“Agosto 8–14. Dagiti Salmo 1–2; 8; 19–33; 40; 46: “Ni Jehova Isu ti Pastorko,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Agosto 8–14. Dagiti Salmo 1–2; 8; 19–33; 40; 46,” Umaykayo, Sumurot Kaniak—Para kadagiti Indibidual ken Pamilia: 2022
Ni Jehova Isu ti Pastorko, ni Yongsung Kim, havenlight.com
Agosto 8–14
Dagiti Salmo 1–2; 8; 19–33; 40; 46
“Ni Jehova Isu ti Pastorko”
Dimo riknaen a limitadoka iti panagpili kadagiti Salmo wenno pagbatayan a naisingasing iti daytoy a balabala. Agpaiwanwanka iti Espiritu kadagiti kinapudno a mangtulong kenka a makarikna nga as-asidegka iti Apo.
Isuratmo dagiti Impresionmo
Ditayo sierto nga ammo no asino ti nagsurat kadagiti Salmo. Sumagmamano ti naiteden a pammadayaw ken ni Ari David, ngem para iti kaaduan kadagitoy, nagtalinaed nga awan nagan [anonymous] dagiti mannurat. Ngem kalpasan ti panangbasa kadagiti Salmo, mabalin a mariknatayo a kasla ammotayo ti puspuso dagiti Salmista, uray pay no ditayo ammo dagiti naganda. Ammotayo a dagiti Salmo ti napateg a paset ti panagdaydayaw dagiti Israelita, ken ammotayo a masansan nga inadaw ti Mangisalakan dagitoy. Kadagiti Salmo, maipaawattayo a silalawag iti kararua dagiti nagkauna a tao ti Dios. Makitatayo no kasano ti nariknada maipapan iti Dios, no ania ti nagburiboranda, ken no kasano a nasarakanda ti kappia. Kas mamatpati iti agdama, iti sangalubongan, usarentayo pay laeng dagitoy a balikas iti panagdaydayawtayo iti Dios. Dagiti mannurat dagiti Salmo kasla mangipaawatda iti kararuatayo ken kasla nasarakdan iti maysa a wagas a pangyebkasanda no kasano ti riknatayo maipapan iti Dios, no ania ti pakaburiborantayo, ken no kasano a masarakantayo ti talna.
Para iti pakagupgopan ti libro dagiti Salmo, kitaen iti “Dagiti Salmo” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Dagiti Salmo 1; 23; 26–28; 46
Isuronatayo dagiti Salmo nga agtalek iti Apo.
Mabalin a madlawmo bayat ti panangbasam kadagti Salmo no kasano ti kasansan nga inyebkas dagiti mannurat ti panagbuteng, panagladingit, wenno panagdanagda. Gagangay dagiti kasta a rikna, uray para kadagti tao nga addaan pammati. Ngem ti mamagbalin a makaparegta kadagiti Salmo ket dagiti pangrisut nga idiayada, agraman ti naan-anay a panagtalek iti Apo. Ibilangmo dagitoy a makaparegta a mensahe bayat ti panagbasam iti Dagiti Salmo 1; 23; 26–28; 46. Siputam dagiti sumaganad, ken isuratmo no ania ti matakuatam:
-
Dagiti awis nga agtalek iti Apo:
-
Dagiti balikas a mangiladawan iti Apo:
-
Dagiti balikas a mangiladawan iti kappia, pigsa, ken dadduma pay a bendision nga ipaayna:
-
Dagiti balikas a mangiladawan kadagiti agtalek Kenkuana:
Itudo dagiti Salmo dagiti panunottayo iti biag ken panagministro ni Jesucristo.
Itudo ti sumagmamano kadagiti Salmo iti mortal a biag ni Jesucristo. Nakita pay dagiti Kristiano iti panawen ti Baro a Tulag dagitoy a pagnaigan— kas pagarigan, nabigbigda iti Salmo 2 ti maysa a pagibasaran iti pannakausig ni Jesus iti sango da Ari Herodes ken Ponsio Pilato (kitaen iti Dagiti Aramid 4:24–30). Ibilang ti panangbasa iti Dagiti Salmo 2 ken 22 kasta met iti Mateo 27:35–46; Lucas 23:34–35; ken Juan 19:23–24. Sapulem dagiti pagnaigan iti nagbaetan dagiti balikas kadagitoy a salmo ken ti biag ti Mangisalakan, ken agtultuloy iti panagsapul kadagiti maipada a pagnaigan bayat ti panagadalmo iti libro dagiti Salmo iti intero a sumaruno a sumagmamano a lawas.
Ipapanmo a maysaka a Judio iti panawen ni Jesus a pamiliarka kadagiti Salmo ket nakitam dagiti pakainaiganda iti biag ti Mangisalakan. Kasano a mabalin a maysa a bendision kenka daytoy a pannakaammo?
Kitaen met iti Dagiti Salmo 31:5; 34:20; 41:9; Lucas 24:44; Hebreo 2:9–12.
“Napno ti daga iti kinaimbag ti Apo.”
Ti panagbasa iti Dagiti Salmo 8; 19; ken 33 mabalin a paregtaennaka a mangibilang iti adu a nakaskasdaaw a pinarsua ti Apo. Ikasom dagiti pampanunotem ken riknam bayat ti panangaramidmo. Kasano a dagiti pinarsua ti Apo “ipalawagda ti dayag ti Dios” kenka? (Salmo 19:1).
