Supiaten ni Elias dagiti Saserdote ni Baal, ni Jerry Harston

Hunio 27–Hulio 3

1 Ar-ari 17–19

“No ni Jehova Isu ti Dios, Sumurotkayo Kenkuana”

No basaem dagiti nasantuan a kasuratan, ar-aramatem iti pammati, a mangisagana iti pusom ken panunotmo a dumngeg iti “bassit a naalumamay a timek” ti Espiritu (1 Ar-ari 19:12).

Isuratmo dagiti Impresionmo

Adda ti balay ti Israel iti saan a kinaurnos. Ti panagkaykaysa ken panagdur-as a nagun-od babaen kada David ken Solomon ket nabayagen a napalabas, ken ti natulagan a pagnaigan ti nasion iti Apo, para iti adu a tao, ket nabayagen a lagip. Nabingayen ti Pagarian ti Israel, nga addaan iti sangapulo a tribu a mangbukbukel iti Akin-amianan a Pagarian ti Israel ken ti dua a tribu a mangbukbukel ti Akin-abagatan a Pagarian ti Juda. Agpada ti dua a pagarian a saan a natalged a naespirituan, nga indauluan dagiti ari a naglabsing kadagiti katulaganda iti Apo ken nangimpluensia kadagiti dadduma a mangaramid met iti kasta (kitaen iti 1 Ar-ari 11–16). Ngem nangnangruna a nakaro ti ikakalilis iti kinapudno iti Akin-amianan a Pagarian, a nangallukoyan ni Ari Acab iti Israel nga agrukbab kadagiti palso a dios ni Baal.

Ditoy a lugar ti nakaawagan ken ni propeta Elias a mangasaba. Ti pakaammuan ti panagministrona ti mangilawlawag a ti bukod a pammati iti Apo ket makapagtalinaed kadagiti nalinteg uray iti nadangkes nga aglawlaw. No dadduma sungbatan ti Apo ti kasta a pammati iti makaawis iti rikna, a milagro iti kaaduan, a kas iti apuy matmatnag manipud iti langit. Ngem kasta met nga agaramid kadagiti naulimek, nalimed a milagro, kas iti panangipaay kadagiti bukod a kasapulan ti napudno a maysa a balo a babai ken ti anakna. Ket kaaduanna a masansan a dagiti milagrona ket para iti maysa ta maipakaammoda laeng kenka— kas pagarigan, no ipalgak ti Apo ti Bagina ken ti pagayatanna babaen iti “bassit a naalumamay a timek” (1 Ar-ari 19:12).

Para iti ad-adu pay maipapan ken ni Elias, kitaen iti “Elias” iti Pangiwanwan iti Nasantuan a Kasuratan.

Dagiti Kapanunotan para iti Bukod a Panagadal iti Nasantuan a Kasuratan

1 Ar-ari 17:1–16

Ti awis a mangisakripisio ket maysa a gundaway a mangaramat iti pammati.

Idi damo, mabalin a kasla narigat a maawatan no apay nga indawat ni Elias iti balo a babai iti Zarepat a mangted kenkuana iti taraon ken danum sakbay ti panangpakan iti bagina ken ti mabisbisin nga anakna a lalaki. Ngem ti kiddaw ti Elias mabalin met a makita a kas maysa a bendision para iti daytoy bassit a pamilia. Kasapulanda dagiti bendision ti Apo, ket masansan a mangisangbay ti sakripisio kadagiti bendision—a pakairamanan ti bendision ti napigpigsa a pammati.

Bayat ti panangbasam iti daytoy nga estoria, ikabilmo ti bagim iti lugar daytoy nakasaysayaat a balo a babai. Ania ti makaawis iti riknam maipapan kenkuana? Ibilangmo dagiti gundaway nga adda kenka a mangaramat iti pammatim—agraman dagiti gundaway nga agsakripisio. Kasano a makapagbalinka nga ad-adda pay a kas iti daytoy a balo a babai?

Kitaen met iti Mateo 6:25–33; Lucas 4:24–26; Lynn G. Robbins, “Tithing—a Commandment Even for the Destitute,” Liahona, Mayo 2005, 34–36.

1 Ar-ari 18

“No ni Jehova Isu ti Dios, sumurotkayo kenkuana.”

Mabalin a narikna dagiti Israelita nga addaanda kadagiti nasayaat a gapu tapno agdaydayaw ken ni Baal iti baet ti bilin ti Apo, “Awan ti sabali a diosmo iti sangok” (Exodo 20:3). Maam-ammo ni Baal kas ti dios dagti bagyo ken tudo, ket kalpasan ti tallo a tawen ti gawat, nagkasapulanda unay iti bagyo. Ket ti panagrukbab ken ni Baal ket inawat ken sinuportaran ti ari ken reyna. Bayat ti panangbasam iti 1 Ar-ari 18, ibilangmo dagiti ania man a kasasaad iti biagmo a mabalin a maipada iti kasasaad nga adda idi kadagiti Israelita. Masarakam kadi ti bagim nga agpangngadua maipapan iti panangsurot iti Apo gapu ta kasla nainrasonan ken makaipetteng dagiti pagpilian? (kitaen iti 1 Ar-ari 18:21). Kadagiti pasamak a masarakan iti daytoy a kapitulo, ania iti panagkunam a padpadasen ti Apo nga isuro kadagiti tao maipapan iti Bagina ken maipapan ken ni Baal? Ania dagiti padas a nakaisuro kenka kadagiti isu met la a kinapudno?

