Parabur
Ti balikas a parabur, kas nausar kadagiti nasantuan a kasuratan, ket kangrunaannna a maitudo iti nadiosan a tulong ken pigsa nga awatentayo babaen ti Pannubbot ni Apo Jesucristo. Insuro ni Apostol Pablo a nasken a “rumang-ay[tayo] koma iti grasia, ken iti panangammo ken Apotayo ken Manangisalakan a Jesucristo” (2 Pedro 3:18).
Pannakaisalakan babaen ti Parabur
Gapu iti Pannakatnag, mapadasanto ti tunggal maysa ti naindagaan nga ipapatay. Babaen ti parabur, a sidadaan a magun-od babaen ti pangsubbot a sakripisio ti Mangisalakan, mapagungarto ti amin a tao ken umawatda iti imortalidad (kitaen iti 2 Nephi 9:6–13). Ngem ti panagungar laeng ket saan a mangpaikari kadatayo iti agnanayon a biag iti sidong ti Dios. Dagiti basoltayo ti mangaramid kadatayo a narugit ken saan a maikari nga agindeg iti sidong ti Dios, ket kasapulantayo ti paraburna tapno mangpatarnaw ken mangan-anay kadatayo “kalpasan ti amin nga aramidtayo” (2 Nephi 25:23).
Ti ragup ti balikas a “kalpasan ti amin nga aramidtayo” ket isurona a kasapulan ti panagkagumaan iti biangtayo tapno maawat ti pakabuklan ti parabur ti Apo ken agbalintayo a maikari a makipagnaed Kenkuana. Binilinnatayon ti Apo nga agtungpal iti ebangheliona, a pakairamanan ti kaadda ti pammati Kenkuana, panagbabawi iti basbasoltayo, panagpabuniag, ken panangawat iti sagut ti Espiritu Santo, ken panagibtur agingga iti panungpalan (kitaen iti Juan 3:3–5; 3 Nephi 27:16–20; Pagannurotan ti Pammati 1:3–4). Insurat ni propeta Moroni maipapan iti parabur nga awatentayo bayat ti yaasidegtayo iti Mangisalakan ken panagtungpaltayo kadagiti pannursurona:
“Umasidegkayo ken Cristo, ket agbalinkayo a naan-anay kenkuana, ket tallikudanyo ti amin a saan a nadiosan; ket no tallikudanyo ti amin a saan a nadiosan, ket ayatenyo ti Dios iti isu amin a kabaelan, panunot, ken pigsayo, agpaay kadakayo ti paraburna, ket babaen ti parabur ti Dios naan-anaykayo ken ni Cristo, saanyo a mabalin a tallikudan ti pannakabalin ti Dios.
“Ket manen, no naan-anaykayo ken ni Cristo babaen ti parabur ti Dios, ken saanyo a tallikudan ti pannakabalinna, ngarud mapasantokayo ken ni Cristo babaen ti parabur ti Dios, gapu iti panagayus ti dara ni Cristo, nga adda iti katulagan ti Ama iti pannakaugas ti basbasolyo, tapno agbalinkayo a nasantuan, nga awan mulitna” (Moroni 10:32–33).
Panangawat iti Parabur iti unos ti Panagbiagmo
Kas nayon iti panagkasapulan iti parabur para iti kangrunaan a pannakaisalakanmo, kasapulam daytoy mangpabael a bileg iti inaldaw a panagbiagmo. Bayat ti yaasidegmo iti Nailangitan nga Amam iti kinapasnek, kinapakumbaba, ken kinaemma, itag-aynaka ken papigsaennakanto babaen ti paraburna (kitaen iti Dagiti Proverbio 3:34; 1 Pedro 5:5; DkK 88:78; 106:7–8). Ti panagpannuray iti paraburna ket mangpabael kenka a rumang-ay ken dumakkel iti kinalinteg. Ni Jesus Mismo “dina inawat ti pakabuklan iti umuna, ngem nagtultuloy nga immawat iti ad-adu pay a parabur, agingga a naawatna ti pakabuklanna” (DkK 93:13). Ti parabur ti mangpabael kenka a makatulong a mangbangon iti pagarian ti Dios, maysa a serbisio a saanmo a kabaelan nga ited babaen ti pigsam wenno kinabaknangmo laeng (kitaen iti Juan 15:5; Taga Filipos 4:13; Hebreo 12:28; Jacob 4:6–7).
No maawananka man iti namnama wenno mariknam a nakapsutka unayen tapno ituloymo pay ti panagbiag iti ebanghelio, laglagipem ti pigsa a maawatmo babaen ti mangpabael a bileg ti parabur. Makasarakka iti liwliwa ken pammatalged kadagitoy a balikas ti Apo: “Umdas ti paraburko iti amin a tattao a mangipakumbaba iti bagbagida kaniak; ta no ipakumbabada ti bagbagida kaniak, ken adda pammatida kaniak, sakonto aramiden a napigsa kadakuada dagiti nakapsut a banag” (Ether 12:27).