Panagpakumbaba

Ti agpakumbaba ket mangbigbig a siyayaman iti panagpannuraymo iti Apo—tapno maawatan nga agtultuloy a kasapulam ti tulongna. Ti panagpakumbaba ket maysa a panangbigbig a dagiti talentom ken kabaelam ket sagsagut manipud ti Dios. Saan daytoy a tanda ti kinakapsut, kinasadut, wenno panagbuteng; daytoy ti panangipakita nga ammom no sadino ti pagsadagan ti pudno a pigsam. Makapagbalinka nga agpada a napakumbaba ken awanan iti panagbuteng. Makapagbalinka nga agpada a napakumbaba ken natured.

Ni Jesucristo ti kangrunaan a pagwadantayo ti panagpakumbaba. Kabayatan ti mortal a panagministrona, kanayon a binigbigna a simmangbay ti pigsana gapu iti panagpannurayna iti Amana. Kinunana: “Awan ti pannakabalinko nga agaramid a sisiak. … diak sapulen ti nakemko, no di ket ti nakem ti nangibaon kaniak” (Juan 5:30).

Papigsaennakanto ti Apo no ipakumbabam ti bagim iti sangona. Insuro ni Santiago: Ti Dios bumusor kadagiti natangsit, ngem mangted ti parabur kadagiti napakumbaba. … Agpakumbabakayo iti imatang ti Apo, ket isu itan-oknakayto” (Santiago 4:6, 10).

Dagiti mainayon a reperensia: Mateo 18:4; 23:12; 26:39; Lucas 22:42; 1 Pedro 5:5–6; Mosiah 4:11–12; 15:6–7; Alma 5:27–28; Helaman 3:33–35; Ether 12:27; DkK 12:8; 67:10; 112:10; 136:32–33