Katulagan ni Abraham

Inawat ni Abraham ti ebanghelio ket naordenan a high priest (kitaen iti DkK 84:14; Abraham 1:2). Idi agangay simrek iti celestial a kallaysa, a daytoy ti katulagan ti pannakaitan-ok (kitaen iti DkK 131:1–4; 132:19, 29). Mainaig kadagiti katulagan nga inaramidna, inawatna dagiti naindaklan a kari manipud iti Apo maipanggep iti pamiliana. Maibilang kadagitoy a kari dagiti sumaganad:

Umadunto ti kaputotanna (kitaen iti Genesis 17:5–6; Abraham 2:9; 3:14).
Umawatto dagiti bukel, wenno an-annabona, iti ebanghelio ken ikutanda ti priesthood (kitaen iti Abraham 2:9).
Babaen ti panagministro dagiti bukelna, “mabendisionanto amin a kaamaan iti daga, a kas iti bendision ti Ebanghelio, nga isuda ti bendision ti pannakaisalakan, a kas iti agnanayon a biag” (Abraham 2:11).

Sangkamaysa, a maawagan a katulagan ni Abraham ti amin a katulagan ken kari nga inawat ni Abraham manipud iti Apo. Daytoy ti agnanayon a katulagan a dumanon iti amin a bukel ni Abraham (kitaen iti Genesis 17:7). Tapno maibilang a kas bukel ni Abraham, nasken nga agtungpal ti maysa nga indibidual kadagiti linteg ken ordinansa ti ebanghelio. Kalpasanna mabalin nga awaten dayta a tao ti amin a bendision ti katulagan ni Abraham, uray no saan isuna a literal nga an-annabo ni Abraham (kitaen iti Taga Galacia 3:26–29; 4:1–7; DkK 84:33–40).

Kas maysa a miembro ti Ti Simbaan ni Jesucristo dagiti Santo iti Ud-udina nga Aldaw, anaknaka ti katulagan (kitaen iti 3 Nephi 20:25–26). Inawatmon ti agnanayon nga ebanghelio ken tinawidmon dagiti isu met la a kari a naited kada Abraham, Isaac, ken Jacob. Addaanka iti karbengan kadagiti bendision ti priesthood ken iti agnanayon a biag, a mayannurot iti kinapudnom iti panangawat kadagiti ordinansa ti pannakaisalakan ken panangtungpal kadagiti mainaig a katulagan. Mabendisionanto dagiti nasion ti daga babaen kadagiti panagkagumaam ken babaen kadagiti panagtrabaho dagiti kaputotam.