Priesthood
Ti priesthood ti agnanayon a bileg ken turay ti Dios. Babaen ti priesthood pinarsua ti Dios ken iturayanna dagiti langit ken ti daga. Babaen daytoy a bileg subboten ken itan-okna dagiti annakna, a mangisangbay iti “saan nga ipapatay ken agnanayon a biag ti tao” (Moises 1:39).
Naited ti Turay ti Priesthood kadagiti Lallaki iti Daga
Ited ti Dios ti turay ti priesthood kadagiti maikari a lallaki a miembro ti Simbaan tapno makapagtignayda iti naganna para iti pannakaisalakan dagiti annakna. Mabalin a mapusgan dagiti addaan iti priesthood a mangikasaba iti ebanghelio, mangannong kadagiti ordinansa ti pannakaisalakan, ken mangituray iti pagarian ti Dios iti daga.
Mabalin a rugian dagiti lallaki a miembro ti Simbaan ti serbisio ti priesthoodda no madanonda ti tawen a 12. Rugianda babaen ti pannakaaddaanda iti Aaronic Priesthood, ket iti saan a mabayag mabalinda a maikari a maaddaan iti Melchizedek Priesthood a maitalek kadakuada. Iti nadumaduma a paset ti biagda, ken bayat ti panangisaganada iti bagbagida nga umawat kadagiti nadumaduma a pagrebbengan, agiggemda iti nadumaduma a saad iti priesthood, kas iti deacon, teacher, wenno priest iti Aaronic Priesthood ken elder wenno high priest iti Melchizedek Priesthood. (Para iti nalawag nga impormasion maipapan iti Aaronic ken Melchizedek Priesthood, kitaen kadagiti panid 3–4 ken 93–94).
Para iti maysa a lalaki a miembro ti Simbaan tapno maaddaan iti priesthood, nasken nga italek daytoy kenkuana ti napusgan nga addaan iti priesthood ket ordenanna isuna iti maysa a saad iti dayta a priesthood (kitaen iti Hebreo 5:4; DkK 42:11; Pagannurotan ti Pammati 1:5).
Nupay maipaay ti turay ti priesthood laeng kadagiti maikari a miembro a lallaki ti Simbaan, sidadaan a magun-od dagiti amin a —lallaki, babbai, ken ubbing dagiti bendision ti priesthood. Mairanudtayo amin manipud iti impluwensia ti nalinteg a panangidaulo ti priesthood, ken addaantayo amin iti pribilehio nga umawat kadagiti pangisalakan nga ordinansa ti priesthood.
Priesthood ken ti Pamilia
Ti kapatgan a pannakaaramat ti priesthood ket maaramid iti pamilia. Tunggal asawa a lalaki ken ama iti Simbaan ket nasken nga ikagumaanna ti agbalin a maikari a maaddaan iti Melchizedek Priesthood. Kaduana ti asawana a kas kapada a kapareha, mangidaulo isuna iti kinalinteg ken ayat, nga agserbi kas naespirituan a lider ti pamilia. Idauluanna ti pamilia iti kanayon a panagkararag, panagadal iti nasantuan a kasuratan, ken family home evening. Makitinnulong iti asawana a mangisuro kadagiti annak ken tulonganna ida nga agsagana nga umawat kadagiti ordinansa ti pannakaisalakan (kitaen iti DkK 68:25–28). Itedna dagiti pammendision ti priesthood para iti pangiturong, panagagas, ken pannakaliwliwa.
Adu a miembro ti awanan kadagiti napudno nga addaan iti Melchizedek Priesthood iti pagtaenganda. Nupay kasta, babaen ti panagserbi dagiti home teacher ken dadaulo ti priesthood, mananam ti amin a miembro ti Simbaan dagiti bendision ti bileg ti priesthood iti biagda.
Dagiti Korum ti Priesthood
Ti maysa a korum ti priesthood ket nabukel a grupo dagiti kakabsat a lallaki nga addaan iti isu met la a saad ti priesthood. Dagiti kangrunaan a panggep dagiti korum ket agserbi kadagiti dadduma, mangbangon iti panagkaykaysa ken panagkikinnabsatan, ken isuro ti tunggal maysa kadagiti doktrina, pagbatayan, ken pagrebbengan.
