Ipapatay, Pisikal nga
Ti pisikal nga ipapatay ket pannakisina ti espiritu manipud iti mortal a bagi. Nangisangbay ti Pannakatnag ni Adan iti pisikal nga ipapatay iti lubong (kitaen iti Moises 6:48).
Ti ipapatay ket maysa a napateg unay a paset ti plano ti pannakaisalakan ti Nailangitan nga Ama (kitaen iti 2 Nephi 9:6). Tapno agbalintayo a kas iti Agnanayon nga Amatayo, nasken a mapadasantayo ti ipapatay ket iti kamaudiananna umawat iti naan-anay, nagungar a bagi.
No matay ti pisikal a bagi, agtultuloy nga agbiag ti espiritu. Iti lubong dagiti espiritu, ti espiritu dagiti nalinteg ket “maawat … iti kasasaad ti kinaragsak, a maawagan iti paraiso, ti panaginana a kasasaad, ti natalged a kasasaad, a paginanaanda iti amin a parikutda ken amin a panagdandanag, ken panagleddaang” (Alma 40:12). Maysa a lugar a maawagan iti pagbaludan ti espiritu ti naireserba para “kadagiti natay a sibabasol, a di nakaammo iti kinapudno, wenno nagsalungasing, a nangsupring kadagiti propeta” (DkK 138:32). Dagiti espiritu iti pagbaludan ket “naisuro … iti pammati iti Dios, panagbabawi iti basol, panangisaup [vicarious] a panagbuniag para iti pannakaugas ti basbasol, ti sagut ti Espiritu Santo babaen ti panangipatay kadagiti dakulap, ken amin a sabsabali pay a pagbatayan ti ebanghelio a nasken a maammuanda” (DkK 138:33–34). No awatenda dagiti pagbatayan ti ebanghelio, agbabawida iti basbasolda, ken awatenda dagiti ordinansa a naannong para kadakuada kadagiti templo, maawatdanto iti paraiso.
Gapu iti Pannubbot ken Panagungar ni Jesucristo, temporario laeng wenno saan nga agnanayon ti pisikal nga ipapatay: “Ta kas matayda amin ken Adan, kasta met a mabiagdanto amin ken Cristo” (1 Taga Corinto 15:22). Agungarto ti amin, kayatna a sawen a tumiponto ti espiritu ti tunggal tao iti bagina—“maisublinto … iti sigud ken naan-anay a bagina” ket saanen a maipasango iti ipapatay (Alma 40:23; kitaen met iti Alma 11:44–45).
Nalabit a nakariknakan iti sakit a sumangbay iti ipapatay ti maysa a miembro ti pamilia wenno gayyem. Gagangay a makarikna iti ladingit iti kakasta a panawen. Kinapudnona, ti panagleddaang ket maysa kadagiti kangrunaan a pangipeksa iti ayat. Kinuna ti Apo, “Agbiagkayo a sangsangkamaysa iti ayat, iti kasta lumdaangkayo iti isisina ti matay” (DkK 42:45). Ti kakaisuna a wagas a mangikkat iti ladingit gapu iti ipapatay ket ti mangikkat iti ayat iti biag.
Uray no agleddaangka iti ipapatay dagiti ipatpategmo, maawatmo ti liwliwa iti kari ti panangungar ken iti pammatalged a mabalin nga agdedenna dagiti pamilia iti agnanayon. Mabalinmo a “[makita] ti napateg a gapu ti ladingit, ken kasta met ti ragragsak—ladingit gapu iti patay ken pannakadadael dagiti tao, ken rag-o gapu iti silaw ni Cristo iti biag” Alma 28:14; kitaen met iti Alma 28:9–13).
Kas nayon iti panangawat iti liwliwa no matay ti maysa nga ipatpateg, maaddaanka iti talna iti pannakaammo nga iti kamaudianan mataykanto. Bayat ti panagtungpalmo iti ebanghelio, malagipmo ti kari ti Apo: “Dagiti matay kaniak didanto maramanan ti patay, ta nasam-itto para kadakuada” (DkK 42:46).