Mabalin a makaay-ayo nga isurat dagiti banag a kinuna ken inaramid ni Elias iti daytoy a kapitulo a mangipakita iti pammatina iti Apo. Ania ti masursurom manipud ken Elias maipapan iti pammati?

Kitaen met iti Josue 24:15; 2 Nephi 2:26–28; D. Todd Christofferson, “Choice and Commitment” (worldwide devotional for young adults, Ene. 12, 2020), ChurchofJesusChrist.org.

Maysa a simboliko a pannakailadawan ti 1 Ar-ari 19:11–12. Ti Propeta, © Robert Booth Charles/Bridgeman Images

1 Ar-ari 19:1–18

Masansan nga agsao ti Apo kadagiti naulimek, simple a wagas.

Idi mangngeg ni Reyna Jezebel maipapan iti napasamak kadagiti saserdotena iti Bantay Carmel, saan a napasurot —nagpungtot daytoy. Gapu iti panagbutengna para ti biagna, naglibas ni Elias a nagturong iti let-ang ket nagkamang iti maysa a rukib. Sadiay, a nagkarkarigatan iti kinaliday ken pannakaupay, adda padasna iti Apo a maigiddiat unay iti no ania ti napasamak iti Bantay Carmel. Ania ti isuro kadakayo ti padas ni Elias iti 1 Ar-ari 19:1–18 maipapan no kasano a makisao ti Apo kenka iti panawen ti panagkasapulan? Utobem dagiti panawen iti biagmo idi napadasam ti timekna. Ania ti aramidem tapno umawat a nasansansan iti pannarabayna?

Utobem dagiti balikas ken ragup ti balikas a naaramat kadagiti sumaganad a bersikulo a mangiladawan no kasano a makisao ti Apo kadatayo: Helaman 5:30; 3 Nephi 11:3–7; Doktrina ken Katulagan 6:22–23; 8:2–3; 9:8–9; 11:12–14; 36:2.

Kitaen met iti Salmo 46:10; 1 Nephi 17:45; Russell M. Nelson, “Hear Him,” Liahona, Mayo 2020, 88–92.

1 Ar-ari 19:19–21

Ti panagserbi iti Apo ti ad-adda nga ipangpangruna ngem kadagiti nainlubongan a pakaseknan.

Ti kinapudno a kukua ni Eliseo ti 12 a sangol ti baka ket mangipakita a nalabit a maysa a baknang a tao isuna. Ania ti makaawis iti riknam maipapan kadagiti tignayna a nairekord iti 1 Ar-ari 19:19–21? Kasano a masurotmo ti pagwadan ni Eliseo?

Kitaen met iti Mateo 4:18–22.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

1 Ar-ari 17:1–16.Ti video nga “Elijah and the Widow of Zarephath” (ChurchofJesusChrist.org) ken ti ladawan iti daytoy a balabala ket makatulong iti pamiliam a mangiladawan iti panunotda iti pakaammuan iti 1 Ar-ari 17:1–16. Kalpasan ti panagbasa kadagiti bersikulo ken panangkita kadagitoy a pagadawan (resources), mabalin nga ilista ti tunggal miembro ti pamilia dagiti makaparegta a kababalin ti balo a babai. Ania ti idawdawat ti Apo nga aramidentayo a mangipakita iti pammatitayo?

1 Ar-ari 18.“Ni Elias ken dagiti Saserdote ni Baal” (iti Dagiti Estoria iti Daan a Tulag) ket makatulong iti pamiliam a mangsursuro iti estoria iti 1 Ar-ari 18. Adda kadi dagiti banag a manglaplapped kadatayo manipud iti naan-anay a panagkumittayo iti Apo? Kasano a maipakitatayo ti kinatallugodtayo a mangpili Kenkuana? (kitaen iti bersikulo 21).

1 Ar-ari 19:11–12.Ania ti makatulong iti pamiliam a makaawat iti kinapateg ti panagdengngeg iti “bassit a naalumamay a timek”? Mabalin nga aggigiddan a basaenyo ti 1 Ar-Ari 19:11–12 iti naalumamay a timek wenno siuulimek nga agkansion iti maysa a kanta maipapan iti Espiritu, a kas iti “The Holy Ghost” (Children’s Songbook, 105). Mabalinmo ti mangnayon iti sumagmamano a makasinga nga ariwawa a mangiladawan no kasano ti pananggandat ni Satanas a manglapped kadatayo iti pannakangngeg iti naalumamay, bassit a timek. Nalabit a mabalin nga ibinglay dagiti miembro ti pamilia no ania ti aramidenda tapno agbalin a sensitibo kadagiti pannignay iti Espiritu.

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Naisingasing a kanta: “The Holy Ghost,” Children’s Songbook, 105.

Panangpadur-as iti Bukod a Panagadal

Isuratmo dagiti impresionmo. No mariknam ti Espiritu a makisarsarita kenka, ibilang nga isuratmo no ania ti mariknam nga ibagbagana kenka. Ti pagarup a mangaramid kadagitoy nga impresion iti balikas ket makatulong kenka a mangutob ken mangipateg kadagitoy.

Ti Balo ti Zarepat, ni Rose Datoc Dall