Panagbabawi
Ti panagbabawi ket maysa kadagiti umuna a pagbatayan ti ebanghelio (kitaen iti Pagannurotan ti Pammati 1:4). Kasapulan daytoy iti panagragsakmo iti daytoy a biag ken iti unos ti kinaagnanayon. Ti panagbabawi ket ad-adda nga amang ngem ti panangbigbig laeng kadagiti nagbiddutan. Maysa daytoy a panagbalbaliw ti panunot ken puso a mangted kenka iti baro a pannirigan maipapan iti Dios, maipapan iti bagim, ken maipapan iti lubong. Iramanna ti panangtallikud iti basol ken yaasideg iti Dios para iti pammakawan. Maguyugoy daytoy babaen ti ayat ti Dios ken ti napasnek a tarigagay nga agtungpal kadagiti bilinna.
Ti Panagkasapulan iti Panagbabawi
Impakdaar ti Apo nga “awan ti narugit a banag a makatawid iti pagarian ti langit” (Alma 11:37). Dagiti basolmo ti mangaramid kenka a narugit—saan a maikari nga agsubli ken agtaeng iti sidong ti Nailangitan nga Amam. Isangbayda pay ti saem iti kararuam iti daytoy a biag.
Babaen ti Pannubbot ni Jesucristo, nangipaayen ti Nailangitan nga Ama iti kakaisuna a wagas a pakapakawanan dagiti basbasolmo (kitaen iti “Pannakapakawan,” dagiti panid 160–62). Nagsagaba ni Jesucristo iti pannusa gapu kadagiti basbasolmo tapno mapakawanka no sipupudno nga agbabawika. No agbabawika ken agpannurayka iti pangisalakan a paraburna, madalusankanto manipud iti basol. Impakdaarna:
“Bilinenkayo nga agbabawi—agbabawikayo, no saan dangrankayo babaen ti panaplit ti ngiwatko, ken babaen ti pungtotko, ken babaen ti ungetko, ket nakaronto ti panagsagabayo—no kasano ti kakarona diyo ammo, no kasano ti kinain-inakana diyo ammo, wen, no kasano ti kadagsen ti imetenyo diyo ammo.
“Ta adtoy, siak, a Dios, sinagabak dagitoy a banag para iti amin, tapno saanda koma nga agsagaba no agbabawida;
“Ngem no saanda nga agbabawi nasken nga agsagabada a kas kaniak;
“A dayta a panagsagaba nangipaay kaniak, uray pay ti Dios a kaindaklan iti amin, nga aggarigenggen gapu iti saem, ken agdara iti tunggal teterreman, ken agsagaba nga agpada ti bagi ken ti espiritu—ket kayatko a saanak koma nga uminum iti napait a kopa, ken kumsen—
“Nupay kasta, madaydayaw koma ti Ama, ket nakiranudak ken lineppasko ti panangisaganak kadagiti annak ti tattao” (DkK 19:15–19).
Ti Peggad ti Panangitantan iti Panagbabawi
Saanmo nga ikalintegan dagiti basbasolmo wenno itantan ti panagbabawi. Imballaag ni Amulek: “Daytoy a biag ti panawen a panagsagana ti tao a sumabat iti Dios; wen, adtoy ti aldaw daytoy a biag ti aldaw nga agpaay kadagiti tao a mangaramid iti trabahoda. … dawatek kadakayo a saanyo nga itantan ti aldaw ti panagbabawiyo agingga iti panungpalan; agsipud ta kalpasan daytoy nga aldaw ti biag, a naited kadatayo nga agsagana para iti agnanayon, adtoy, no saantayo a pasayaaten ti panawentayo iti daytoy a biag, umayto ti rabii ti kinasipnget a dinton mabalin ti agtrabaho” (Alma 34:32–33).
Dagiti Elemento ti Panagbabawi
Ti panagbabawi ket nasaem a proseso, ngem mangiturong daytoy iti pannakapakawan ken manayon a talna. Babaen ken ni propeta Isaias, kinuna ti Apo, “Uray no dagiti basbasolyo kasda la koma iti escarlata, mapapudawdanto a kas la iti nieve; nupay no nalabbasitda a kasla carmesi, agbalindanto a kasla napudaw a de lana” (Isaias 1:18). Iti daytoy a dispensasion inkari ti Apo, “Isu a nangibabawi iti basbasolna, isu ti mapakawan, ket siak, ti Apo, diakto idan malagip” (DkK 58:42). Iraman ti panagbabawi dagiti sumaganad nga elemento:
Pammati iti Nailangitan nga Ama ken ni Jesucristo.
Dakkel ti bileg ti basol. Tapno agbalinka a nawaya manipud iti daytoy, nasken nga umasidegka iti Nailangitan nga Amam ket agkararagka a sipapammati. Mabalin a kalikaguman ni Satanas ti mangpapati kenka a saanka a maikari nga agkararag—a saan unay a maragsakan ti Nailangitan nga Ama kenka tapno saannanto a denggen iti kaano man dagiti kararagmo. Inuulbod daytoy. Kanayon a nakasagana ti Amam iti Langit a tumulong kenka no umasidegkanto Kenkuana nga addaan iti agbabbabawi a puso. Addaan isuna iti pannakabalin a mangpaimbag kenka ken mangtulong kenka nga agballigi a mangparmek iti basol.
