Kallaysa
Iti lubong iti agdama, saan nga ik-ikkan pateg ken pagang-angawan ti adu a tao ti kallaysa ken ti pamilia. Iti baet dagita makatikaw ken makadadael a sasao, nangipaay ti Umuna a Panguluen ken ti Sangapulo-ket-dua nga Apostol iti agtultuloy a sao ti kinapudno. “Sipapasnek[da] a mangiwaragawag a ti kallaysa iti nagbaetan ti maysa a lalaki ken maysa a babai ket inordenan ti Dios ken ti kaamaan ti sentro iti plano ti Namarsua para iti agnanayon a pagtungpalan dagiti annakna” (kitaen iti “Ti Kaamaan, Maysa a Waragawag iti Lubong,” panid 102 iti daytoy a libro).
Dagiti kaindaklan a rag-o ti biag ket masarakan iti pamilia. Dagiti napigsa a relasion ti pamilia ket agkasapulan iti panagkagumaan, ngem mangisangbay ti kasta a panagkagumaan iti naindaklan a ragsak iti daytoy a biag ken iti unos ti kinaagnanayon. Uray no saanka pay a naaddaan iti naragsak a biag ti pamilia iti napalabas, mabalinmo ti agkalikagum a maaddaan iti agnanayon a kallaysa ken naayat a relasion kadagiti miembro ti pamilia.
Ti Baro ken Agnanayon a Katulagan ti Kallaysa
Iti plano ti kinaragsak ti Nailangitan nga Amatayo, mabalin a mailantip ti maysa a lalaki ken maysa a babai iti tunggal maysa para ita a panawen ken iti amin a kinaagnanayon. Addaan dagiti mailantip iti templo iti pammatalged nga agtultuloyto ti relasionda iti agnanayon no napudnoda kadagiti katulaganda. Ammoda nga awan, uray ni patay, ti permanente a makapagsina kadakuada.
Kasapulan ti katulagan ti agnanayon a kallaysa para iti pannakaitan-ok. Impalgak ti Apo babaen ken ni Joseph Smith: “Iti celestial a gloria adda tallo a langit wenno tukad; ket tapno magun-od ti kangatuan, nasken a sumrek ti tao iti daytoy nga urnos ti kinasaserdote [kayatna a sawen ti baro ken agnanayon a katulagan ti panagasawa]; ket no dina aramiden, saanna a magun-od daytoy. Mabalinna ti sumrek iti sabali, ngem dayta ti paggibusan ti pagarianna; awanen ti dur-asanna” (DkK 131:1–4).
Kalpasan ti panangawatna iti pangilantip nga ordinansa ken panangaramid kadagiti sagrado nga ordinansa iti templo, nasken nga agtultuloy dagiti agassawa iti kinapudno tapno awatenda dagiti bendision ti agnanayon a kallaysa ken pannakaitan-ok. Kinuna ti Apo:
“No mangasawa ti lalaki iti babai babaen ti balikasko, nga isu ti paglintegak, ken babaen ti baro ken agnanayon a katulagan, ken pinaglantip ida babaen ti Nasantuan nga Espiritu ti kari, babaen kenkuana a natudingan, kenkuana a nangidutokak iti daytoy a bileg ken kadagiti tulbek daytoy a kinasaserdote; … ket no agtungpal[da] iti katulagak, … maaramidto kadakuada iti amin a banag a kayat ti katulongak a pangipanan kadakuada, iti agdama, ken iti agnanayon; ket maipatungpalto a mamimpinsan no addadan iti ruar ti lubong” (DkK 132:19; para iti pannakailawlawag maipapan iti Nasantuan nga Espiritu ti Kari, kitaen iti panid 47).
Panagsagana para iti Kallaysa
No baro wenno balasangka, isaganam ti bagim a nasayaat para iti kallaysa. Laglagipem nga awan ti kasukat ti panagkallaysa iti templo. Agsaganaka a mangikallaysa iti umno a tao iti umno a lugar iti umno a panawen. Agbiagka itan a maikari iti kita ti tao a namnamaem a pakikallaysaam.
Makisinnarakka laeng kadagiti addaan kadagiti nangato a pagrukodan ken pakapangtalinaedam kadagiti nangato a pagrukodam iti pannakikaduam kadakuada. Siaannad a planuem dagiti positibo ken makatulong nga aktibidad tapno saankayo a mabati a dakdakayo iti kasinnarakmo nga awan ti ania man a banag nga ar-aramidenyo. Agyankayo kadagiti lugar a natalged a nalaka a pakapengdanyo iti bagiyo. Saanka a makiramraman kadagiti pagsasaritaan wenno aramid a mangparugso kadagiti rikna maipapan iti seks.
Agsapulka iti maysa a kadua a kapadam iti pammati. Agsapulka iti maysa a tao a kanayonmo a madayaw ken marespeto, maysa a tao a mangtulongto kenka iti biagmo. Sakbay nga agkallaysaka, siguraduem a nasarakamon ti maysa a tao a pakaitedam ti sibubukel a pusom, sibubukel nga ayatmo, sibubukel a kinapudnom, ken sibubukel a panagtalekmo.
