“Hulio 25–31. Ester: “Sika Dika Mayeg … iti Kasta a Tiempo kas Itoy’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Hulio 25–31. Ester,” Umaykayo, Sumurot Kaniak—Para kadagiti Indibidual ken Pamilia: 2022
Ester, ni James Johnson
Hulio 25–31
Ester
“Sika Dika Mayeg … iti Kasta a Tiempo kas Itoy”
Bayat ti panangbasam iti Ester, agkiddawka iti pammaregta manipud iti Espiritu a mayannatup kenka, ket isuratmo dagiti impresion a maawatmo.
Isuratmo dagiti Impresionmo
Adu a pasamak iti libro ni Ester ti kasla gasat wenno naiparparna. Kasano a mailawlawagmo no kasano a nagbalin a reyna ti Persia ti maysa nga ulila a babai a Judio iti umno laeng a kanito a mangisalakan kadagiti taona iti pannakapapatay? Ania dagiti gundaway a naigiddato laeng a nangngegan ti kasinsin ni Ester a ni Mardokeo maipapan ti maysa a dakes a gagem a mangpapatay iti ari? Naiparparna kadi a pasamak dagitoy, wenno pasetda iti maysa a nadiosan a plano? Nakita ni Elder Ronald A. Rasband: “No ania ti makita a di napilpili a gundaway ket, kinapudnona, nakitan ti maysa a managayat nga Amatayo iti Langit. … Kaduatayo ti Apo iti babassit a detalye ti biagtayo” (“By Divine Design,” Liahona, Nob. 2017, 56). Mabalin a ditayo kanayon a mailasin ti impluensia ti Apo kadagitoy “babassit a detalye.” Ngem masursurotayo manipud iti padas ni Ester a mabalin a tarabayennatayo iti dalantayo ken isagananatayo a “maipaay iti kasta a tiempo” (Ester 4:14) no makapagbalintayo a ramit iti imana a a mangipatungpal kadagiti panggepna.
Para iti pakagupgopan ti libro ti Ester, kitaen iti “Ester, libro ti” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Maaramidnak ti Apo a maysa a ramit a mangbendision kadagiti dadduma.
Insuro ni Sister Anne C. Pingree: “Tapno agbalin a maysa a ramit kadagiti ima ti Dios ket dakkel a pribilehio ken sagrado a pagrebbengan. Sadino man ti pagnaedantayo, ania man dagiti kasasaadtayo, ania man dagiti kasasaad iti panagasawa wenno edadtayo, kasapulan ti Apo ti tunggal maysa kadatayo a mangipatungpal iti naidumduma a paset[tayo] iti panangbangon iti pagarianna iti daytoy maudi a dispensasion” (“Knowing the Lord’s Will for You,” Liahona, Nob. 2005, 112).
Bayat ti panangbasam iti estoria ni Ester, utobem no kasano a mayaplikar daytoy a palawag kenkuana. Sapulem dagiti wagas a nangaramidan ti Apo a posible ken ni Ester a mangisalakan kadagiti Judio (kitaen, kas pagarigan, iti Ester 2:21–23; 3:10–14; 4:14–16). Kalpasanna utobem no kasano nga inwanwanna ti biagyo iti wagas a mangipalubos kenka tapno mangbendision kadagiti dadduma. Ania dagiti sumagmamano a pasamak wenno pagnaigan a mariknam nga inwanwannaka iti “iti kasta a tiempo kas itoy”? (Ester 4:14). No addaanka iti maysa a bendision ti patriarka, ibilangmo ti panangbasa iti daytoy tapno masursuro ti ad-adu pay maipapan iti ipaaramid ti Apo kenka.
Makaiturong ti kinapalangguad ken ti gura iti pannakadadael.
Iti libro ni Ester, masursurotayo manipud iti kinapudno da Ester ken Mardokeo kasta met ti kinapalangguad ken gura ni Aman. Bayat ti panangbasam iti Ester 3; 5:9–14, ibilangmo ti panangisurat iti rikna, balikas, ken tignay ni Aman. Ania ti ipakaammoda maipapan kenkuana ken dagiti pangguyugoyna? Ania dagiti bunga a nakaipasanguanna? (kitaen iti Ester 7). Ti panagbasa maipapan ken ni Aman ket mangguyugoy kenka a mangamiris no ania ti mangparegta iti riknam ken tignaymo. Naparegtaka kadi nga agaramid iti ania man a panagbalbaliw? Mabalinmo kadi ti umasideg iti Nailangitan nga Ama para iti tulong?
Kitaen met iti Dagiti Proverbio 16:32; Alma 5:28.
Ti panagayuno ti mangipakita iti panagpannurayko iti Apo.
Kitaem dagiti kasasaad a nangiturong ken ni Ester ken iti dadduma pay a Judio tapno agayuno (kitaen iti Ester 3:13; 4:1–3, 10–17). Kasano a maysa a bendision kadakuada ti panagayuno? (kitaen iti Ester 5:2–3; 8:11–12). Apay nga idawat ti Apo kadatayo nga agayuno? (kitaen iti Gospel Topics, “Fasting and Fast Offerings,” topics. ChurchofJesusChrist.org). Ibilangmo no ania ti maaramidmo tapno mapagbalinmo ti panagayuno a a nain-indaklan a bendision iti biagmo.
