“Hulio 4–10. 2 Ar-ari 2–7: ‘Adda Maysa a Propeta iti Israel’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Hulio 4–10. 2 Ar-ari 2–7,” Umaykayo, Sumurot Kaniak—Para kadagiti Indibidual ken Pamilia: 2022
Ladawan ni Eliseo a mangipakpakita iti tagabona dagiti luglugan ti apuy, © Review & Herald Publishing/licensed from goodsalt.com
Hulio 4–10
2 Ar-ari 2–7
“Adda Maysa a Propeta iti Israel”
Bayat ti panagbasam kadagiti nasantuan a kasuratan, mayawis ti Espiritu Santo ti imatangmo dagiti masinunuo a ragup ti balikas wenno binatog iti nasantuan a kasuratan. Ibilangmo ti panangisurat no apay a napateg kenka dagita a binatog.
Isuratmo dagiti Impresionmo
Kangrunaan a mision ti maysa a propeta ti mangisuro ken mangipaneknek maipapan iti Mangisalakan a ni Jesucristo. Ti kasuratantayo maipapan ken ni propeta Eliseo, nupay kasta, saan a mangiraman iti kaaduan iti panangisurona wenno panagipaneknekna. No ania ti kasuratan nga iraman ket dagiti milagro nga inaramid ni Eliseo agraman ti panangpagungarna iti maysa nga ubing manipud iti patay (kitaen iti 2 Ar-ari 4:18–37), panangpakan iti adu a tattao iti sangkabassit a taraon (kitaen iti 2 Ar-ari 4:42–44), ken panangpaimbag iti maysa nga agkukutel (kitaen iti 2 Ar-ari 5:1–14). Isu nga idinto nga awanantayo kadagiti balikas ni Eliseo nga agpampaneknek maipapan ken ni Cristo, addaantayo, iti unos ti panagministro ni Eliseo, kadagiti nabileg a parangarang ti mangmangted ti biag, mangtartaraon, ken mangpapaimbag a bileg ti Apo. Nalablabon pay dagiti kasta a parangarang iti biagtayo ngem iti maamiristayo no dadduma. Tapno makitatayo ida, nasken a kalikagumantayo a gun-oden ti milagro a kinalikaguman ni Eliseo idi nagkararag a maipaay iti managbuteng nga agtutubo a tagabona, “Agdawatak kenka, O Jehova, a luktam koma dagiti matana, tapno makitana koma” (2 Ar-ari 6:17).
Para iti ad-adu pay nga impormasion maipapan iti 2 Ar-ari, kitaen iti “Ar-ari, dagiti libro ti” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Makaaramid ti Dios iti milagro iti biagko.
Masansan a matulongannatayo dagiti milagro a mangparmek kadagiti rigat ti mortalidad—iti panawen ni Eliseo, kinasapulan ti lupes a daga ti natarnaw a danum ken kinasapulan ti napukaw a wasay a masarakan (kitaen iti 2 Ar-ari 2:19–22; 6:4–7). Ngem dagiti milagro pay ti mangiturong iti puspusotayo iti Apo ket mangisuro kadatayo kadagiti naespirituan a leksion. Bayat ti panagbasam iti 2 Ar-ari 2–6, ibilangmo ti panangaramid iti listaan dagiti milagro a masarakam, ken utoben dagiti naespirituan a leksion a masursurom manipud iti tunggal maysa. Ania ti isuro kenka dagitoy a milagro maipapan iti Apo ken ania ti mabalin nga aramidenna iti biagmo?
Kitaen met iti 2 Nephi 26:12–13; 27:23; Mormon 9:7–21; Moroni 7:35–37; Donald L. Hallstrom, “Has the Day of Miracles Ceased?” Liahona, Nob. 2017, 88–90.
Matungpalto dagiti balikas ti Apo babaen kadagiti propetana.
Kas nairekord iti 2 Ar-ari 4:8–17; 7:1–16, pinaregta ti Apo ni Eliseo nga agipadto kadagiti banag a dumteng—dagiti banag a kasla, manipud iti pannirigan dagiti dadduma, a saan a mapasamak. Bayat ti panagbasam kadagitoy a bersikulo, panunotem no kasano ti panagrespondem iti balikas ti Apo babaen kadagiti propetana iti agdama. Ania dagiti pannursuro, padto, wenno kari a nangngegamon manipud kadagiti sibibiag a propeta? Ania ti ar-aramidem nga agtignay iti pammati kadagita a kari?
Kitaen met iti 2 Nephi 29:6; Doktrina ken Katulagan 1:37–38.
No napakumbaba ken natulnogak, mapaimbagnak ni Jesucristo.
No dadduma nalaklaka a mangsapul iti personal a kaipapanan kadagiti nasantuan a kasuratan no idiligmo dagiti pisikal a banag iti maysa nga estoria kadagiti naespirituan a banag. Kas pagarigan, bayat ti panangbasam iti 2 Ar-ari 5, mabalinmo nga idilig ti kukutel ni Naaman iti naespirituan a karit a sangsanguem. Kas ken ni Naaman, nalabit a ninamnamam a ti Apo “mangaramid iti maysa a dakkel a banag” (bersikulo 13) a mangtulong kenka. Ania ti isuro ti padas ni Naaman kenka? Iti biagmo, ania koma ti pakaipadaan ti panangsurot iti simple a balakad nga “agdiguska, ket madalusanka”?
