut ni Isaias iti panangyebkas iti balikas ti Dios iti nalawag, nakallalagip a pagsasao. Ngem ad-adda pay nasursurok ngem iti dayta. Pinaregta ni Isaias dagiti propeta para kadagiti kaputotan gapu ta naglabes dagiti kinapudno nga insurona iti bukodna a kaputotan—dagiti Israelita a nagbibiag iti nagbaetan ti 740 ken 701BC. Akemna ti manglukat kadagiti matatayo iti naindaklan nga aramid ti pannakasubbot, a dakdakkel nga amang ngem iti maysa a pagilian wenno maysa a tiempo ti panawen. Manipud ken ni Isaias, naammuan ni Nephi ken dagiti taona, nupay nailasin manipud iti dadduma iti Israel, ket paset pay laeng dagiti natulagan a tao ti Dios. Iti Isaias, nasarakan dagiti mannurat iti Baro a Tulag dagiti padto maipapan iti Mesias a maipatpatungpalen iti mismo nga imatangda. Ket iti Isaias, nasarakan ni Joseph Smith ti pammaregta para iti aramid iti ud-udina nga aldaw a panaguummong ti Israel ken panangbangon iti Zion. No basaem ti Isaias, anianto ti masarakam?

Para iti ad-adu pay maipapan ken ni Isaias ken dagiti sinuratna, kitaen iti “Isaias” iti Pangiwanwan iti Nasantuan a Kasuratan. Para iti impormasion maipapan iti panawen a nagbiag ni Isaias, kitaen iti 2Ar-ari 15–20 ken 2Cronicas 26–32.

Dagiti Kapanunotan para iti Bukod a Panagadal iti Nasantuan a Kasuratan

Isaias 1–12

Kasano a nasaysayaat a maawatak dagiti pannursuro ni Isaias?

Maipanggep kadagiti sinurat ni Isaias, kinuna ti Mangisalakan, “Amirisenyo dagitoy banag a sireregta; agsipud ta napateg dagiti balikas ni Isaias” (kitaen iti 3 Nephi 23:1–3). Ngem iti adu, mabalin a narigat a maawatan ti Isaias. Dagitoy ti sumagmamano a singasing a makatulong kenka a mangsapul iti dakdakkel a kaipapanan kadagiti balikas ni Isaias:

• Utobem dagiti simbolo ken metapora nga inusar ni Isaias. Kas pagarigan, utobem no ania iti panagkunam a kayat ni Isaias a pannakisarita idi insuratna maipapan iti kaubasan (kitaen iti Isaias 5:1–7), dagiti dandanum ti Siloe (kitaen iti Isaias 8:5–10), ti wagayway (kitaen iti Isaias 5:26), ken maysa a wagayway (kitaen iti Isaias 11:10, 12).

• Para iti tunggal kapitulo a basaem, saludsodem iti bagim, “Ania ti masursurok maipapan ken ni Jesucristo?” (kitaen iti 1Nephi 19:23).

• Sapulem dagiti topiko nga adda pakainaiganda iti aldawtayo, kas iti biag ken mision ni Jesucristo, ti pannakasayyasayya ken pannakauummong ti Israel, dagiti maudi nga aldaw, ken ti Milenio. Mabalinmo pay ti mangpatalinaed iti listaan dagiti reperensia manipud ken ni Isaias a mangisuro maipapan kadagitoy a topiko.

• Usarem dagiti tulong iti panagadal no adda a sidadaan, a kas iti diksionario, footnote iti Biblia, dagiti paulo ti kapitulo, ken ti Pangiwanwan iti Nasantuan a Kasuratan.

Kitaen met iti 2Nephi 25:1–8.

Isaias1; 3;5

“Isardeng nga agaramid iti dakes.”

Agtultuloy a binallaagan ni Isaias ti Pagarian ti Juda maipapan iti naespirituan a kasasaadda. Kalpasan ti panangbasam iti Isaias1, 3, ken5, kasano nga iladawam ti naespirituan a kasasaad dagiti tao? Ania dagiti ballaag a masarakam a kasla mayaplikar iti aldawtayo?

Kas nayon kadagiti ballaag, mabalinmo met nga isurat dagiti mensahe ti namnama para iti managbasol nga Israel (kitaen, kas pagarigan, iti Isaias 1:16–20, 25–27; 3:10). Ania ti masursurom maipapan iti Apo manipud kadagitoy a mensahe?

Isaias2; 4; 11–12

Agtrabahonto ti Dios iti naindaklan nga aramid iti ud-udina nga aldaw.