Balakad para kadagiti Saan nga Agasawa
Agtalinaed nga awan asawana ti sumagmamano a miembro ti Simbaan a saanda a bukod a basol, uray no kayatda ti agasawa. No masarakam ti bagim iti kastoy a kasasaad, manamnamam nga “amin a bambanag agtitimpuyogda nga agaramid a maipaay iti pagimbagan dagiti agayat iti Dios” (Taga Roma 8:28). No agtalinaedka a maikari, maitedto kenka iti maysa nga aldaw, iti daytoy a biag wenno iti sumaruno, ti amin a bendision ti agnanayon a relasion ti pamilia. Inulit-ulit nga inaramid ti Apo daytoy a kari babaen dagiti propetana iti ud-udina nga aldaw.
No awan asawam ket tarigagayam ti agasawa, saanka a maawanan iti namnama. Iti isu met la a gundaway, saanmo nga ipalubos ti bagim a makumikom unay iti panggepmo a tun-oyen. Ngem ketdi, makiramanka a sipapasnek kadagiti napapateg nga aktibidad. Agsapulka kadagiti wagas a pakapagserbiam kadagiti kabagiam ken ti komunidadmo. Umawat ken aramiden a nasayaat dagiti awag iti Simbaan. Pagtalinaedem ti bagim a nadalus, agpada a pisikal ken naespirituan. Agtultuloyka nga agsursuro ken sumayaat ken rumang-ay iti bukodmo a biag.
Pananggun-od iti Naragsak a Panagasawa
No naasawaanka, laglagipem a ti panaggayyem ken ayat iti nagbaetanyo nga agassawa ket nasken a dagitoy ti kapatgan a pagnaiganyo iti daga. Ti asawam laeng ti kakaisuna a tao malaksid iti Apo a naibilinen kenka nga ayatem iti amin a pusom (kitaen iti DkK 42:22).
Laglagipem a ti kallaysa, iti pudno unay a kaipapananna, ket panagkadua dagiti agpada, nga awan kadakuada ti naturturay ngem iti maysa, ngem agpinnaregta, aglinniwliwa, ken agtinnulong iti tunggal maysa.
Gapu ta ti panagasawa ket napateg a relasion iti biag, agkasapulan ken maikarian daytoy iti panawen. Saanmo nga ikkan iti nangatngato a prioridad dagiti saan unay napateg a panagkumit. Maaddaan iti oras nga agsarita ken dumngeg iti tunggal maysa. Agbalin a mannakaawat ken managdayaw. Masansan nga ipeksa dagiti nadungngo a rikna ken pammateg.
Ikeddengmo nga awanto ti dumteng iti nagbaetanyo iti asawam tapno mangsinga iti panagdennayo nga agassawa. Ikeddengmo nga aramiden a naballigian ti panagasawam, iti baet dagiti pannubok a mabalin a lumtuad.
Agbalin a napudno iti tunggal maysa. Agbalinka a napudno kadagiti katulagam iti kallaysa iti panunot, balikas, ken aramid. Laglagipem a kinuna ti Apo, “Ayatenyo ti asawayo a naimpusuan, ket makinaigkayo kenkuana laeng ket awanen ti sabali” (DkK 42:22). Ti sao nga “awanen ti sabali” ket isurona nga awan ti tao, aramid, wenno sanikua ti nasken a mangyuna iti pagnaiganyo nga agassawa.
Umadayokayo iti ania man a banag a makaiturong kadakayo nga agbalin a saan a napudno iti ania man a wagas. Ti pornograpia, dagiti naalas a panagpantasia, ken ang-angaw a panagayat, ket in-inutto a mangdadael iti kinataom ken mangperdi iti pundasion ti panagdennayo nga agassawa.
Agtinnulongkayo a mangimaton kadagiti pakaseknanyo iti kuarta. Agtinnulongkayo iti panangipasdek ken panangsurot iti panagbadyet. Disiplinaenyo ti bagiyo iti panaggastos, ken liklikanyo ti agpaadipen iti utang. Ti nainsiriban a panangimaton iti kuarta ken nawaya iti utang ket mangted iti talna iti pagtaengan.
Isentroyo ti biagyo iti ebanghelio ni Jesucristo. Agtinnulongkayo a mangtungpal kadagiti katulagan nga inaramidyo. Agkuyogkayo a mapan iti simbaan ken iti templo. Aggiddankayo nga agadal kadagiti nasantuan a kasuratan. Aggiddankayo nga agkararag a nakaparintumeng iti rugi ken gibus ti tunggal aldaw tapno agyaman iti Nailangitan nga Amayo para iti tunggal maysa kadakayo ken agkaduakayo iti panagkiddaw kadagiti bendisionna iti biagyo, iti pagtaenganyo, kadagiti ipatpategyo, ken kadagiti nalinteg a tarigagayyo. Ket tarabayennakayto ti Dios, ket dagiti inaldaw a pannakisarsaritayo Kenkuana mangisangbayto iti talna ken rag-o nga awanen ti sabali pay a paggapuanna. Sumayaatto ti panagkaduayo wenno panaglangenyo iti panaglabas dagiti tawen; mapapigsanto ti ayatyo. Dumur-asto ti panangbigbigyo iti pateg ti tunggal maysa.