Agnanayon a Biag
Impakdaar ti Apo, “Daytoy ti aramidko ken gloriak—mangipatungpal iti saan nga ipapatay ken agnanayon a biag ti tao” (Moises 1:39). Ti imortalidad ket panagbiag nga agnanayon kas nagungar a tao. Babaen ti Pannubbot ni Jesucristo, awatento ti tunggal maysa daytoy a sagut. Ti agnanayon a biag, wenno pannakaitan-ok, ket mangtawid iti lugar iti kangatuan a tukad ti celestial a pagarian, a pagindegantayonto iti sidong ti Dios ken agtultuloytayo kas sangapamiliaan (kitaen iti DkK 131:1–4). Kas iti imortalidad, maaramid a posible daytoy a sagut babaen ti Pannubbot ni Jesucristo. Nupay kasta, agkasapulan daytoy iti “panagtungpal kadagiti paglintegan ken ordinansa ti Ebanghelio” (Pagannurotan ti Pammati 1:3).
Panagtalinaed iti Dalan nga Agturong iti Biag nga Agnanayon
Idi nabuniaganka ken immawat iti sagut ti Espiritu Santo, simrekka iti dalan nga agturong iti agnanayon a biag. Insuro ni propeta Nephi:
“Ti ruangan a rumbeng a serkanyo isu ti panagbabawi ken pannakabuniag babaen ti danum; ket kalpasanna umayto ti pannakapakawan dagiti basolyo babaen ti apuy ken ti Espiritu Santo.
“Ket addakayon iti daytoy nailet ken akikid a dalan nga agturong iti agnanayon a biag; wen, nakastrekkayon iti ruangan; naaramidyon dagiti bilin ti Ama ken ti Anak; ket inawatyon ti Espiritu Santo, a mangsaksi iti Ama ken iti Anak; iti pannakatungpal ti kari nga inaramidna, a rumbeng nga awatenyo no sumrekkayo iti dayta a dalan” (2 Nephi 31:17–18).
Inyunay-unay ni Nephi a kalpasan ti pannakastrektayo iti daytoy “nailet ken akikid a dalan,” nasken nga agibturtayo agingga iti panungpalan a sipapammati:
“Kalpasan ti pannakastrekyo ditoy nailet ken akikid a dalan, saludsodek no nalpasen ti amin? Adtoy, kunak kadakayo, Saan; gapu ta saankayo pay a nakaadayo malaksid no babaen ti balikas ni Cristo nga addaan iti natibker a pammati kenkuana, ken naan-anay a panagtalek kenkuana a kas mannakabalin a mangisalakan.
“Gapuna masapul nga agtultuloykayo a sitatalingenngen ken ni Cristo, nga addaan iti naan-anay a kinalawag ti namnama, ken ayat iti Dios ken iti amin a tao. Gapuna, no agtultuloykayo, nga agpennek iti balikas ni Cristo, ken agibtur agingga iti panungpalan, adtoy, kuna ti Ama: Maaddaankayto iti biag nga agnanayon” (2 Nephi 31: 19–20).
Ita ta nabuniagan ken nakumpirmaankan, ti kaaduan a panagdur-asmo nga agturong ti agnanayon a biag ket agpannuray iti panangawatmo kadagiti ordinansa ti pannakaisalakan: para kadagiti lallaki, ordinasion iti Melchizedek Priesthood; para kadagiti lallaki ken babbai, ti endowment iti templo ken pannakailantip iti kallaysa. No awatem dagitoy nga ordinansa ken tungpalem dagiti katulagan a karagpin dagitoy, isaganam ti bagim nga agtawid iti kangatuan a tukad ti celestial a gloria.
Sidadaan a Magun-odmo
No utobem ti panagdur-asmo iti “nailet ken akikid a dalan,” manamnama a sidadaan a magun-odmo ti agnanayon. Kayat ti Apo nga agsublika Kenkuana, ken iti kaano man saanto nga agkasapulan iti ania man a banag kenka a saanmo a kabaelan nga ipatungpal. Naisangrat ti amin a bilinna a mangitandudo ti pagragsakam. No aramatem ti pammatim ken agserbika Kenkuana iti amin a kabaelam, mangted kenka iti pigsa ken magipaay iti maysa a wagas a pangaramidam iti ania man a banag nga ibilinna kenka (kitaen iti 1 Nephi 3:7). Laglagipem a no itedmo ti kadakkelan a panagkagumaam ket agbabawika kadagiti basbasolmo, ti Pannnubbot ni Jesucristo ti mangbayadto para iti pagkapsutam ken para kadagiti basbasol, pannakadangran, ken sasaem a mapasaram iti daytoy a biag: “Ammotayo a maisalakantayo babaen ti parabur, kalpasan ti amin nga aramidtayo” (2 Nephi 25:23).