lalaki nga agad-adal kadagiti nasantuan a kasuratan

Agosto 29–Septiembre4

Dagiti Proverbio 1–4; 15–16; 22; 31; Eclesiastes 1–3; 11–12

“Ti Panagbuteng ken Jehova Isu ti Punganay ti Pannakaammo”

Ibilangmo no kasano a makatulong ti panagadalmo iti Dagiti Proverbio ken Eclesiastes a “yallingagmo dagita lapayagmo iti kinasirib, ken ikapetmo ita pusom iti pannakaawat” (Dagiti Proverbio 2:2).

Isuratmo dagiti Impresionmo

Iti umuna a kapitulo ti libro dagiti Proverbio, masarakantayo dagitoy a balikas: “Anakko, denggem ti pannursuro toy amam, ket dika bay-an ti linteg ni inam” (Dagiti Proverbio 1:8). Mabalin a makita ti libro dagiti Proverbio kas maysa a koleksion dagiti nainsiriban a balikas manipud iti managayat a nagannak, a ti kangrunaan a mensahena ket dumteng dagiti bendision ti kappia ken panagrang-ay kadagiti agsapul iti pagsiriban—nangnangruna iti kita ti pagsiriban nga idiaya ti Dios. Ngem ti libro dagiti Proverbio ket sarunuen ti libro ti Eclesiastes, a kasla makuna a, “saan a kasta ti kasimplena.” Napaliiw ti Mangaskasaba a naadaw iti Eclesiastes nga “impapuso[na] nga inammo ti sirib” ngem nasarakanna latta ti “panagsagaba ti espiritu” ken “nawadwad a ladingit” (Eclesiastes 1:17–18). Iti nadumaduma a wagas, agsaludsod ti libro, “Mabalin kadi nga adda pudno a kaipapanan iti lubong a ti tunggal maysa a banag ket kasla awan kaes-eskanna, saan nga agbayag, ken mapagduaduaan?”

Ket ngem, idinto a kumita iti biag dagiti dua a libro manipud iti nadumaduma a pannirigan, isuroda ti agpada a kinapudno. Ipakdaar ti Eclesiastes: “Daytoy isu ti pagbanagan ti amin a panggep: amin nangngegan: Agbutengka iti Dios, ket salimetmetam dagiti bilbilinna: ta daytoy isu ti dagup ti rebbeng ti tao” (Eclesiastes 12:13). Daytoy met la a pagbatayan ti masarakan iti intero a libro dagiti Proverbio: “Agtalekka iti Apo iti amin a pusom. … Saanka koma a masirib kadagita matam met laeng: agbutengka ken Jehova” (Dagiti Proverbio 3:5, 7). Ania man ti mapasamak iti biag, uray no kasla makatikaw ken maipaspasarak, kanayon a nasaysayaat no agtalektayo ken ni Apo a Jesucristo.

Para iti pakagupgopan dagitoy a libro, kitaen iti “Proverbio, libro dagiti” ken “Eclesiastes” iti Pangiwanwan iti Nasantuan a Kasuratan.

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Dagiti Proverbio 1–4; 15–16

“Yallingagmo dagita lapayagmo iti kinasirib.”

Napno ti libro dagiti Proverbio kadagiti nalawag a pannakaammo ken pannakaawat maipapan iti kinasirib. Ibilangmo ti panangmarka iti balikas a “kinasirib” ken dagiti mainaig a balikas, a kas iti “pannakaammo” ken “pannakaawat,” no masarakam dagitoy kadagiti kapitulo 1–4 ken 15–16. Kasano nga apektuan dagitoy a kapitulo ti wagas a panangpanunotmo maipapan iti kinasirib? Batay iti no ania ti masarakam, kasano nga iladawam ti kinasirib a “ti Apo mangted”? (Dagiti Proverbio 2:6). Ibilangmo no kasano nga agsapsapulka iti tulong ti Apo tapno agbalin a “masirib iti pusona” (Dagiti Proverbio 16:21). Ania dagiti bendision a sumangbay manipud iti sirib ti Dios?

Kitaen met iti Dagiti Proverbio 8–9; Mateo 7:24–27; 25:1–13.

Dagiti Proverbio 1:7; 2:5; 16:6; 31:30; Eclesiastes 12:13

Ania ti “panagbuteng iti Apo”?

Inlawlawag ni Elder DavidA. Bednar: “Saan a kas iti nainlubongan a buteng a mangparnuay iti pakaseknan ken gagar, ti nadiosan a buteng ti maysa a pagtaudan ti talna, namnama, ken panagtalek. … [Daytoy] ti manglikmut iti nauneg a rikna ti panagraem, panagdayaw, ken siddaaw para iti Apo a ni Jesucristo; panagtungpal kadagiti bilinna; ken panangnamnama iti Maudi a Panangukom ken hustisia iti imana. … Ti nadiosan a panagbuteng ket panagayat ken panagtalek Kenkuana” “Therefore They Hushed Their Fears,” Liahona, Mayo 2015, 48–49).

Kitaen met iti Dagiti Proverbio 8:13.

Dagiti Proverbio4

“Utobem ti pagnaan dagita saksakam.”

Dagiti Proverbio 4 iladawanna ti kinasirib ken kinalinteg kas maysa a “dana” wenno “dalan” (kitaen met iti Dagiti Proverbio 3:5–6). Bayat ti panangbasam iti daytoy a kapitulo, masarakam ti binatog a makatulong kenka a mangutob “ti pagnaan dagita saksakam” (bersikulo26) ken no kasano nga ad-adda a mayasidegnaka dagiti addangmo iti Apo. Kas pagarigan, ania ti isuro dagiti bersikulo 11–12 ken 18–19 maipapan kadagiti bendision ti panangsurot iti umno a dana? Ania ti kayat a sawen dagiti bersikulo 26 ken27 para kenka?

