Kinapudno
Dakamaten ti maikasangapulo-ket-tallo a pagannurotan ti pammati, “Mamatikami iti kinapudno.” Ti agbalin a napudno ket kaipapananna ti agbalin a natarnaw, saan nga ulbod, ken awan ti panagallilaw iti amin a gundaway.
No napudnoka iti tunggal wagas, kabaelam ti mangsagrap iti talna ti panunot ken mangpatalinaed iti respeto iti bagi. Mapadur-asmo ti pigsa ti kinatao, a mangipalubos kenka a makapagserbi iti Dios ken iti dadduma pay. Mapagtalkanka iti imatang ti Dios ken kadagiti adda iti aglawlawmo.
Iti sabali a bangir, no saanka a napudno kadagiti balikas wenno aramidmo, mapasakitam ti bagim ken masansan a mapasakitam pay dagiti dadduma. No agulbod, agtakaw, agkusit, wenno agliwayka a mangted iti naan-anay a panagbannog para iti sueldom, mapukawmo ti respeto iti bagim. Mapukawmo ti pannarabay ti Espiritu Santo. Matakuatam a nadadaelmon dagiti relasion kadagiti miembro ti pamilia ken gagayyem ken saandakan a mapagtalkan dagiti tao.
Ti panagbalin a napudno ket masansan nga agkasapulan iti tured ken sakripisio, nangnangruna no padasen dagiti dadduma ti manguyot kenka a mangikalintegan iti ugali a naulbod. No matakuatam ti bagim iti kasta a kasasaad, laglagipem a ti manayon a talna a sumangbay manipud iti panagbalin a napudno ket napatpateg ngem iti apagkanito a gin-awa iti panangsurot iti ummong.