Kitaen no kasano nga inaringan ti padas ni Naaman ti pammatina iti Dios ti Israel (kitaen iti bersikulo 15). Ania dagiti padas a nangpatibker iti pammatim iti Dios?
Kitaen met iti Lucas 4:27; 1 Pedro 5:5–7; Alma 37:3–7; Ether 12:27; L. Whitney Clayton, “Whatsoever He Saith unto You, Do It,” Liahona, Mayo 2017, 97–99; “Naaman and Elisha” (video), ChurchofJesusChrist.org.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F91%2Fbd%2F91bdaaf38ed4247516362cf61307114da650201a%2F91bdaaf38ed4247516362cf61307114da650201a.jpeg/full/!250,/0/default)
“Ad-aduda dagiti adda kadatayo ngem kadagiti adda kadakuada.”
Nariknam kadin a nasurokankan iti bilang ken mabutbuteng, masmasdaaw, kas inaaramid iti agtutubo a tagabo ni Eliseo, “Kasanonto ti aramidentayo?” (kitaen iti 2 Ar-ari 6:8–23). Ania ti mangparegta kenka maipapan iti sungbat ni Eliseo? Kasano a balbaliwan daytoy a pakaammuan ti wagas a panagpanunotmo ken panagriknam maipapan kadagiti pannubokmo, pagrebbengam, wenno panagkagumaanmo nga agbiag iti ebanghelio?
Bayat ti panangutobmo, ibilangmo dagiti balikas ni Presidente Henry B. Eyring: “Kas iti dayta tagabo ni Eliseo, ad-adu dagiti adda kadakayo ngem dagiti makitayo a sumuppiat kadakayo. Sumagmamano nga adda kadakayo ti saanyonto a makita iti mortal a matayo. Ti Apo ti mangpapigsanto iti pakinakemyo ken no dadduma aramidennanto daytoy babaen ti panangawagna iti dadduma a makipagtakder kadakayo” (“O Ye That Embark,” Liahona, Nob. 2008, 58).
Kitaen met iti Salmo 121; Doktrina ken Katulagan 84:88.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
2 Ar-ari 2:1–14.Panunotem ti maipapan kadagiti tao a nakakita a ni Eliseo “innalana” ti kagay ni Elias (wenno kapa—maysa a simbolo ti takemna kas propeta). Kasano a mabalin nga inaringan daytoy ti wagas a panangrespondeda iti panangministro ni Eliseo? (Kitaen met iti 2 Ar-ari 19:19.) Nalabit a makapagsisinnublat dagiti miembro ti pamilia iti panangikawes iti “kagay” ket panangipaneknek kadagiti wagas a nakitadan ti Apo a mangsuporta ken mangpapigsa kadagiti naawagan nga agserbi Iti Simbaanna.
-
2 Ar-ari 4.Mabalinmo nga awisen dagiti miembro ti pamilia a mangbasa iti maipapan iti maysa a milagro iti 2 Ar-ari 4 (kitaen kadagiti bersikulo 1–7, 14–17, 32–35, 38–41, 42–44) ket mangisurat iti maysa a pamugtuan [clue] a mangtulong kadagiti miembro ti pamilia a mangpugto no ania a milagro ti iladladawanna. Ania ti masursurotayo maipapan ti Apo ken dagiti milagrona manipud itoy a kapitulo? Ania dagiti milagro—dakkel wenno bassit—a naimatangantayon iti biagtayo?
-
2 Ar-ari 5:1–15.Bayat ti panangbasam kadagitoy a bersikulo ken panagutobmo iti simple a banag a naidawat nga aramiden ni Naaman, ibilangmo dagiti simple a banag nga indawat ti propetatayo nga aramidentayo. Kasano a maaramid ti pamiliatayo a nasaysayaat a masurot ti balakadna?
Mabalin pay a buyaen ti pamiliam ti video a “Naaman and Elisha” (ChurchofJesusChrist.org) wenno basaenda ti “Agasan ni Eliseo ni Naaman” (iti Dagiti Estoria iti Daan a Tulag).
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F91%2Fbd%2F91bdaaf38ed4247516362cf61307114da650201a%2F91bdaaf38ed4247516362cf61307114da650201a.jpeg/full/!250,/0/default)
-
2 Ar-ari 5:20–27.Kasano koma a nairanud ni Gehazi manipud iti panagbasa iti “Kinapudno ken Integridad” iti Para iti Pigsa dagiti Agtutubo? (panid 19). Kasano a mangdangran kadatayo ti kinaulbod? Kasano a mabendisionannatayo ti panagbalin a napudno?
-
2 Ar-ari 6:13–17.Mabalin a magustuan dagiti miembro ti pamilia ti panangidrowing iti maysa a ladawan ti padas ni Eliseo ken ti tagabona a nailadawan kadagitoy a bersikulo. Kasano a matulongannatayo dagitoy a bersikulo no mariknatayo ti panagmaymaysa wenno natalipupostayo?
Para kadagiti dadduma pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Dearest Children, God Is Near You,” Hymns, no. 96.
Panangpadur-as iti Panangisurotayo
Yallukoy dagiti saludsod. Dagiti saludsod manipud kadagiti ubbing ti pakakitaan a nakasaganada a masursuruan. No saanmo nga ammo dagiti sungbat kadagiti saludsodda, sapulem dagiti sungbat a kaduam ida. (Kitaen iti Panangisuro iti Wagas ti Mangisalakan, 25–26.)
Panangildawan ken ni Naaman a maag-agasan iti kukutel, ni Paul Mann