Ti panagbabawi ket maysa nga aramid ti pammati ken ni Jesucristo—panangbigbig iti pannakabalin ti Pannubbotna. Laglagipem a mabalin a mapakawanka laeng kadagiti kondisionna. No siyayamanka a mangbigbig iti Pannubbotna ken iti pannakabalinna a mangdalus kenka manipud iti basol, kabaelam ti “mangaramat iti pammatim iti panagbabawi” (Alma 34:17).
Agladingit gapu iti Basol.
Tapno mapakawanka, nasken nga umuna nga akuem iti kaunggan ti bagim a nakabasolka. No ikagkagumaam ti agbiag iti ebanghelio, mangiturongto ti kasta a panangako iti “panagladingit a mayannurot iti Dios,” a “pataudenna ti panagbabawi a pakaisalakanan” (2 Taga Corinto 7:10). Saan a dumteng ti panagladingit a mayannurot iti Dios gapu kadagiti gagangay a bunga ti basol wenno gapu iti buteng ti pannakadusa; ngem ketdi, dumteng daytoy manipud iti pannakaammo a pinagladingitmo ti Nailangitan nga Amam ken ti Mangisalakanmo. No mapadasam ti panagladingit a mayannurot iti Dios, addaanka iti napudno a tarigagay nga agbalbaliw ken kinatallugod nga agtulnog iti tunggal kasapulan para iti pannakapakawan.
Panagpudno.
“Ti mangabbong kadagiti salungasingna dinto rumang-ay: ngem ti mangipudno ken mangbaybay-an kadakuada maragpatnanto ti kaasi” (Dagiti Proverbio 28:13). Kasapulan iti pannakapakawan ti kinatallugod a mangibutaktak iti amin nga inaramidmo iti Nailangitan nga Amam. Agparintumengka iti sanguananna iti napakumbaba a kararag, nga akuem dagiti basbasolmo. Ipudnom ti bain ken basolmo, ket kalpasanna agpakaasika iti tulong.
Dagiti nadagsen a panaglabsing, kas koma kadagiti panagsalungasing iti linteg ti kinadalus ti dayaw, ket mabalin a mamagpeggad iti kinamiembrom iti Simbaan. Ngarud, nasken nga ipudnom dagitoy a basbasol nga agpada iti Apo ken kadagiti pannakabagina iti Simbaan. Maaramid daytoy babaen ti tulong ti bishop wenno branch presidentmo ken mabalin a ti stake wenno mission presidentmo, nga agserbi a kas agbambantay ken ukom iti Simbaan. Idinto a ti laeng Apo ti mabalin a mamakawan kadagiti basbasol, agakem dagitoy a dadaulo ti priesthood iti napateg a papel iti proseso ti panagbabawi. Pagtalinaedendanto ti panagpudnom a kompidensial wenno nalimed ket tulongandaka iti unos ti proseso ti panagbabawi. Agbalinka a naan-anay a napudno kadakuada. No saanmo nga impudno ti amin, a dinakamatmo laeng dagiti saan a nadagsen a biddut, saanmonto a marisut ti nadagdagsen, ken nailimed a naglabsingan. Ti nasapsapa a panangirugim iti daytoy a proseso, nasapsapanto met a masarakam ti talna ken rag-o a sumangbay iti milagro ti pannakapakawan.
Panangisardeng wenno Panangtallikud iti Basol.
Nupay ti panagpudno ket napateg nga elemento ti panagbabawi, saan nga umdas daytoy. Kinuna ti Apo, “Babaen daytoy maammuanyo no agbabawi ti tao iti basbasolna—adtoy, ipudnona ida ken tallikudanna ida” (DkK 58:43).
Pagtalinaedem ti agtultuloy, manayon a pangrisut a saanmonto nga uliten iti kaano man ti panaglabsing. No pagtalinaedem daytoy a panagkumit, dimonto kaano man mapadasan manen ti saem dayta a basol.
Umadayoka a dagus manipud iti ania man a napeggad a kasasaad. No ti masinunuo a kasasaad ti mangigapu kenka nga agbasol wenno mabalin a mangigapu kenka nga agbasol, pumanawka. Saanka a makapagtultuloy iti kaadda ti pannulisog ken makanamnama a maparmek ti basol.
Panangisubli.
Nasken nga isublim agingga a mabalin ti amin a dinadael dagiti aramidmo, kukua man ti maysa a tao wenno nasayaat a reputasion ti maysa a tao. Ti natallugod a panangisubli ket mangipakita iti Apo nga aramidemto ti amin a kabaelam nga agbabawi.
Nalinteg a Panagbiag.
Saan nga umdas ti mangpadas laeng a pagkedkedam ti dakes wenno paawanem ti basol iti biagmo. Nasken a punnuem ti biagmo iti kinalinteg ket makiramanka kadagiti aramid a mangisangbay iti naespirituan a bileg. Iraremmo ti bagim kadagiti nasantuan a kasuratan. Agkararagka iti inaldaw tapno ikkannaka ti Apo iti pigsa iti labes ti bukodmo a kabaelan. No dadduma, agayunoka para kadagiti naisangsangayan a bendision.
Ti naan-anay a panagtungpal ket mangisangbay iti naan-anay a bileg ti ebanghelio iti biagmo, agraman ti dimmakkel a pigsa a mangparmek kadagiti pagkapsutam. Iraman daytoy a panagtungpal dagiti aramid a mabalin a dimo ibilang iti damo a paset ti panagbabawi, kas iti panagdar-ay kadagiti miting, panagbayad iti apagkapullo, panangted iti serbisio, ken panangpakawan kadagiti dadduma. Inkari ti Apo, “Mapakawan ti agbabawi ken mangaramid kadagiti bilin ti Apo” (DkK 1:32).