“Agosto 15–21. Dagiti Salmo 49–51; 61–66; 69–72; 77–78; 85–86: ‘Ilawlawagkonto ti Impaayna itoy Kararuak’” Umaykayo, Sumurot Kaniak—Para kadagiti Indibidual ken Pamilia: 2022 Daan a Tulag (2021)
“Agosto 15–21. Dagiti Salmo 49–51; 61–66; 69–72; 77–78; 85–86,” Umaykayo, Sumurot Kaniak—Para kadagiti Indibidual ken Pamilia: 2022
Panangisalakan iti Dayta a Napukaw, ni Michael T. Malm
Agosto 15–21
Dagiti Salmo 49–51; 61–66; 69–72; 77–78; 85–86
“Ilawlawagkonto ti Impaayna Itoy Kararuak”
Ilasin daytoy a balabala ti sumagmamano kadagiti topiko a mainaig iti doktrina a naagapad kadagitoy a salmo. Bayat ti panagadalmo, sumagmamano a balikas, ladawan, wenno kapanunotan ti mabalin a nakaawisan ti pasnekmo. Ania ti mariknam a padpadasen nga isuro ti Apo kenka?
Isuratmo dagiti Impresionmo
Imbinglay dagiti mannurat iti Dagiti Salmo dagiti napalaus a riknada kadagiti daniwda. Insuratda maipapan iti rikna a naupay, a mabutbuteng, ken agbabbabawi. No dadduma, uray pay kasla mariknada a binaybay-an ida ti Dios, ken sumagmamano a salmo ti mangyebkas iti rikna ti pannakaupay wenno pannakapaay. No naaddaankan iti kas kadagitoy a rikna, ti panagbasa kadagiti Salmo ti makatulong kenka a mangammo a saanka nga agmaymaysa laeng. Ngem masarakam pay dagiti salmo a makaparegta kenka no addaanka iti kasta a rikna, gapu ta dinayaw pay dagiti salmista ti Apo para iti kinaimbagna, nasdaawda iti bilegna, ken nagrag-oda iti asina. Ammoda a madagensenan iti lubong iti dakes ken basol ngem ti Apo ket “naimbag, ken sisasagana a mamakawan” (Salmo 86:5). Naawatanda a ti kaadda iti pammati iti Apo saanna a kayat a sawen a dikanto kaano man agkarigatan iti panagdanag, panagbasol, wenno panagbuteng. Kayatna a sawen nga ammom no Asino ti asitgam no aramidem.
Dagiti Kapanunotan para iti Bukod a Panagadal iti Nasantuan a Kasuratan
Umay laeng ti pannakasubbot babaen ken ni Jesucristo.
Adda mensahe tiSalmo 49 para iti “nababa man ken nangato, nabaknang ken napanglaw” (bersikulo 2). Ania koma ti masaom iti daytoy a mensahe? Ania ti mariknam nga inayon ti Salmo 62:5–12 iti dayta a mensahe?
Ti panagbasa kadagitoy a salmo mabalin a mangguyugoy kenka a mangutob kadagiti wagas a nagtalkan ti sumagmamano a tao iti maysa a banag malaksid iti Dios para iti pannakasubbot (kitaen iti Salmo 49:6–7). Kasano nga inaringan ti pammaneknekmo ti biagmo a ti “Dios subbotennanto ti kararua[yo] iti pannakabalin ni tanem”? (bersikulo 15).
Kitaen met iti Dagiti Proverbio 28:6; Alma 34: 8–17.
Babaen iti asi ti Mangisalakan, mapakawannak iti basbasolko.
Dagiti araraw para iti asi iti Salmo 51 naited a pammadayaw ken ni Ari David, a nakabasol iti pannakiabig ken nadawel a pammapatay (kitaen iti 2 Samuel 11). Uray no saan unay a nadagsen dagiti basoltayo, maawatantayo ti panagkasapulan iti asi a naipeksa iti daytoy a salmo. Masursurotayo pay iti maysa a banag maipapan iti no ania ti kaipapanan ti agbabawi. Kas pagarigan, ania dagiti balikas wenno ragup ti balikas iti Salmo 51 a mangisuro kenka maipapan kadagiti galad a kasapulantayo tapno agbabawi? Ania ti masursurom maipapan iti epekto a mabalin nga adda ti Pannubbot ti Mangisalakan iti biagmo?
Mabalinmo a damagen dagiti kasta met la a saludsod bayat ti panangbasam iti Dagiti Salmo 85–86. Mabalinmo pay a sapulen dagiti ragup ti balikas a mangiladawan iti Apo. Kasano a papigsaen dagitoy ragup ti balikas ti pammatim a pakawanennakanto? (kitaen, kas pagarigan, iti Salmo 86:5, 13, 15).
Kitaen met iti Alma 36; Russell M. Nelson, “We Can Do Better and Be Better,” Liahona, Mayo 2019, 67–69; Carole M. Stephens, “The Master Healer,” Liahona, Nob. 2016, 9–12.
Dagiti Salmo 51:13–15; 66:16–17; 71:15–24
Ti pammaneknekko maipapan ken ni Jesucristo ti makatulong kadagiti dadduma nga umasideg Kenkuana.
