Aaronic Priesthood
Bayat ti panangipatarus ni Propeta Joseph Smith iti Libro ni Mormon, nasarakanna ti pannakadakamat maipapan iti panagbuniag para iti pannakaugas dagiti basol. Idi Mayo 15, 1829, napanda iti para suratna a ni Oliver Cowdery iti kakaywan tapno agsaludsodda iti Apo maipanggep iti panagbuniag. Kabayatan ti panagkararagda, “bimmaba ti mensahero manipud iti langit iti naraniag nga ulep.” Ni Juan Bautista daytoy a mensahero, ti propeta a nangbuniag ken ni Jesus kadagiti immun-una a siglo. Ni Juan Bautista, a maysa itan a nagungar a tao, ket impatayna dagiti dakulapna kada Joseph ken Oliver ket intalekna iti tunggal maysa kadakuada ti Aaronic Priesthood, a naipanaw idin iti daga kabayatan ti Nakaro nga Ikakalilis iti Kinapudno. Babaen iti daytoy a turay, kinabaelan da Joseph ken Oliver ti nagbinnuniag iti tunggal maysa. Kitaen iti Joseph Smith—Pakasaritaan 1:68–72.)
Iti Simbaan iti agdama, mabalin dagiti maikari a lallaki a miembro ti umawat iti Aaronic Priesthood mangrugi iti tawen a 12. Umawatda iti adu a gundaway a makiraman kadagiti sagrado nga ordinansa iti priesthood ken mangted iti serbisio. Bayat ti panangipatungpalda a sikakari kadagiti pagrebbenganda, agtignayda iti nagan ti Apo a mangtulong kadagiti dadduma nga umawat kadagiti bendision ti ebanghelio.
Dagiti takem ti Aaronic Priesthood ket bishop, priest, teacher, ken deacon. Babaen ti pammalubos ti mangimatmaton a dadaulo ti priesthood (gagangay a ti bishop wenno branch president), ibunong dagiti deacon ti sakramento. Tulonganda ti bishop wenno branch president a mangaywan kadagiti miembro ti Simbaan babaen ti panangted iti serbisio ken panangtulong kadagiti pakaseknan a temporal a kas iti panangummong kadagiti daton iti panagayuno. Mabalin nga aramiden dagiti teacher ti amin a pagrebbengan dagiti deacon, ken umawatda pay iti dadduma pay a gundaway a makapagserbi. Isaganada ti tinapay ken danum iti sakramento ken agserbida a kas home teacher. Mabalin nga aramiden dagiti priest ti amin a pagrebbengan dagiti deacon ken teacher. Babaen iti pammalubos ti mangimatmaton a dadaulo ti priesthood, mabalinda pay ti mangbendision iti sakramento, mangbuniag, ken mangorden iti dadduma kadagiti takem ti priest, teacher, ken deacon.
Ti Aaronic Priesthood ket “mainayon iti nangatngato, wenno Melchizedek Priesthood” (DkK 107:14). Masansan a maawagan daytoy iti pangisagana a priesthood. Bayat panagserbi ti maysa nga addaan iti priesthood iti Aaronic Priesthood, agsagana isuna nga umawat iti Melchizedek Priesthood, umawat kadagiti bendision ti templo, agserbi iti full-time a mision, agbalin a managayat nga asawa ken ama, ken agtultuloy iti panagserbi iti Apo agingga iti tungpal biag.