Zion

Aglaon ti Doktrina ken Katulagan iti adu a binatog a nangbilinan ti Apo kadagiti Santo a “kalikagumanyo a yeg ken ipasdek ti pagsayaatan ti Zion” (DkK 6:6; kitaen met iti DkK 11:6; 12:6; 14:6).

Ti balikas a Zion ket addaan iti nadumaduma a kaipapanan kadagiti nasantuan a kasuratan. Ti kangrunaan a sapasap a kaipapanan ti balikas ket “ti natarnaw ti panagpuspusona” (DkK 97:21). Ti Zion ket masansan a mausar iti kastoy a wagas a mangitudo kadagiti tao ti Apo wenno ti Simbaan ken dagiti stake daytoy (kitaen iti DkK 82:14).

Kadagiti nagkauna nga aldaw daytoy a dispensasion, binalakadan dagiti lider ti Simbaan dagiti miembro a mangbangon iti Zion babaen ti panagdappatda iti akintengnga a lugar. Iti agdama balakadandatayo dagiti lidertayo a mangbangon iti Zion sadino man ti pagnaedantayo. Makiddaw kadagiti miembro ti Simbaan nga agtalinaedda kadagiti nakayanakanda a daga ket tumulongda a mangipasdek iti Simbaan idiay. Mabangbangon dagiti adu a templo tapno makaawat dagiti Santo iti Ud-udina nga Aldaw iti intero a lubong kadagiti bendision ti templo.

Ti balikas a Zion ket maitudo pay kadagiti naipangruna a disso ti heograpia, kas iti sumaganad:

• Ti siudad ti Enoc (kitaen iti Moises 7:18–21).

• Ti nagkauna a siudad ti Jerusalem (kitaen iti 2 Samuel 5:6–7; 1 Ar-ari 8:1; 2 Ar-ari 9:28).

• Ti Baro a Jerusalem, a mabangonto iti Jackson County, Missouri (kitaen iti DkK 45:66–67; 57:1–3; Pagannurotan ti Pammati 1:10).

Dagiti mainayon a reperensia: Isaias 2:2–3 ; 1 Nephi 13:37; DkK 35:24 ;39:13; 45:68–71; 59:3–4; 64:41–43; 90:36–37; 97:18–28; 101:16–18; 105:5; 115:5–6; 136:31