Pammaneknek
Ti pammaneknek ket maysa a naespirituan a panagsaksi a maited babaen ti Espiritu Santo. Ti pundasion ti pammaneknek ket maysa a pannakaammo a sibibiag ti Dios ken ay-ayatennatayo; a sibibiag ni Jesucristo, nga Isu ti Anak ti Dios, ken impatungpalna ti awan inggana a Pannubbot; a ni Joseph Smith ti propeta ti Dios a naawagan a mangisubli iti ebanghelio; nga idadauluannatayo ti maysa a sibibiag a propeta iti agdama; ken ti Ti Simbaan ni Jesucristo dagiti Santo iti Ud-udina nga Aldaw ti pudno a Simbaan ni Cristo iti daga. Babaen daytoy a pundasion, dumakkel ti maysa a pammaneknek a mangiraman iti amin a pagbatayan ti ebanghelio.
Pananggun-od ken Panangpapigsa iti Pammaneknek
Kas miembro ti Ti Simbaan ni Jesucristo dagiti Santo iti Ud-udina nga Aldaw, addaanka it sagrado a gundaway ken pagrebbengan a manggun-od iti bukodmo a pammaneknek. Iti pannakagun-odmo iti pammaneknek, addaanka iti pagrebbengan a mangtaraon iti daytoy iti unos ti biagmo. Ti panagragsakmo iti daytoy a biag ken iti unos ti kinaagnanayon ket agpannuray unay iti no sika ket “natured iti pammaneknek ni Jesus” (DkK 76:79; kitaen met iti 76:51, 74, 101). Kabayatan ti panangitrabahom iti daytoy a proseso, laglagipem dagiti sumaganad a pagbatayan:
Mangrugi ti panagsapul iti pammaneknek babaen ti nalinteg, napudno a tarigagay.
Bendisionannakanto ti Nailangitan nga Amam a mayannurot kadagiti nalinteg a tarigagay ti pusom ken dagiti panagkagumaam a mangaramid iti pagayatanna. Iti pannakisaona iti maysa a grupo dagiti tao nga awanan pay iti pammaneknek iti ebanghelio, insuro ni Alma: “No riingen ken bangonenyo dagiti pampanunotyo, uray no padasenyo dagiti balikasko, ken tibnokanyo iti bassit a pammati, wen, uray no diyo tarigagayan ti ad-adu a panamati, bay-anyo dayta a tarigagay a mangtignay kadakayo, uray no agingga laeng a mamatikayo iti kasasaad a makaitedkayo iti lugar a pakaibislinan dagiti balikasko” (Alma 32:27).
Umay ti pammaneknek babaen ti naulimek nga impluwensia ti Espiritu Santo.
Dagiti bunga ti pammaneknek ket mabalin a namilagruan ken makapagbalbaliw iti biag, ngem ti sagut ti pammaneknek ket gagangay nga umay a kas naulimek a pammatalged, nga awan ti nakaskasdaaw a pannakaiparangarang ti bileg ti Dios. Uray ni Alma, a sinarungkaran ti maysa nga anghel ken nakitana a nakatugaw ti Dios iti tronona, ket kinasapulanna ti nagayuno ken nagkararag tapno makaawat iti maysa a pammaneknek babaen ti bileg ti Espiritu Santo (kitaen iti Alma 5:45–46; 36:8, 22).
In-inutto a dumakkel ti pammaneknekmo babaen dagiti padasmo.
Awan ti umawat iti naan-anay a pammaneknek iti madagdagus. Dumakkelto a napigpigsa ti pammaneknekmo babaen dagiti padasmo. Dumakkelto daytoy kabayatan ti panangipakitam iti kinatallugodmo nga agserbi iti Simbaan, no maawaganka. Dumur-asto daytoy kabayatan ti panangaramidmo kadagiti pangngeddeng nga agtungpal kadagiti bilin. Kabayatan ti panangitag-ay ken panagpapigsam kadagiti dadduma, makitamto nga agtultuloy a dumur-as ti pammaneknekmo. Bayat ti panagkararag ken panagayunom, panagadal kadagiti nasantuan a kasuratan, idadar-ay kadagiti miting ti Simbaan, ken panangdengngeg kadagiti dadduma a mangibinglay kadagiti pammaneknekda, mabendisionankanto kadagiti kanito ti pammaregta a mangpapigsa iti pammaneknekmo. Umayto dagiti kasta a kanito iti unos ti biagmo bayat ti panagkagumaam nga agbiag iti ebanghelio.
Dumur-asto ti pammaneknekmo bayat panangiburaymo iti daytoy.
Saanmo nga urayen a naan-anay a mapadur-as ti pammaneknekmo sakbay nga ibinglaymo daytoy. Umay ti paset ti pannakapadur-as ti pammaneknekmo no maibinglay daytoy. Kinapudnona, matakuatamto a no mangtedka iti no ania ti adda kenka iti pammaneknekmo, maisublinto kenka—iti dakdakkel.
Panangibinglay iti Pammaneknek
Kadagiti miting iti panagayuno ken panagpaneknek ken kadagiti pannakisarsaritam kadagiti miembro ti pamiliam ken gagayyem, mabalin a mariknam a maguyugoyka a mangibinglay iti pammaneknekmo. Kadagiti kasta a gundaway, laglagipem a saanmo a kasapulan ti mangibinglay iti atiddog, ken makaawis rikna a bitla. Agbalinto a kabilgan ti pammaneknekmo no maipeksa daytoy kas maysa nga ababa, naimpusuan a natibker a pammati maipapan ti Mangisalakan, dagiti pannursurona, ken ti Pannakaisubli. Agkararagka para iti pannarabay, ket tulongannakanto ti Espiritu a mangammo no kasano a mayebkas dagiti rikna iti pusom. Makasarakkanto iti naindaklan a rag-o bayat ti panangtulongmo kadagiti dadduma a makibinglay iti namnama ken pammatalged nga inted kenka ti Apo.