Panagrukbab
Ti agrukbab iti Dios ket mangted Kenkuana iti ayat, panagraem, serbisio, ken debosionmo. Binilin ti Apo ni Moises, “Agdaydayawka iti Dios, ta isu laeng ti pagserbiam” (Moises 1:15). Iti daytoy a dispensasion imbilinna, “Ayatenyo ti Apo a Diosyo, iti amin a pusoyo, iti amin a kabaelan, panunot ken pigsayo; ket iti nagan ni Jesucristo pagserbianyo” (DkK 59:5). No ad-adda nga ipangrunam nga ayaten ti asino man a tao wenno banag ngem ti Dios, agar-aramidka iti palso a panagrukbab, wenno nalabes a panagayat iti didiosen (kitaen iti Exodo 20:3–6).
Ti kararag ket maysa a wagas a pakapagrukbabam iti Ama. Insuro ni Alma iti anakna a ni Helaman, “Umararawka iti Dios iti amin a kasapulam; wen, italekmo amin nga aramidmo iti Apo, ket sadino man a papanam agturongda koma iti Apo; wen, maiturong koma amin a pampanunotmo iti Apo; wen, bay-am a ti pammateg ti pusom maipaay iti Apo iti agnanayon” (Alma 37:36).
Nasken a dar-ayam dagiti mitingmo iti Simbaan nga addaan iti espiritu ti panagrukbab. Imbilin ti Apo: “Tapno ad-adda a mapagtalinaedyo ti bagiyo nga awanan mulit iti lubong, mapankayo iti balay a pagkararagan ket mangidatonkayo iti sakramento iti nasantuan nga aldawko; ta pudno a daytoy ti aldaw a naituding a panaginanayo kadagiti trabahoyo, ken ti panagdaydayawyo iti Kangatuan” (DkK 59:9–10).
Ti pannakiramanmo kadagiti ordinansa iti priesthood ket paset pay ti panagrukbabmo. Bayat ti siraraem a pannakiranudmo iti sakramento ken idadar-ay iti templo, lagipem ken pagrukbabam ti Nailangitan nga Amam ken ipeksam ti panagyamanmo para iti Anakna, ni Jesucristo.
Mainayon pay iti panangipakita kadagiti akinruar a panangipeksa iti panagrukbab, nasken nga addaanka iti managrukbab nga ugali sadino man ti papanam ken iti amin a banag nga aramidem. Insuro ni Alma daytoy a pagbatayan iti maysa a grupo dagiti tao a napapanaw iti lugar a pagrukbabanda. Tinulonganna ida a mangkita a saan nga agpaut ti pudno a panagrukbab iti maysa nga aldaw ti makalawas (kitaen iti Alma 32:11). Iti pannakisarita iti isu met la a grupo dagiti tao, inallukoy isuda ti kadua ni Alma a ni Amulek nga “agdayawkayo iti Dios, iti uray ania a disso a yanyo, iti espiritu ken kinapudno” (Alma 34:38).