Nabileg ti balikas ti Apo, “paragsakenna ti puso.”
Kadagiti Salmo, dagiti balikas a kas pammaneknek, al-alagaden, bilin, ken linlinteg ket mabalin a maibasar iti balikas ti Apo. Laglagipem dayta bayat ti panangbasam iti Salmo 19:7–11. Ania ti isingasing dagitoy a bersikulo kenka maipanggep iti balikas ti Apo? Ania ti isuro ti Salmo 29 maipapan iti timekna? Iti padasmo, kasano a maipada ti balikas wenno ti timek ti Apo kadagitoy a panangiladawan?
Nasken a naespirituan a nadalus ken natarnawtayo a sumrek iti imatang ti Apo.
Agkasapulan iti kinatarnaw ti iseserrek iti imatang ti Apo.
Gapu ta nabangon ti templo iti Jerusalem iti rabaw ti maysa a turod, ti ragup ti balikas a “turod ni Jehova” (Salmo 24:3) mabalin a mangitudo iti templo wenno ti imatang ti Dios. Ania ti inayon daytoy iti pannakaawatmo iti Salmo 24? Ania ti kayat a sawen kenka ti maaddaan iti “nadalus nga im-ima, ken natarnaw a puso”? (Salmo 24:4).
Ania ti isuro ti Dagiti Salmo 26 ken 27 maipapan iti balay ti Apo?
Kitaen met iti Salmo 15; David A. Bednar, “Clean Hands and a Pure Heart,” Liahona, Nob. 2007, 80–83.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Salmo 22.Bayat ti panangbasa ti maysa a miembro ti pamilia iti daytoy a salmo, mabalin a sapulen dagiti dadduma dagiti pagpapadaan iti Mateo 27: 3– 46. Kalpasanna mabalinda nga ibinglay dagiti riknada maipapan ken ni Jesucristo ken ti sakripisiona para kadatayo.
-
Salmo 23.TiSalmo 23 ti pammaregta para iti sumagmamano a himno, a kas iti “The Lord Is My Shepherd” ken “The Lord My Pasture Will Prepare” (Hymns, nos. 108, 109). Nalabit a kayat ti pamiliam ti agkanta iti maysa kadagitoy a himno ken mangilasin kadagiti balikas ti salmo a mabalin a nangparegta kadagiti balikas ti kanta. Wenno mabalin a magustuanda ti agdrowing kadagiti ladawan ti maysa a banag a masarakanda iti salmo wenno himno ken panagpatulong kadagiti miembro ti pamilia a mangpugto kadagiti bersikulo wenno balikas ti kanta a maigiddan kadagiti ladawan. Kasano a kas maysa a pastor kadatayo ti Apo?
-
Salmo 24:3–5.Tapno mayunay-unay ti kinapateg ti kaadda ti nadalus nga ima ken natarnaw a puso, mabalinmo a basaen ti Salmo 24:3–5 idinto a bugguan dagiti miembro ti pamilia dagiti imada. Ania ti mabalin nga ibagi dagiti ima iti daytoy a salmo? Ania ti mabalin nga isimbolo ti puso? Ania ti maaramidtayo tapno naespirituan a madalusanyo dagiti imayo ken mapatarnawtayo ti puspusotayo?
-
Salmo 30:5, 11.Naglaon tiSalmo 30:5 iti kari a “ti sangit mabalin nga agpatnag, ngem ti ragsak umay iti bumigat.” Kasano a pinagbalin ti Apo a rag-o ti lidaytayo? Mabalin a magustuan ti sumagmamano a miembro ti pamilia ti panangyakemda no ania ti iladawan iti bersikulo 11 .
-
Salmo 33.Kitaen no namin-ano a nausar ti balikas nga amin iti daytoy a salmo. Ania ti masursurotayo maipapan iti Apo manipud iti naulit a panangusar iti daytoy a balikas, nangnangruna kadagiti bersikulo 13–15?
-
Salmo 46:10Mabalin nga aramidenyo nga aggigiddan ti maysa a banag a kasapulan dagiti miembro ti pamilia ti “agtalna.” Kasano a ti panagbalin a natalna matulongannakayo a mangam-ammo ti Dios? Ania dagiti gundaway nga adda kadatayo tapno agbalin a natalna ken mangam-ammo ti Dios?
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “The Lord Is My Shepherd,” Hymns, no. 108
Panangpadur-as iti Bukod a Panagadal
Agbalinka a managpartuat. Kas kadagiti Salmo masansan a paregtaen dagiti nasantuan a kasuratan dagiti tao a mangdaydayaw iti Apo kadagiti wagas a managpartuat. No mariknam a natignayka a mangyebkas iti kinapasnekmo babaen iti musika, dandaniw, visual art, wenno maysa a sabali pay a wagas, agtignayka a mayannurot kadagita a rikna. Ibilangmo ti panangibinglay no ania ti aramidem a mangtulong kadagiti dadduma a mangpapigsa iti pammati iti Nailangitan nga Ama ken ni Jesucristo.
Ti Naimbag a Pastor, ni Ken Spencer