Ladawan ti templo ti Zerubbabel, ni Sam Lawlor

Hulio 18–24

Esdras 1; 3–7; Nehemias 2; 4–6; 8

“Agar-aramidak iti Maysa a Dakkel nga Aramid”

Insuro ni Presidente Ezra Taft Benson, “Ti balikas ti Dios … addaan iti bileg a mangpatibker kadagiti Sant o ken mangigam kadakuada iti Espiritu tapno mapagkedkedanda ti dakes, makakapetda a naimbag iti nasayaat, ken makasarakda iti rag-o iti daytoy a biag” (Teachings of Presidents of the Church: Ezra Taft Benson [2014], 118).

Isuratmo dagiti Impresionmo

Naala a balud dagiti tao a Judio iti Babilonia iti agarup 70 a tawen. Napukawda ti Jerusalem ken ti templo, ken adu ti nakalipaten iti panagkumitda iti linteg ti Dios. Ngem saan a nalipatan ti Dios ida. Kinapudnona, impakdaarna babaen ti propetana, “Siak sarungkarankayonto, ket tungpalekto a nasayaat ti saok kadakayo, a panangipasublik kadakayo” (Jeremias 29:10). Pudno iti daytoy a padto, nagaramid iti Apo iti maysa a wagas a pakapagsublian dagiti Judio iti Apo, ken patanorenna dagiti katulonganna a mangipatungpal iti dakkel nga aramid kadagiti taona (Nehemias 6:3). Iraman dagitoy a katulongan ti maysa a gobernador nga agnagan iti Zerubbabel, a nakaimatang iti pannakabangon manen iti balay ti Apo; ni Ezdras, maysa a saserdote ken ti para surat a nangisubli iti puspuso dagiti tao iti linteg ti Apo; ken ni Nehemias, nga idi agangay nagbalin a gobernador ti Juda a nangidaulo iti aramid ti panangbangon manen kadagiti pangsalaknib a pader iti lawlaw ti Jerusalem. Naipasangoda iti pagsusupadian, siempre, ngem immawat met iti tulong manipud kadagiti saan a ninamnama a pagtaudan. Mabalin a dagiti padasda ti mangipakaammo ken mangparegta kadatayo, gapu ta ar-aramidentayo met ti dakkel nga aramid. Ket kas iti aramidda, adu met ti aramidenyo iti balay ti Apo, ti paglintegan ti Apo, ken ti naespirituan a pannakasaluad a masarakantayo Kenkuana.

Para iti pakagupgopan ti libro ni Esdras ken Nehemias, kitaen iti “Esdras” ken “Nehemias” iti Pangiwanwan iti Nasantuan a Kasuratan.

Dagiti Kapanunotan para iti Bukod a Panagadal iti Nasantuan a Kasuratan

Esdras 1

Paregtaen ti Apo dagiti tao a mangipatungpal kadagiti panggepna.

Kalpasan a pinarmek ti Persia ti Babilonia, ti ari ti Persia, ni Ciro, ket pinaregta ti Apo a mangibaon iti maysa a grupo dagiti Judio iti Jerusalem a mangbangon manen iti templo. Bayat ti panangbasam iti Esdras 1, kitaem no ania ti natallugod nga aramiden ni Ciro a tumulong kadagiti Judio iti daytoy napateg nga aramid. Kasano a makitam ti Apo nga agar-aramid babaen kadagiti lallaki ken babbai iti aglawlawmo, agraman kadagiti saan a miembro ti Simbaanna? Ania iti isingasing kenka daytoy maipapan iti Apo ken ti aramidna?

Kitaen met iti Isaias 44:24–28

Esdras 3:8–13; 6:16–22

Dagiti templo ti makaisangbay kaniak iti rag-o.

Idi sinakup dagiti taga Babilonia ti Jerusalem, tinakawda dagiti napapateg a banag iti templo ket inuramda daytoy (kitaen iti 2 Ar-ari 25:1–10; 2 Cronicas 36:17–19). Kasano iti panagkunam a mabalin a nariknam no maibilangka kadagiti Judio a nakasaksi iti daytoy? (kitaen iti Salmo 137). Kitaem no kasano ti narikna dagiti Judio, kalpasan dagiti dekada, no idi napalubosanda nga agsubli ket bangonenda manen ti templo (kitaen iti Esdras 3:8–13; 6:16–22). Utobem ti bukodmo a rikna maipapan iti templo. Apay a dagiti templo ti pagtaudan ti rag-o? Kasano a maipakitam ti panagyamanmo iti Apo para kadagiti templo?

Para kadagiti kabaruanan a pagarigan ti panagrag-o iti panangbangon kadagiti templo, kitaen kadagiti video “Practice, Celebration, Dedication: Temple Blessings in El Salvador” ken “The Laie Hawaii Temple Youth Cultural Celebration” (ChurchofJesusChrist.org).

Ti templo ti mabalin a pagtaudan ti rag-o iti biagtayo.

Esdras 4–6; Nehemias 2; 4; 6

Makatulongak iti aramid ti Dios a nasapsapa iti baet ti panagsusuppiat.