Utobem no kasano a nagun-odmo ti pammaneknekmo maipapan ken ni Jesucristo ken ti pangsubbot a bilegna. Kalpasanna, bayat ti panagadalmo iti Dagiti Salmo 51:13–15; 66:16–17; 71:15–24, panunotem maipapan no kasano a maawismo dagiti dadduma nga “umay ket kitaen dagiti ar-aramid ti Dios” (Salmo 66:5). Ania ti kayat a sawen kenka ti “sarsaritaenna ti kinalinteg[na] iti agmalmalem””? (Salmo 71:24). Kasano nga ibagamto kadagiti dadduma “ti impaayna iti kararua[m]”? (Salmo 66:16).
Kitaen met iti Mosiah 28:1–4; Alma 26.
Mabalintayo nga ibinglay iti dadduma dagiti pammaneknektayo maipapan ti no ania ti inaramid ti Apo para kadatayo.
Tulongannakto ti Apo iti oras ti pettat a panagkasapulak.
Sumagmamano a salmo ti mangiladawan, iti nalawag a pagsasao, no ania ti rikna ti adayo iti Dios ken ti panagkasapulan unay iti tulongna. Mabalin nga ibilangmo ti panangsapul kadagiti kasta a panangiladawan iti Dagiti Salmo 63:1, 8; 69:1–8, 18–21; 77:1–9. Ania ti masarakam iti Dagiti Salmo 63; 69; 77–78 a nangted kadagitoy a salmista iti pammatalged?
No malidayankayo, kasano a tulonganna a “lagipen dagiti ar-aramid ni Jehova” ken dagiti “nakaskasdaaw a gapuanan[na] idi ugma”? (Salmo 77:1). Sumagmamano kadagita a nakaskasdaaw ti nailadawan iti Salmo 78. Bayat ti panangbasam maipapan kadagitoy, utobem no ania ti makatulong kenka a “maisaad ti inanama[m] iti Dios” (bersikulo 7). Ania dagiti padas manipud iti pakasaritaan ti pamiliam a mangparegta kenka?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Salmo 51:17.Ibilangmo no kasano mabalinmo nga isuro ti pamiliam no ania ti kayat a sawen ti maaddaan iti nasneban a puso. Kas pagarigan, mabalin nga agsisinnublat dagiti miembro ti pamilia iti panangukis iti maysa a banag a natangken ti ukisna, a kas iti itlog wenno nut. Kasano a maipada ti puspusotayo iti dayta nga ukis no dadduma? Kasano a maluktantayo dagiti pusotayo iti Apo? Ti aggigiddan iti panangbasa iti Salmo 51 mabalin a mangted iti sumagmamano a kapanunotan.
-
Salmo 61:2–3.Mabalin a magustuan dagiti miembro ti pamilia ti agdrowing kadagiti ladawan dagiti simbolo kadagitoy a bersikulo ket paglilinnawaganda no kasano a mayarig ni Jesucristo ti natayag a “bato,” “pagkamangan[tayo],” ken “natibker a baluarte.”
-
Dagiti Salmo 71:17; 78:5–7.Ania ti kayat ti Apo kadakayo nga “ipakaammoda … kadagiti kaputotan[yo]? (Salmo 78:5). Nalabit nga ibinglay ti tunggal miembro ti pamilia ti pagarigan dagiti “nakaskasdaaw nga ar-aramid,” ti Apo kas iti estoria iti nasantuan a kasuratan, padas, wenno bukod a pammaneknek, a mangtulong kadakuada a “maisaadda ti inanamada iti Dios” (Dagiti Salmo 71:17; 78:7).
-
Salmo 72.Insurat ni David tiSalmo 72 maipapan iti anakna a ni Solomon, ngem adu ditoy ti mayaplikar met ken ni Jesucristo. Bayat ti panangbasa ti pamiliam iti daytoy a salmo, mabalinda nga igganan ti ladawan ti Mangisalakan no masarakanda dagiti bersikulo a mangipalagip kadakuada maipapan ken ni Jesucristo. Kasano a makatulongtayo a mangipatungpal iti tarigagay a “ti dagup ti daga mapno koma iti dayagna”? (Salmo 72:19; kitaen met iti Doktrina ken Katulagan 65:2).
-
Salmo 85:11.Mangparegta daytoy a bersikulo iti panaglilinnawag maipapan kadagiti pasamak iti Pannakaisubli ti ebanghelio—no kasano a kinapudno ti Libro ni Mormon a “[timmaud] ditoy lubong” ken no kasano a “bimmaba manipud langit” dagiti nailangitan a mensahero (kitaen iti Moises 7:62). Ti video a “Preparation of Joseph Smith: Tutored by Heaven” (ChurchofJesusChrist.org) ti mangiladawan iti sumagmamano kadagitoy a pasamak.
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “I Need Thee Every Hour,” Hymns, no. 98.
Panangpadur-as iti Panangisurotayo
Agusar iti nadumaduma. “Agsapul kadagiti wagas a mabalinmo a mapagduduma dagiti panagkagumaanmo a mangisuro iti ebanghelio. Ti panangaramid iti daytoy ti mangnayonto iti kinabaknang ken kinapintas iti padas. … Ibilangmo no kasano a makaawis iti Espiritu ti musika, estoria, ladawan, ken dadduma pay a kita ti arte” (Panangisuro iti Wagas ti Mangisalakan, 22).
Dika Agduadua, Tomas, ni J. Kirk Richards