Sakripisio
Ti agsakripisio ket mangisuko iti maysa a banag nga ipatpategtayo para iti pagsayaatan ti maysa a banag a dakdakkel ti pategna. Kas Sasanto iti Ud-udina nga Aldaw, addaantayo iti gundaway a mangisakripisio kadagiti nailubongan a banag para iti Apo ken iti pagarianna. Nasken a natallugod dagiti miembro ti Ti Simbaan ni Jesucristo dagiti Santo iti Ud-udina nga Aldaw nga agaramid iti ania man a sakripisio nga idawat ti Apo. No saan a maidawat kadatayo nga agaramid kadagiti sakripisio, saantayo a mapadur-as iti kaano man ti pammati a kasapulan para iti agnanayon a pannakaisalakan.
Ti Pannubbot ni Jesucristo ti naindaklan ken agnanayon a sakripisio iti sentro ti ebanghelio (kitaen iti Alma 34:8–16). Sakbay nga impatungpal ti Mangisalakan ti Pannubbot, insakripisio dagiti naitulag a tattaona dagiti animal a kas simbolo ti sakripisiona. Daytoy a kannawidan ti nangtulong kadakuada a mangpadpadaan iti Pannubbot (kitaen iti Moises 5:4–8). Ti bilin a mangidaton kadagiti isakripisio nga animal ket naggibus iti ipapatay ni Jesucristo. Iti Simbaan iti agdama, makiranudtayo iti sakramento kas panglaglagip iti pangsubbot a sakripisio ti Mangisalakan.
Kas pangnayon iti pananglaglagip iti pangsubbot a sakripisio ni Jesucristo, nasken nga idatontayo ti bukodtayo a sakripisio: nasneban a puso ken napnuan babawi nga espiritu. Kinuna ti Mangisalakan: “Saanyon nga idaton pay kaniak ti agayus a dara; wen, maisardengen ti panagidatonyo ken dagiti napuoran a sagsagutyo. … Ket idatonyo kaniak a daton ti nasneban a puso ken napnuan babawi nga espiritu. Ket asino man nga umay kaniak nga addaan iti nasneban a puso ken napnuan babawi nga espiritu, buniagak iti apuy ken iti Espiritu Santo” (3 Nephi 9:19–20).
Ti maaddaan iti nasneban a puso ken napnuan babawi nga espiritu ket panagbalin a napakumbaba ken nakasagana nga umawat iti pagayatan ti Dios ken iti balakad dagiti inawaganna a mangidaulo iti Simbaanna. Kayatna pay a sawen ti panangrikna iti nalaus a panagladingit ken napudno a tarigagay nga agbabawi. Inyunay-unay ni propeta Lehi ti kinapateg ti panangidaton iti daytoy a sakripisio: “Adtoy, indaton ni [Cristo] ti bagina a pangsubbot iti basol, a mangsungbat iti pagpatinggaan ti linteg kadagiti amin a naaddaan iti nasneban a puso ken napnuan babawi nga espiritu; ket awan ti sabali a makasungbat iti pagpatinggaan ti linteg” 2 Nephi 2:7). No ditayo idaton ti sakripisio nga addaan nasneban a puso ken napnuan babawi nga espiritu, ditayo naan-anay a maawat dagiti bendision a sumangbay babaen ti Pannubbot.
No natallugodka nga agsakripisio kas iti imbilin ti Apo, awatennakanto Isuna. Insurona: “Amin dagiti makaammo a napudno ti panagpuspusoda, ken napakumbaba, ken sibababawi ti espirituda, ken sitatallugod a mangtungpal kadagiti katulaganda babaen ti sakripisio—wen, tunggal sakripisio a siak, ti Apo, ibilinkonto—awatek ida” (DkK 97:8). Addaan iti agnanayon a pannirigan, makitam a ti panangisukom kadagiti banag ti lubong ket saan a talaga a sakripisio. Nain-indaklan dagiti bendision nga awatem ngem iti ania man a banag nga isukom.