Manmano a masuppiat ti aramid ti Apo, ket awan duadua a pudno daytoy iti panagkagumaan nga indauluan da Zerubbabel ken Nehemias. Iti agpada a kasasaad, dagiti “kabusor ti Juda” (Esdras 4:1) dagiti Samaritano—ti an-annabo dagiti Israelita a nailaok kadagiti Gentil. Ti panagbasa maipapan iti panangsuppiatda iti panangbangon iti templo (kitaen iti Esdras 4–6) ket mabalin a mangiturong kenka nga agutob maipanggep iti pannakasuppiat a pakaipasanguan ti aramid ti Dios ita ken no kasano a makapagrespondeka no umay ti pannakasuppiat.

Kapadana, ti panangbasa maipapan iti aramid ni Nehemias a panangtarimaam kadagiti pader ti Jerusalem (kitaen iti Nehemias 2; 4; 6) ket mabalin a makaigapu it panangutobmo iti aramid a kayat ti Dios nga aramidem. Ania dagiti masursurom manipud iti pagwadan ni Nehemias?

Kitaen met iti Dieter F. Uchtdorf, “We Are Doing a Great Work and Cannot Come Down,” Liahona, Mayo 2009, 59–62.

Esdras 7; Nehemias 8

Mabendisionannak no adalek dagiti nasantuan a kasuratan.

Kalpasan a nabangon manen ti templo, nagkarigatan iti naespirituan dagiti tao ti Jerusalem, iti maysa a paset gapu ta, iti adu a kaputotan, limitado ti accessda iti “libro ti linteg ni Moises” (Nehemias 8:1). Immawat ni Esdras a para surat iti pammalubos manipud iti ari ti Persia a mapan iti Jerusalem, nga “inyegna ti linteg iti sango ti gimong” (Nehemias 8:2). Kasano a masurotmo ti pagwadan ni Esdras a kas nailadawan iti Esdras 7:10? Bayat ti panagbasam iti Nehemias 8, a mangted iti pakaammuan ni Esdras iti panagbasa iti linteg kadagiti tao, ania dagiti kapanunotan nga adda kenka maipapan iti bileg ti balikas ti Dios iti biagmo?

Kitaen met iti Teachings: Ezra Taft Benson, 115 – 24.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Esdras 3:8–13; 6:16–22.Kasano nga impakita dagiti Judio ti rag-oda para iti templo iti pannakabangonna manen ket kalpasanna pannakaidatonna? Ania ti ar-aramidentayo a mangipakita iti rag-otayo para iti templo? Nalabit a mabalin a sapulen ti pamiliam dagiti ladawan dagiti templo ken isaritam maipapan no kasano a mangyeg dagiti templo iti ragsak kadakayo (kitaen iti temples.ChurchofJesusChrist.org).

Esdras 7:6, 9–10, 27–28.Sumagmamano a gundaway kadagitoy a bersikulo, insurat ni Esdras a ti ima ti Apo adda kenkuana bayat ti panagdaliasatna iti Jerusalem. Ania ti mabalin a kayat a sawen daytoy a ragup ti balikas? Kasano a nariknatayo ti ima ti Apo kadatayo? Nalabit a mabalin nga ibinglay dagiti miembro ti pamilia dagiti pagwadan manipud iti biagda.

Nehemias 2; 4; 6.Ti estoria ni Nehemias ti mabalin a mangparegta kadagiti miembro ti pamilia no maipasangoda iti pannakasuppiat no aramidenda ti “dakkel nga aramid” (Nehemias 6:3). Mabalin dagiti miembro ti pamilia nga agaramid iti maysa a pader manipud iti bambanag nga adda kenka iti lawlaw ti pagtaengam bayat ti aggigiddan a panangbasayo kadagiti kangrunaan a binatog (kas iti Nehemias 2:17–20; 4:13–18; 6:1–3). Ania ti masursurotayo manipud ken ni Nehemias maipanggep iti panangsango iti pannakasuppiat? Ania ti dakkel nga aramid a kayat ti Apo nga aramidentayo? Kasano a pinapigsanatayo ti Apo a mangparmek iti panangsuppiat iti daytoy nga aramid?

Nehemias 8:1–12.Iti Nehemias 8, binasa ti Esdras ti linteg ni Moises kadagiti tao nga aggagar a dumngeg iti balikas ti Dios. Ti panangbasa kadagiti bersikulo 1–12 ket makatulong a mangpauneg iti panagdayaw ti pamiliam para iti balikas ti Dios. Kasano ti narikna dagiti tao maipapan iti linteg ti Dios? Kasano a matulongantayo ti tunggal maysa ti sabali a “maawatanda ti panagbasa”? (bersikulo 8).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I Love to See the Temple,” Children’s Songbook,95.

Panangpadur-as iti Panangisurotayo

Ibinglay dagiti nasantuan a kasuratan kas maysa a pamilia. Kabayatan ti sangapamiliaan a panagadalyo iti nasantuan a kasuratan, mangipalubos kadagiti miembro ti pamilia a mangibinglay kadagiti binatog manipud iti bukod a panagadalda a nangnangruna a napnuan kaipapanan kadakuada.

Panangiladawan ken ni Esdras nga agbasbasa kadagiti nasantuan a kasuratan kadagiti tao iti Jerusalem, ni H. Willard Ortlip, © Providence Collection/licensed from goodsalt.com