Adda dagiti korum iti amin a lebel ti organisasion ti Simbaan. Buklen ti Presidente ti Simbaan ken dagiti mammagbagana ti Korum ti Umuna a Presidente. Buklen pay ti maysa a korum dagiti Sangapulo-ket-dua nga Apostol. Mabukel a korum dagiti Pitupulo, agpada a General Authority ken Area Authority. Idauluan ti tunggal stake president ti maysa a quorum dagiti high priest, a buklen ti amin a high priest iti stake. Addaan ti tunggal ward wenno branch kadagiti korum dagiti elder, priest, teacher, ken deacon. Mabukel dagiti high priest kadagiti ward, nga agserbi kadagiti grupo dagiti high priest.
Home Teaching
Manipud iti kanito a pannakaorden dagiti addaan iti priesthood iti saad ti teacher, addaanda iti gundaway ken pagrebbengannga agserbi a kas home teacher. Iti kastoy a wagas agtrabahoda iti pannakaipatungpal ti pagrebbenganda a “mangkitkita a kanayon iti simbaan, ken makipulapol ken magpapigsa kadakuada” (DkK 20:53).
Addaan dagiti home teacher iti sagrado a pagrebbengan nga agbalin nga umuna a pagtaudan ti tulong iti Simbaan kadagiti indibidual ken pamilia. Sarungkaranda dagiti naidutok kadakuada a miembro iti uray maminsan laeng ti binulan. Iti panagserbi ken panangsarungkarda kadagiti naidutok kadakuada a miembro, tulonganda dagiti nagannak kadagiti pagrebbenganda, isuroda ti ebanghelio iti tunggal miembro ti pamilia, patanorenda dagiti panaggagayyem, ken tulonganda dagiti miembro nga agsagana nga umawat kadagiti ordinansa iti templo ken agbiag a maikari kadagiti bendision ti ebanghelio.
Penken dagiti lider kadagiti ward ken branch a maidutok dagiti home teacher iti tunggal pamilia wenno indibidual. Agsurnadda a kaduada dagiti home teacher tapno tumulong a mangipaay kadagiti naespirituan ken temporal a kasapulan ti tunggal miembro.
Dagiti Tulbek ti Priesthood
Ti panangaramat iti turay ti priesthood iti Simbaan ket iturayan dagiti agiggem kadagiti tulbek ti priesthood (kitaen iti DkK 65:2; 124:123). Addaan dagiti agiggem kadagiti tulbek ti priesthood iti karbengan a mangidaulo ken mangiturong iti Simbaan iti beddeng ti maysa a lugar a masakupan. Kas pagarigan, iggem ti bishop dagiti tulbek ti priesthood a mangpabalin kenkuana a mangidaulo iti wardna. Ngarud, no naisagana a mabuniagan ti maysa nga ubing iti dayta a ward, nasken nga awaten ti tao a mangbuniag iti ubing ti pammalubos ti bishop.
Iggem ni Jesucristo ti amin a tulbek ti priesthood. Intedna kadagiti Apostolna dagiti tulbek a kasapulan para iti panangituray iti Simbaanna. Ti laeng senior nga Apostol, ti Presidente ti Simbaan, ti mabalin a mangusar (wenno mangdutok iti sabali a tao a mangusar) kadagitoy a tulbek para iti panangituray iti sibubukel a Simbaan (kitaen iti DkK 43:1–4; 81:2; 132:7).
Ti Presidente ti Simbaan ti mangipakumit kadagiti tulbek ti priesthood iti dadduma pay a dadaulo ti priesthood tapno mabalinda ti mangidaulo kadagiti lugar a masakupan ti pagrebbenganda. Maipaay dagiti tulbek ti priesthood kadagiti presidente dagiti templo, mision, stake, ken district; dagiti bishop; dagiti branch president; ken dagiti presidente ti korum. Ti tao nga agserbi iti maysa kadagitoy a takem ket iggemna laeng dagiti tulbek agingga a mapalusposan isuna. Saan nga umawat dagiti mammagbaga kadagiti tulbek, ngem umawatda iti turay ken pagrebbengan babaen ti panagawag ken panagdutok.
