Panagbassawang
Ti panagbassawang ket kinaawan panagdayaw wenno pananguyaw kadagiti sagrado a banag. Iramanna ti gagangay wenno saan a naraem a pannakausar ti nagan ti asino man a kameng ti Kinadios. Iramanna pay ti ania man a kita ti saan a nadalus wenno naalas a panagsasao wenno ugali.
Kanayon nga usaren dagiti nagan ti Nailangitan nga Ama, ni Jesucristo, ken ti Espiritu Santo nga addaan panagraem ken panagdayaw. Maysa a basol ti saan nga umno a panangaramat iti nagnaganda. Ti narugit, naalas, wenno bastos a panagsasao wenno panaggargaraw, kasta met kadagiti imoral nga ang-angaw, ket makapasakit iti Apo ken iti dadduma pay.
Dagiti narugit a pagsasao ket makadangran iti espiritum ken mangibaba iti dayawmo. Saanmo nga ipalubos nga aringandaka dagiti dadduma nga agusar iti narugit a pagsasao. Ketdi, agusarka iti nadalus a pagsasao a mangitag-ay ken mangitan-ok kenka. Agpilika kadagiti gagayyem nga agus-usar iti nasayaat a pagsasao. Mangipakitaka iti pagwadan a mangallukoyto kadagiti adda iti aglawlawmo nga agusar iti nadalus a pagsasao. No agusar dagiti gagayyem ken am-ammom iti nabassawang a panagsasao, siaayat nga allukoyem ida a pumili kadagiti sabali a balikas. No dida dumngeg, sidadayaw nga umadayoka wenno sukatam ti saritaan.
No naipaugalin kenka ti ugali a panagsapata, maikkatmo daytoy. Rugiam babaen ti panangaramid iti pangngeddeng nga agbalbaliw. Agkararagka para iti tulong. No masulisogka nga agusar iti nabassawang a pagsasao, agulimekka wenno isaom ti nasken nga isaom iti sabali a wagas.