Kitaen met iti 2Nephi 31:18–21.

Dagiti Proverbio 15:1–2, 4, 18,28; 16:24–32

“Ti naalumamay a sungbat pagbaw-ingenna ti pungtot.”

Mabalin a mangparegta kenka ti sumagmamano kadagiti proverbio kadagiti kapitulo15 ken16 tapno mapasayaat ti wagas a pannakisaritam kadagiti dadduma, nangnangruna kadagiti ipatpateg. Kas pagarigan, panunotem maipapan kadagiti masinunuo a panawen idi mabalinmo koma nga inusar ti “naalumamay a sungbat” imbes a “makapaladingit a sao” (Dagiti Proverbio 15:1). Kasano a makatulong kenka ti balakad iti Dagiti Proverbio 16:24–32 a mangpanunot maipapan kadagiti balikas nga usarem?

Ibilang daytoy a nalawag a pannakaammo ken pannakaawat manipud ken ni Elder W.Craig Zwick: “Ti maysa a ‘naalumamay a sungbat’ buklenna ti nainrasonan a sungbat—dagiti nadisiplinaan a balikas manipud iti napakumbaba a puso. Dina kayat a sawen a ditayo pulos agsao a direkta wenno mangikompromiso iti kinapudno a mainaig iti doktrina. Mabalin a naalumamay iti espiritu dagiti balikas a mabalin a natibker iti impormasion” (“What Are You Thinking?” Liahona, Mayo 2014,42).

babai a mangpakpakan kadagiti tumatayab iti baybay

Asino ti Makasarak iti Nasagudayan a Babai?II, ni Louise Parker

Dagiti Proverbio 31:10–31

“Ti babai nga agbuteng ken ni Jehova, maidaydayawto.”

Proverbio 31:10–31 iladawanna ti “maysa a nasagudayan a babai,” wenno maysa a babai nga addaan iti naespirituan a pigsa, kabaelan, ken impluensia. Mabalin a padasem ti pananggupgop iti bukodmo a balikas no ania ti kuna ti tunggal maysa kadagitoy a bersikulo maipapan kenkuana. Ania dagiti sumagmamano kadagiti kababalinna a mabalinmo a tuladen?

Eclesiastes 1–3;12

Saan nga agpaut ti biag iti daga.

Apay a napateg a laglagipenyo nga iti daytoy a lubong, kas ipatalged ti Eclesiastes 1–2 , ket “kinabarengbareng” (wenno saan nga agpaut ken masansan nga awan kaes-eskanna)? Ania ti masarakam iti kapitulo12 a mangted iti agnanayon a pateg iti biag?

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Dagiti Proverbio.Mabalin a magustuan ti pamiliam iti panangaramid iti bukodyo a “libro ti dagiti Proverbio”—maysa a koleksion dagiti masirib a balakad manipud kadagiti nasantuan a kasuratan ken propeta iti ud-udina nga aldaw.

Dagiti Proverbio 1:7; 2:5; 16:6; Eclesiastes 12:13–14.Tapno makatulong kadagiti miembro ti pamilia a makaawat iti Dagiti Proverbio 1:7; 2:5; 16:6; Eclesiastes 12:13, mabalin a makatulong a sukatam ti balikas a buteng kadagiti balikas a kas iti panagrukbab, ayat, wenno panagtungpal (kitaen met iti Hebreo 12:28). Kasano nga apektuan daytoy ti wagas a panangpanunottayo maipapan kadagitoy a bersikulo? Kasano a maipakitatayo nga agbutengtayo iti Apo?

Dagiti Proverbio 3:5–7.Tapno makatulong kadagiti miembro ti pamiliam a mangiladawan iti panunotda no ania ti isuro dagitoy a bersikulo, mabalinmo nga awisen ida nga agsadag iti maysa a banag a natibker ken nalagda, kas iti maysa a pader. Kalpasanna mabalinda a padasen ti agsadag iti maysa a banag a saan a natibker, kas iti maysa a sagad. Apay a nasken a “saantayo nga agpannuray iti bukodtayo a pannakaawat”? Kasano a maipakitatayo nga agtalektayo ken ni Jesucristo iti amin a puspusotayo?

Dagiti Proverbio 15:1–2,18; 16:24,32.Kasano nga apektuan dagiti balikastayo ti espiritu iti pagtaengantayo? Nalabit a mabalin nga agsanay dagiti miembro ti pamilia ti panangted iti “naalumamay a sungbat” iti “makapaladingit a sasao” ket padasenda nga usaren no ania ti masursuroda iti pannakipulapolda iti tunggal maysa. Makatulong ti maysa a kanta kas iti “Kindness Begins with Me” (Children’s Songbook,145) a mangpatibker iti daytoy a pagbatayan.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Where Love Is,” Children’s Songbook, 138–39.

Panangpadur-as iti Bukod a Panagadal

Mayaplikar iti amin ti balikas dagiti nasantuan a kasuratan. Sumagmamano a binatog ti nasantuan a kasuratan ti mangitudo laeng iti lallaki wenno babbai laeng (kas iti Dagiti Proverbio 3:13; 31:10). Iti kaaduanna a kasasaad, nupay kasta, dagiti pagbatayan kadagitoy a binatog mayaplikar iti tunggal maysa.

Ni Jesus a mangiturturong iti dua a karnero iti kabakiran

“Iti amin a dalanmo isu ti bigbigem, ket isu iturongnanto dagiti desdesmo” (Dagiti Proverbio 3:6). Isu ti Mangiturong Kaniak, ni Yongsung Kim, havenlight.com