Panangaramat iti Priesthood a Sililinteg
No maysaka nga addaan iti priesthood, laglagipem a nasken a maysa a pasetmo ti priesthood iti amin a kanito ken iti amin a kasasaad. Saan a kas iti maysa a kagay a mabalinmo nga ikawes ken uksoben no kayatmo. Ania man nga ordinasion iti saad ti priesthood ket maysa nga awag iti tungpal biag a panagserbi, nga addaan iti kari a ti Apo ket pagbalinenna a maikarikanto a mangaramid iti trabahona a mayannurot iti kinapudnom.
Nasken a maikarika tapno umawat ken mangaramat iti bileg ti priesthood. Dagiti balikas nga isaom ken ti inaldaw nga ugalim ti mangaring iti kabaelam nga agserbi. Nasken nga awan pakadillawan ti ugalim iti kaaduan. Ad-adda pay a napateg ti ugalim iti pribado. Babaen ken ni Propeta Joseph Smith, impakdaar ti Apo a “dagiti kalintegan iti kinasaserdote saan a mabalin nga isina kadagiti bileg ti langit, ken dagiti bileg ti langit saan a matengngel wenno maiggaman no saan laeng a kadagiti pagbatayan ti kinalinteg” (DkK 121:36). Binallaaganna dagiti addaan iti priesthood:
“No ikagumaantayo nga ilimed dagiti basoltayo, wenno pagustuan ti dayawtayo, ti awan kaes-eskanna nga arapaaptayo, wenno mangtimbeng wenno mangituray wenno mangpilit kadagiti kararua dagiti annak ti tattao iti ania man a kadagsen ti kinikillo nga aramid, adtoy, adaywan ida ti langit; maldaangan ti Espiritu ti Apo; ket no naibabawin, Amen iti kinasaserdote wenno ti panangituray dayta a tao. Adtoy, ammona a nagbiddut, nabati kenkuana” (DkK 121:37–38).
Saanmo a mapagtalinaed ti ania man a bileg wenno pangaring iti priesthood malaksid no “babaen laeng ti panangguyugoy, babaen ti naunday a panagitured, babaen ti kinaanus ken kinaemma, ken babaen ti di aginkukuna nga ayat; babaen ti kinamanangngaasi, ken natarnaw a pannakaammo, a mangpadakkel iti kararua nga awanan iti panaginkukuna, ken awanan iti kinasikap.” No sika ket “matignay iti Espiritu Santo” a mangatur iti maysa a tao, mangipakita kalpasanna iti “nalablabon a panagayatna iti inaturna, no saan agbalinka a kabusorna” tapno maammuanna a nabilbileg ti kinapudnom ngem iti kurdon ni patay” (DkK 121:41–43).
No aramatem ti priesthood iti kinalinteg ken ayat, masarakamto ti rag-o iti panagserbim kas maysa a ramit kadagiti ima ti Apo. Kinunana:
“Mapno koma met ti lalaemmo iti kinamanangngaasi kadagiti amin a tao, ken kadagiti kapammatian, ken taraonan koma ti saguday ti pampanunotmo nga awan ressatna; sa kalpasanna mapapigsa ti panagtalekmo iti imatang ti Dios; ken mailimog koma iti kararuam ti doktrina ti kinasaserdote a kas iti linnaaw nga aggapu iti langit.
“Ti koma Espiritu Santo ti kanayon a kaduam, ket ti setrom isu ti setro ti di agbalbaliw a kinalinteg ken kinapudno; ket ti panangituraymo isu ti agnanayon a panangituray, ket agburayok koma kenka ti awan pammilit a wagas iti agnanayon nga awan inggana” (DkK 121:45–46).