Ti Ipapanaw dagiti Balud, ni James Tissot ken dagiti dadduma pay

Hulio 11–17

2 Ar-ari 17–25

“Nagtalek ken Jehova a Dios ti Israel”

Idi nangngeg ni Josias dagiti balikas manipud iti libro ti linteg, sinungbatanna iti pammati. Kasano a masungbatam iti pammati iti nabasam iti 2 Ar-ari 17–25?

Isuratmo dagiti Impresionmo

Iti baet ti makaawis rikna a panangministro ni propeta Eliseo, nagtultuloy ti panagbaba ti espiritualidad ti Akin-amianan a Pagarian ti Israel. Nangitandudo dagiti nadangkes nga ari iti panagrukbab kadagiti didiosen, ket immadu ti gubat ken ikakalilis iti kinapudno. Iti kamaudiananna naparmek ti Imperio ti Asiria ket nawarawara dagiti sangapulo a tribu ti Israel.

Idi agangay, saan a nagar-aramid iti nasaysayaat ti Akin-Abagatan a Pagarian ti Juda; nagsaknap pay ti panagrukbab iti didiosen sadiay. Ngem iti baet amin dagitoy naespirituan a panagrupsa, nadakamat kadagiti pakaammuan iti nasantuan a kasuratan iti dua a nalinteg nga ari nga, iti maysa a panawen, nangpasubli kadagiti taoda iti Apo. Maysa ni Ezekias. Kabayatan ti panagturayna, dagiti Asirio, a kadatdateng manipud iti balligida iti amianan, pinarmekda ti kaaduan iti abagatan. Ngem impakita ni Ezekias ken dagiti taona ti pammati iti Apo, a nangisalakan iti Jerusalem iti namilagruan a wagas. Idi agangay, kalpasan ti sabali pay a panawen ti ikakalilis iti kinapudno, nangrugi ni Josias nga agturay. Naparegta bassit babaen ti panangtakuatna manen iti libro ti linteg, nangyeg ni Josias kadagiti reporma a nangisubli iti panagbiag iti relihion ti adu kadagiti taona.

Ania ti masursurotayo manipud kadagitoy dua a nalawag pasamak kadagiti nasipnget a tawen ti pakasaritaan ti Juda? Maibilang kadagiti dadduma pay a banag, mabalinmo nga utobem ti bileg ti pammati ken ti balikas ti Dios iti biagmo. Kas iti Israel ken Juda, agaramidtayo amin iti nasayaat ken dakes a pili. Ket no makarikna a kasapulan dagiti reporma iti biagtayo, nalabit a maparegtadatayo dagiti pagwadan da Ezekias ken Josias nga “agtalek[tayo] ken Jehova a Dios[tayo]” (2 Ar-ari 18:22).

Kitaen met iti 2 Cronicas 29–35; iti benneg a “Dagiti Kapanunotan a Laglagipen” “Kunanto ni Jesus iti Israel, ‘Agawidkan.’”

Dagiti Kapanunotan para iti Bukod a Panagadal iti Nasantuan a Kasuratan

2 Ar-ari 18–19

Makapagtalinaedak a napudno iti Apo kabayatan dagiti mapannubok a panawen.

Kaaduan kadatayo ti nakapadasen kadagiti panawen a nangkarit iti pammatitayo. Para ken Ezekias ken dagiti taona, dimteng ti maysa kadagita a panawen idi sinakup ti buyot ti Asiria ti Juda, dinadaelda ti adu a siudad, ken dimtengda iti Jerusalem. Bayat ti panagbasam iti 2 Ar-ari 18–19, ipapanmo a nagnaedka iti Jerusalem kabayatan daytoy a panawen. Kasano ti mabalin a nariknam, kas pagarigan, a dumngeg kadagiti pammabasol dagiti Asirio kas nairekord iti 2 Ar-ari 18:28–37 ken 19:10–13? Ania ti nasursurom manipud iti inaramid ni Ezekias kas sungbat? (kitaen iti 2 Ar-ari 19:1–7, 14–19). Kasano a tinulongan ti Apo ni Ezekias? (kitaen iti 2 Ar-ari 19:35–37). Utobem no kasano a tinulongannakayo kadagiti mapannubok a panawen.

Mabalin pay nga utobem ti panangiladawan ni Ezekias iti 2 Ar-ari 18:5–7. Ania ti isingasing dagitoy a bersikulo maipapan iti no apay a nabaelan ni Ezekias ti agtalinaed a napudno idi dumteng dagiti pannubok? Kasano a masurotmo ti pagwadanna?

Kitaen met iti 3 Nephi 3–4; D. Todd Christofferson, “Firm and Steadfast in the Faith of Christ,” Liahona, Nob. 2018, 30–33.

2 Ar-ari 19:20–37

Adda ti amin a banag iti ima ti Apo.

Addaan ni Sennakerib, ti ari ti Asiria, iti nasayaat a rason tapno mamati a parmeken ti buyotna ti Jerusalem. Inabak ti Asiria iti adu a pagilian, agraman ti Israel—no apay a nasken a maiduma ti Jerusalem? (kitaen iti 2 Ar-ari 17; 18:33–34; 19:11–13). Ngem adda mensahe ti Apo ken ni Sennakerib, a naited babaen ken ni propeta Isaias, ken nairekord iti 2 Ar-ari 19:20–34. Kasano ti pananggupugopmo iti daytoy a mensahe? Ania dagiti kinapudno a masarakam kadagitoy a bersikulo a makatulong kenka a maaddaan iti pammati iti Apo ken iti planona?

