Panangtiped iti Panaganak

No kabaelan iti bagi dagiti agassawa, addaanda iti pribilehio a mangted kadagiti mortal a bagi para kadagiti espiritu nga annak ti Nailangitan nga Ama. Adda papel nga akmenda iti naindaklan a plano ti kinaragsak, a mangipalugod kadagiti annak ti Dios tapno umawat kadagiti pisikal a bagi ken mangpadas iti mortalidad wenno biag iti daga.

No naasawaankan nasken a pagsaritaanyo nga agassawa ti sagrado a pagrebbenganyo a mangisangbay kadagiti annak iti lubong ken patanorenyo ida iti kinalinteg. No aramidenyo daytoy, ibilangyo ti kinasagrado ken kaipapanan ti biag. Utobenyo ti rag-o a sumangbay no adda dagiti annak iti pagtaengan. Ibilangyo dagiti agnanayon a bendision a sumangbay manipud iti kaadda iti nasayaat a kaputotan. Addaan iti pammaneknek maipapan kadagitoy a pagbatayan, maisaganakayonto iti asawam a nainkararagan nga ikeddengyo no mano nga annak ti paaddaen ken no kaano a maaddaan kadakuada. Dagiti kasta a pangngeddeng ket nagbaetan iti dua kadakayo ken iti Apo.

Bayat ti panangilawlawagmo maipapan iti daytoy sagrado a banag, laglagipem nga inanamongan ti Dios dagiti seksual a relasion iti uneg ti kallaysa. Idinto ta ti maysa a panggep dagitoy a relasion ket tapno mangipaay kadagiti pisikal a bagi para kadagiti annak ti Dios, sabali pay a panggep ket tapno mangipeksa iti ayat iti tunggal maysa—tapno mangbegkes iti agassawa a sangkamaysa iti kinapudno, konsiderasion, ken agkaykaysa a panggep.