Dagiti Ordinansa
Iti Simbaan, ti ordinansa ket maysa a sagrado, pormal a tignay a maannong babaen ti turay ti priesthood. Sumagmamano nga ordinansa ti kasapulan para iti pannakaitan-oktayo. Maawagan dagitoy nga ordinansa kadagiti pangisalakan nga ordinansa. Iramanda ti panagbuniag, kumpirmasion, ordinasion iti Melchizedek Priesthood (para kadagiti lallaki), ti endowment iti templo, ken ti pannakailantip iti kallaysa. Babaen iti tunggal maysa kadagitoy nga ordinansa, sumrektayo kadagiti napasnek a katulagan iti Apo.
Dagiti dadduma pay nga ordinansa, kas iti panangnagan ken panangbendision kadagiti ubbing, panangpatedted iti lana, ken panangannong iti masakit ken agsagsagaba, ket maan-annong pay babaen ti turay ti priesthood. Idinto ta saanda a kasapulan iti pannakaisalakantayo, napategda para iti pannakaliwliwa, pannakatarabay, ken pannakapapigsa ti pakinakemtayo.
Tulongandatayo dagiti ordinansa ken katulagan a manglaglagip no asinotayo. Ipalagipda kadatayo ti pagrebbengantayo iti Dios. Impaay ida ti Apo a mangtulong kadatayo nga umasideg Kenkuana ken umawat iti agnanayon a biag. No dayawentayo ida, papigsaennatayo.
Mabalin a makaawatka iti adu a gundaway a makiraman kadagiti ordinansa ti priesthood. No maaddaanka iti kasta a gundaway, aramidem ti amin a kabaelam a mangisagana iti bagim, an-annongem man ti ordinansa wenno aw-awatem daytoy. Makapagsaganaka babaen ti panagkararag, panagayuno, panagdawat iti balakad kadagiti dadaulo ti priesthood, ken panagadal kadagiti nasantuan a kasuratan ken dagiti balikas dagiti propeta iti ud-udina nga aldaw. No maysaka nga addaan iti priesthood, nasken a kanayonka a nakasagana a naespirituan a mangannong iti ordinansa. Agbiagka iti nadalus, maikari a biag, ken agkagumaanka a mangawat iti kanayon a panangkadkadua ti Espiritu Santo.