Ikakalilis iti Kinapudno
No umadayo dagiti indibidual wenno grupo dagiti tattao manipud kadagiti pagbatayan ti ebanghelio, addada iti kasasaad ti ikakalilis iti kinapudno.
Napagteng dagiti panawen ti sapasap nga ikakalilis iti kinapudno iti unos ti pakasaritaan ti lubong. Kalpasan dagiti panawen ti kinalinteg, masansan nga umarakup dagiti tao iti kinadakes. Maysa a pagarigan ket ti Nakaro nga Ikakalilis iti Kinapudno, a napasamak kalpasan nga impasdek ti Mangisalakan ti Simbaanna. Kalpasan ti ipapatay ti Mangisalakan ken dagiti Apostolna, dinadael dagiti tao dagiti pagbatayan ti ebanghelio ken nagaramidda kadagiti saan a maipalugod a panagbalbaliw iti pannakabukel ti Simbaan ken ordinansa ti priesthood. Gapu iti daytoy nasaknap a kinadakes, imbabawi ti Apo ti turay ti priesthood manipud iti daga.
Kabayatan ti Nakaro nga Ikakalilis iti Kinapudno, awanan dagiti tao iti nadiosan a pangiturong manipud kadagiti sibibiag a propeta. Adu a simbaan ti naipasdek, ngem awananda iti bileg ti priesthood a mangidaulo kadagiti tao iti pudno a pannakaammo maipapan iti Dios Ama ken ni Jesucristo. Nadadael wenno napukaw dagiti paset dagiti nasantuan a kasuratan, ken awanan ti asino man iti turay a mangitalek iti sagut ti Espiritu Santo wenno mangannong iti dadduma pay nga ordinansa ti priesthood. Nagpaut daytoy nga ikakalilis iti kinapudno agingga idi nagparang ti Nailangitan nga Ama ken ti Patpatgenna nga Anak ken ni Joseph Smith idi 1820 ken nangirugi iti pannakaisubli ti pakabuklan ti ebanghelio.
Agbibiagtayo itan iti maysa a panawen a naisublin ti ebanghelio ni Jesucristo. Ngem saan a kas iti Simbaan iti napalabas, ti Ti Simbaan ni Jesucristo dagiti Santo iti Ud-udina nga Aldaw ket saanto a maparmek ti ikakalilis iti kinapudno. Isuro dagiti nasantuan a kasuratan a saanto a pulos madadael manen ti Simbaan (kitaen iti DkK 138:44; kitaen met iti Daniel 2:44).
Nupay awanto ti sabali pay a sapasap nga ikakalilis iti kinapudno, nasken nga agannad ti tunggal maysa kadatayo iti personal nga ikakalilis iti kinapudno. Masaluadam ti bagim a maibusor iti personal nga ikakalilis iti kinapudno babaen ti panagtungpal kadagiti katulagam, panagtungpal kadagiti bilin, panangsurot kadagiti dadaulo ti Simbaan, pannakiranud iti sakramento, ken agtultuloy a panangpapigsa iti pammaneknekmo babaen ti inaldaw a panagadal iti nasantuan a kasuratan, panagkararag, ken panagserbi.