Panangkedngan kadagiti Dadduma
No dadduma marikna dagiti tao a biddut ti mangkedngan kadagiti dadduma iti ania man a wagas. Idinto a pudno a nasken a saanmo nga ikondena dagiti dadduma wenno kedngan ida iti saan a nalinteg, nasken nga agaramidkanto kadagiti pangngeddeng dagiti kapanunotan, kasasaad, ken tattao iti unos ti panagbiagmo. Nangteden ti Apo iti adu a bilin a saanmo a kabaelan a tungpalen a saan nga agaramid kadagiti pangngeddeng. Kas pagarigan, kinunana: “Agaluadkayo kadagiti naulbod a mammadto. … Mailasinyonto ida gapu kadagiti bungbungada” (Mateo 7:15–16) ken “Suminakayo kadagiti nadangkes” (DkK 38:42). Kasapulam ti agaramid kadagiti panangeddeng maipapan kadagiti tattao iti adu kadagiti napapateg a desisionmo, kas iti panangpili kadagiti gagayyem, panagbutos kadagiti lider ti gobierno, ken panagpili iti agnanayon a katakunaynay.
Ti panangeddeng ket napateg a pannakausar iti kinawayam nga agpili ken agkasapulan iti dakkel a panagannad, nangnangruna no agaramidka kadagiti panangeddeng maipapan kadagiti dadduma pay a tattao. Amin a panangeddengmo ket nasken a tarabayen dagiti nalinteg a pagrukodan. Laglagipen a ti Dios laeng, a makaammo iti puso ti tunggal tao, ti makaaramid kadagiti maudi a panangeddeng kadagiti tao (kitaen iti Apocalipsis 20:12; 3 Nephi 27:14; DkK 137:9).
Nangted ti Apo iti maysa a pammallaag a mangiwanwan kadatayo iti panangkedngan kadagiti dadduma: “Ta iti panangedddengyo, makedngankayonto met; ket ti rukod a pangrukodyo, mairukodto manen kadakayo. Ket apay a kitaenyo ti puling ti kabsatyo, ngem diyo kitaen ti sigkat ti matayo? Wenno kasano ti panagkunayonto iti kabsatyo: Agurayka ta ikkatek ti pulingmo—ket adtoy, adda sigkat ti matayo? Sika nga aginsisingpet, umuna pay nga ikkatem ti singkat ti matam; ket iti kasta nalawagto ti panagkitam a mangikkat iti sigkat ti mata ti kabsatmo” (3 Nephi 14:2–5).
Iti daytoy a binatog ti nasantuan a kasuratan isuro ti Apo a ti biddut a makitatayo iti sabali ket masansan a maipada iti bassit a rugit iti mata dayta a tao, a maidilig kadagiti bukodtayo a biddut, a maipada iti dakkel a sigkat kadagiti matatayo. No dadduma, ipamaysatayo ti imatangtayo iti biddut dagiti dadduma idinto a nasken koma nga itrabahotayo ti mangpasayaat iti bagbagitayo.
Dagiti nalinteg a panangeddeng maipapan iti dadduma ket makaited iti kasapulan a pannarabay para kadakuada ken, iti sumagmamano a kasasaad, pannakasaluadmo ken ti pamiliam. Agaramidka iti kasta a panangeddeng nga addaan iti panagannad ken panangngaasi. Agingga a kabaelam, kedngam dagiti kasasaad dagiti tao imbes a kedngam dagiti tao mismo. No mabalin, liklikam ti panagaramid kadagiti panangeddeng agingga nga addaanka iti umdas a pannakaammo maipapan kadagiti pudno a pasamak. Kanayon nga agbalinka a managrikna iti Nasantuan nga Espiritu, a mabalin a mangtarabay kadagiti desisionmo. Laglagipem ti balakad ni Alma iti anakna a ni Corianton: “Kitaem a manangngaasika kadagiti kakabsatmo; makikaduaka a nalinteg, mangeddengka a nalinteg, ken itultuloymo ti agaramid iti naimbag” (Alma 41:14).