Adu kadagiti sinurat ni Isaias ti padto nga addaan iti nalawag a kaipapanan para iti aldawtayo. Ania kadagiti pangiladawan ni Isaias iti ud-udina nga aldaw iti kapitulo2; 4; 11–12 ti nangnangruna a makaparegta kenka? (Ti Doktrina ken Katulagan 113:1–6 mangipaay kadagiti makatulong a nalawag a pannakaammo ken pannakaawat maipapan iti Isaias11.) Ania ti nasursurom maipapan ti panaguummong ti Israel ken pannakasubbot ti Zion? Ania ti mariknam a makaparegta nga aramidem kalpasan a mabasam dagitoy a kapitulo?

Kitaen met iti Isaias 5:26; 10:20.

Isaias6

Inawagan ti Dios dagiti propeta.

Iti kapitulo6, insalaysay ni Isaias ti awagna nga agbalin a maysa a propeta. Bayat ti panangbasam iti daytoy a kapitulo, ania ti makaawis iti riknam maipapan iti no ania ti napadasan ni Isaias? Kasano a makaimpluensia daytoy a kapitulo iti wagas a panagpanunotmo maipapan iti Apo, dagiti propetana, ken ti aramid a nakaawaganda nga aramiden?

“Ta nayanak ti maysa nga ubing kadatayo, maysa nga anak a lalaki ti naited kadatayo” (Isaias 9:6).

Isaias 7–9

Impadto ni Isaias ni Jesucristo.

Iti nasapa a panangministro ni Isaias, ti Pagarian ti Israel (maawagan pay iti Efraim) nangbukel iti ragup iti Siria a mangsalaknib iti bagina maibusor iti Asiria. Tinarigagayan ti Israel ken Siria ti mangpilit ken ni Ahaz, ti ari ti Juda, tapno makitipon iti ragupda. Ngem impadto ni Isaias a matnag ti ragup ket binalakadanna ni Ahaz nga agtalek iti Apo (kitaen iti Isaias 7–9, nangnangruna iti Isaias 7:7–9; 8:12–13).

Bayat panangbalakad ni Isaias ni Ahaz, nagaramid iti sumagmamano a nalatak a padto, kas kadagiti masarakan iti Isaias 7:14; 8:13–14; 9:2, 6–7. Idinto a saan a nalawag a naan-anay no ania ti kaipapanan dagitoy a padto iti panawen ni Ahaz, silalawag a mayaplikarda ken ni Jesucristo (kitaen met iti Mateo 1:21–23; 4:16; 21:44; Lucas 1:31–33). Ania ti masursurom maipapan iti Mangisalakan manipud kadagitoy a bersikulo?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Isaias 1:16–18.Tapno makatulong kadagiti miembro ti pamilia a makaawat kadagitoy a bersikulo, mabalinyo a basaen ti benneg ti “Sumagmamano Kadatayo ti Makarikna a Ditayo Makapagbalin a Nasayaat iti Kaano Man” manipud iti mensahe ni Sister Sharon Eubank “Cristo: Ti Silaw nga Agraniag iti Kasipngetan” (Ensign wenno Liahona, Mayo 2019, 75). Wenno mabalinmo nga ipakita no kasano a maikkat dagiti mansa manipud iti kawes. Kasano a maigiddiat ti mensahe ti Apo kadagitoy a bersikulo iti no ania ti kayat ni Satanas a patientayo?

Isaias 2:1–5.Mabalin a pumili dagiti miembro ti pamilia iti maysa kadagitoy a bersikulo ket idrowingda no ania ti iladawan daytoy. Ania ti isuro kadatayo ti templo maipapan kadagiti wagas ti Apo? Kasano a mabendisionantayo no “magnatayo iti lawag ni Jehova”? (Isaias 2:5).

Isaias 4:5–6.Ania ti ikari ti Apo kadatayo kadagitoy a bersikulo? Ania ti mabalin a kayat a sawen dagitoy a kari? Kasano ti panangipatungpalna kadagitoy? (Kitaen met iti Exodo 13:21–22.)

Isaias 7:14; 9:1–7.Iti panangusarmo kadagiti drowing wenno ladawan manipud kadagiti magasin ti Simbaan, mabalinmo ti mangaramid iti maysa a poster a mangipakita iti sumagmamano kadagiti banag a masursurotayo maipapan ken ni Jesucristo manipud kadagitoy a bersikulo.

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Naisingasing a kanta: “High on the Mountain Top,” Hymns, no. 5.

Panangpadur-as iti Bukod a Panagadal

Agpatulongka iti Apo. Tapno maawatantayo dagiti nasantuan a kasuratan, kasapulantayo ti bukod a paltiing. Inkari ti Apo, “Agdawatkayo ket maikkankayto, agsapulkayo ket makasarakkayto, umawagkayo ket mailukatankayto” (Mateo 7:7).

Insuro ni Isaias a ti tabernakulo agbalinto a “pagsalindegan” ken “paglinongan no agbagyo ken agtudo” (Isaias 4:6).Templo iti Idaho Falls Idaho