Kitaen met iti Helaman 12:4–23; Doktrina ken Katulagan 101:16.

2 Ar-ari 21–23

Mayasideg dagiti nasantuan a kasuratan ti pusok iti Apo.

Nariknam kadin a nagkurangka iti maysa a banag a naespirituan? Nalabit a nariknam a mabalin a napigpigsa ti relasionmo iti Dios. Ania ti nakatulong kenka a nagsubli Kenkuana? Utobem dagitoy a saludsod bayat ti panangbasam maipapan iti no kasano a timallikud ti Pagarian ti Juda manipud iti Apo iti babaen ni Ari Manasses (kitaen iti 2 Ar-ari 21) ken no kasano a nakatulong ni Ari Josias a mangikumit manen iti bagbagida Kenkuana (kitaen iti 2 Ar-ari 22–23). Ania ti nangparegta ken ni Josias ken dagiti taona? Mabalin a paregtaennaka daytoy a pakaammuan tapno mangpabaro iti panagkumitmo iti ”pannagnana a siaannurot ken ni Jehova … iti isu amin a puso[yo] ken iti isu amin a kararua[yo]” (2 Ar-ari 23:3).

Bayat ti panagbasam kadagitoy a kapitulo, ibilangmo pay ti panagadal iti kapitulo 6 iti Teachings of the Presidents of the Church: Spencer W. Kimball ([2006], 59–68), a nangisingasingan ni Presidente Kimball a ti estoria ni Ari Josias “ti maysa kadagiti kapipintasan nga estoria iti amin a nasantuan a kasuratan” (panid 62). Apay a kasdiay ti mabalin a narikna ni Presidente Kimball? Ania ti masarakam iti balikas ni Presidente Kimball, nangnangruna kadagiti masaona maipapan ken ni Ari Josias, a mangtulong kenka a mangyaplikar iti 2 Ar-ari 22–23 iti biagmo?

Kitaen met iti Alma 31:5; Takashi Wada, “Feasting upon the Words of Christ,” Liahona, Mayo 2019, 38–40; “Josiah and the Book of the Law” (video), ChurchofJesusChrist.org.

Makatulong dagiti nasantuan a kasuratan a mangisubli ti puspusotayo iti Apo.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

2 Ar-ari 19:14–19.Ania ti masursurotayo manipud iti pagwadan ni Ezekias a makatulongto kadatayo no addaantayo kadagiti narigat a problema wenno saludsod? Kasano a sinungbatan ti Apo dagiti kararagtayo para iti tulong? Nalabit a makaaramid ti tunggal miembro ti pamilia iti maysa a banag nga i-display iti pagtaengan a mangipalagip kadakuada nga agsubli iti Apo.

2 Ar-ari 22:3–7.Dagiti agar-aramid wenno trabahador a nailadawan iti 2 Ar-ari 22:3–7 ket napagtalkan iti kuarta a nausar a pangbangon manen iti templo “gapu ta nagaramidda a matalek” (bersikulo 7). Kalpasan ti panangbasam kadagitoy a bersikulo, mabalinmo nga idawat kadagiti miembro ti pamilia a manginagan kadagiti banag a naitalek kadakuada. Kasano a makapagbalintayo a mapagtalkan kas kadagiti agar-aramid wenno trabahador kadagitoy a bersikulo?

2 Ar-ari 22:8–11, 19; 23:1–3.Ania ti nakaawisan iti riknatayo maipapan iti no kasano a sinungbatan ni Josias ken dagiti taona ti balikas ti Dios? Kasanotayo a sumungbat iti balikas ti Dios kadagiti nasantuan a kasuratan? Mabalin nga ibinglay dagiti miembro ti pamiliam dagiti binatog ti nasantuan a kasuratan wenno estoria a nangpadakkel iti tarigagayda a mangsurot iti Nailangitan nga Ama ken ni Jesucristo.

2 Ar-ari 23:25.Ania ti napateg kadatayo maipapan ti pannakailadawan ni Josias iti daytoy a bersikulo? Mabalin nga idrowing ti pamiliam kadagiti sinan-puso a papel dagiti banag a maaramidda iti daytoy a lawas tapno agsubli iti Apo iti amin a pusoda.

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Naisingasing a kanta: “As I Search the Holy Scriptures,” Hymns, no. 277

Panangpadur-as iti Bukod a Panagadal

Sapulem dagiti makaparegta a balikas ken ragup ti balikas. Bayat ti panagbasam, mabalin a mangisangbay ti Espiritu iti imatangmo kadagiti masinunuo a balikas wenno ragup ti balikas. Dagitoy ti mangparegta ken mangguyugoy kenka; a mabalin a kaslada pay maisurat a para laeng kenka.

Panangiladawan iti maysa nga eskriba a mangmangyeg iti maysa a nalukot a papel ti nasantuan a kasuratan ken ni Ari Josias, ni Robert T. Barrett