Utang

Babaen ken ni Propeta Joseph Smith, naminsan nga imbaga ti Apo iti maysa a grupo dagiti Santo, “Pagayatak a bayadanyo amin nga utangyo” (DkK 104:78). Manipud pay kadagiti nagkauna nga aldaw ti Simbaan, inulit-ulit a binallaagandatayo dagiti propeta ti Apo a liklikantayo ti pannakaadipen iti utang.

Maysa kadagiti kadakkelan a peggad ti panagutang ket ti interes a mainayon iti daytoy. Sumagmamano a porma ti panagutang, kas koma credit card, ti adda nangato nga interesna. Apaman a siuutangka, matakuatam nga awan asina dayta nga interes. Agtultuloy a maurnong daytoy, ania man ti kasasaadmo—empleadoka man wenno awan trabahom, nasalun-atka man wenno masakitka. Di kaano man umawan daytoy agingga a di mabayadan ti utang. Saanka koma a maallilaw kadagiti maidiaya a pautang, uray no kasla pagbalinenda a makaallukoy ti pautang babaen ti panangikarida iti ababa nga interes wenno awan interesna pay laeng iti maysa a paset ti panawen.

Kitaem ti kasasaad maipapan ti pakaseknam iti kuarta. Disiplinaem ti bagim kadagiti panaggatangmo, a liklikam ti umutang agingga iti kabaelam. Iti kaaduanna a kasasaad, maliklikam ti umutang babaen ti nainsiriban a panangimatonmo kadagiti pamataudam. No makautangka iti umdas a gatad tapno panggatangmo iti maysa a disente a balay wenno pangileppasmo iti adalmo, agtrabahoka tapno mabayadam a dagus agingga a mabalin ket wayawayaam ti bagim manipud iti pannakaadipen. No nabayadamon dagiti utangmo ken nakaurnongkan iti kuarta, maisaganakanto para kadagiti parikut maipapan iti pakaseknan iti kuarta a mabalin a sumangbay kenka. Addaankanto iti pagkamangan para iti pamiliam ken talna iti pusom.