Kitaen met iti Isaias 58:6–12; Mateo 4:1–4; 17:14–21; “Fasting: Young Single Adult Ward, Amanda” (video), ChurchofJesusChrist.org.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F57%2F71%2F577136ce4cb6e7a645885e64678210cac37977b4%2F577136ce4cb6e7a645885e64678210cac37977b4.jpg/full/!250,/0/default)
Masansan nga agkasapulan iti dakkel a tured ti panagaramid kadagiti umno a banag.
Idi indepensa da Mardokeo ken Ester ti pammatida, insagmakda ti biagda iti peggad. Adda bunga dagiti pilitayo a mabalin a saan a nakarkaro, ngem ti panagaramid iti umno a banag ket mabalin nga agkasapulan latta iti tured. Ania ti nasursurom manipud iti Ester 3:1–4; 4:10–17 maipapan iti kaadda ti tured a mangaramid iti umno a banag? Kitaem dagiti nadumaduma a bunga ti napasaran da Mardokeo ken Ester kalpasan ti panangipakitada iti tured (kitaen iti Ester 3:5–11; 5:1–4). Ania ti kasapulan ti maysa a tao a mangammo maipapan iti Dios tapno agaramid kadagiti pili nga inaramid da Ester ken Mardokeo—tapno agaramid iti umno ania man dagiti bungana?
Ibilangmo dagiti bunga ti panagaramid iti nasayaat, mabalin a kayatmo nga aramaten dagiti natured a balikas ni Ester iti Ester 4:16 iti bukodmo a kasasaad. Kas pagarigan, mabalinmo a sawen iti bagim, “No piliek ti rumbeng, no [mapukawko dagiti gagayyem], [mapukawko dagiti gagayyem].”
Kitaen met iti Thomas S. Monson, “May You Have Courage,” Liahona, Mayo 2009, 123–27.
Ni Ester iti sanguanan ti Ari, ni Minerva K. Teichert
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Ester 1–10.Kalpasan ti panangrebyu iti estoria ni Ester (kitaen iti “Reyna Ester” iti Dagiti Estoria iti Daan a Tulag wenno ti video “For Such a Time as This,” ChurchofJesusChrist.org), mabalin a magustuan ti pamiliam nga agaramid kadagiti simple a sinan-puppet nga addaan iti sumagmamano a karakter (kitaen iti panid ti aktibidad iti daytoy a lawas iti Umaykayo, Sumurot Kaniak—Para iti Primary). Kalpasanna mabalinda nga usaren dagitoy a mangisarita manen iti estoria. Mabalinyo a kansionen ti maysa a kanta maipapan iti panagbalin a natured ken pudno, kas iti “Dare to Do Right” (Children’s Songbook, 158) wenno “Do What Is Right” (Hymns, no. 237). Ania dagiti balikas iti kanta ti mangipalagip kadatayo ken ni Ester?
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Ff0%2F62%2Ff0624b11d720a604385bc7386bf8665116e1c080%2Ff0624b11d720a604385bc7386bf8665116e1c080.jpeg/full/!250,/0/default)
-
Ester 2:5–7.Ania ti masursurotayo manipud iti pagwadan ni Mardekeo maipapan iti panangtulong kadagiti miembro ti pamilia kadagiti panawen ti pannubok? Asino iti pamiliatayo ti agkasapulan iti suportatayo? Agaramidka iti plano a mangtulong kadakuada.
-
Ester 4:15–17.Ti kinatured ni Ester ti mabalin a mangparegta ti pamiliam a paglilinnawagan no kasano ti maaddaan iti tured a mangitakder iti kinapudno kadagiti kasasaad a pakaipasanguanda. Ania ti kayat a sawen ni Ester iti “No mapukawak, mapukawak”? Kasano a mayaplikar dagiti balikasna kadatayo no kasapulantayo ti agbalin a natured? Ti video a “Courage” (ChurchofJesusChrist.org) ti mangted iti sumagmamano a pagarigan.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F73%2Ff8%2F73f8af15c5e711eb8d37e0e6f0f4440258b2ff25%2F73f8af15c5e711eb8d37e0e6f0f4440258b2ff25.jpeg/full/!250,/0/default)
-
Ester 9:26–32.Naipasdek ti fiesta dagiti Judio a Purim a manglagip iti estoria ni Ester. Iti oras ti pannangan iti daytoy a lawas, ibilangmo ti panangibinglay kadagiti estoria maipapan dagiti miembro ti pamiliam, agraman dagiti kapuonam, a nangbendision kadagiti dadduma babaen ti panangitakderda para iti umno kas iti inaramid ni Ester.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Dare to Do Right,” Children’s Songbook, 158.
Panangpadur-as iti Panangisurotayo
Tuladen ti biag ti Mangisalakan. “Ti bileg ti Mangisalakan a mangisuro ken mangparegta kadagiti dadduma ket naggapu manipud iti wagas ti panagbiagna ken ti kita ti kinataona. Ti napaspasnek a panagkagumaanmo nga agbiag a kas ken ni Jesuscristo, ket ad-adda a kabaelamto ti mangisuro a kas Kenkuana” (Panangisuro iti Wagas ti Mangisalakan, 13).
Reyna Ester, ni Minerva K. Teichert, © William ken Betty Stokes