Panagkaykaysa
Sakbay laeng ti panangipatungpal ti Mangisalakan iti Pannubbot, inkararaganna dagiti disipulona, nga imbaonna iti lubong tapno isuroda ti ebanghelio. Inkararaganna pay dagiti mamati Kenkuana gapu kadagiti balikas dagiti disipulona. Inyararawna ti panagkaykaysa: “Tapno isuda amin agmaymaysada koma: a kas met sika, Ama, kaniak, ket sika kenka, tapno addada met koma kadata; tapno ti lubong patienna koma a sika imbaonnak” (Juan 17:21).
Manipud iti daytoy a kararag masursurotayo no kasano a pagkaykaysaennatayo ti ebanghelio iti Nailangitan nga Ama ken ni Jesucristo ken iti tunggal maysa. No agbiagtayo iti ebanghelio, nga awatentayo dagiti pangisalakan nga ordinansa ken agtungpal kadagiti katulagantayo, agbalbaliw dagiti kadawyantayo. Ti Pannubbot ti Mangisalakan ti mangpasanto kadatayo, ket makapagbiagtayo iti panagkaykaysa, a mangsagrap iti talna iti daytoy a biag ken agsagana a makipagindeg iti Ama ken iti Anakna iti agnanayon.
Kinuna ti Apo, “No saankayo nga agkaykaysa saankayo a kukua” (DkK 38:27). Mabalinmo a kalikaguman ken itandudo daytoy a pagrukodan ti panagkaykaysa iti pamiliam ken iti Simbaan. No naasawaanka, mabalinyo nga agassawa ti agkaykaysa iti panggep ken tignay. Mabalinyo a pagtunosen dagiti naidumduma a kababalinyo iti tunggal maysa bayat ti panangsangoyo kadagiti karit a sangkamaysa ken dumur-as iti ayat ken pannakaawat. Mabalinyo pay ti makikaykaysa kadagiti dadduma pay a miembro ti pamilia ken kadagiti miembro ti Simbaan babaen ti panagserbi a sangkamaysa, panangisuro iti tunggal maysa, ken panangpapigsa iti tunggal maysa. Mabalinmo ti makikaysa iti Presidente ti Simbaan ken iti dadduma pay a lider ti Simbaan bayat ti panagadalmo kadagiti balikasda ken panangsurot iti balakadda.
Bayat ti panagdur-as ti Simbaan iti intero a lubong, mabalin nga agkaykaysa ti amin a Santo iti Ud-udina nga Aldaw. Mabalin a “mapagrereppeng ti puspuso[tayo] iti panagkaykaysa ken ayat iti tunggal maysa” (Mosiah 18:21). Madayawtayo ti panagduduma iti kultura ken panaggigidiat ti tunggal maysa, ngem agkalikagumtayo pay iti “panagkaykaysa iti pammati” a sumangbay no surotentayo dagiti naparegta a lider ken laglagipen nga annaknatayo ti maymaysa nga Ama (kitaen iti Taga Efeso 4:3–6, 11–13).