Welfare
Addaan ti tunggal miembro ti Simbaan iti dua a kangrunaan a pagrebbengan iti welfare: agbalin nga agpannuray iti bukod a kabaelan ken mangaywan kadagiti napanglaw ken agkasapulan.
Addaan dagiti nagannak iti sagrado a pagrebbengan a mangkita iti pisikal ken naespirituan a pagimbagan dagiti annakda. Bayat ti panagdakkel dagiti ubbing, agbalinda nga ad-adda a responsable para iti bukodda a pagimbagan. Nasken a suruan ida dagiti nagannak kadagiti kangrunaan a pagbatayan ti welfare, a mangtulong kadakuada nga agbalin a mapagpannuray iti bukodda a kabaelan ken mangipaay iti kasapulan dagiti bukodda a pamilia iti masakbayan. Mabalin pay nga ited dagiti nagannak dagiti gundaway a mangtulong a mangaywan kadagiti nakurapay ken agkasapulan.
No maysaka a nataengan a miembro ti Simbaan, direkta a mayaplikar kenka ti sumaganad a sibubukel a balakad. No maysaka nga agtutubo a lalaki wenno babai, kangrunaan a mayaplikar met kenka daytoy a balakad, uray no agpannurayka nga ad-dda pay laeng kadagiti nagannak kenka.
Panagbalin a Managpannuray iti Bukod a Kabaelan
Ti pagrebbengan para iti pagimbagam ti pannakilangen, karirikna, kinaespirituan, bagi, ken ekonomia ket agpannuray nga umuna iti bagim, maikadua iti pamiliam, ken maikatlo iti Simbaan. Babaen ti pammaregta ti Apo ken babaen dagiti bukodmo nga aramid, nasken nga ipaayam ti bagim ken ti pamiliam kadagiti naespirituan ken naindagaan a kasapulan ti biag.
Nasaysayaat a kabaelam ti mangaywan iti bagim ken ti pamiliam no mapagpannurayka iti bukodmo a kabaelan. Nakasaganaka nga agibtur kadagiti panawen ti rigat a saanka nga agpannuray kadagiti dadduma.
Mabalinmo ti agpannuray iti bukodmo a kabaelan babaen ti (1) pananggun-od kadagiti gundaway iti edukasion; (2) panagsanay kadagiti nasayaat a pagbatayan ti nutrision ken kinamanagdaldalus; (3) panagsagana ken pananggun-od iti maitutop a pagtrabahuan; (4) panagurnong iti abasto a taraon ken aruaten no ipalubos ti linteg; (5) nainsiriban a panangtarawidwid kadagiti pamataudam, agraman ti panagbayad kadagiti apagkapullo ken daton ken panangliklik iti panagutang; ken (6) panangpadur-as iti pigsa a mainaig iti naespirituan, nainriknaan, ken pannakilangen.
Tapno agbalinka a mapagpannuray iti bukod a kabaelan, nasken a natalllugodka nga agtrabaho. Binilinnatayo ti Apo nga agtrabaho (kitaen iti Genesis 3:19; DkK 42:42). Ti nadayaw a trabaho ket kangrunaan a pagtaudan ti ragsak, pateg iti bagi, ken panagrang-ay.
No saanmo a kabaelan a magun-od dagiti kangrunaan a kasapulam babaen ti bukodmo a panagbannog wenno ti suporta dagiti miembro ti pamilia, mabalin a matulongannaka ti Simbaan. Kadagitoy a kasasaad, masansan a mangipapaay ti Simbaan kadagiti pamataudan a pangtulong iti panagbiag tapno mangtulong kenka ken ti pamiliam nga agbalin manen a mapagpannuray iti bukod a kabaelan.
Panangaywan kadagiti Nakurapay ken Agkasapulan
Kanayon a binilin ti Apo dagiti taona nga aywananda dagiti nakurapay ken agkasapulan. Kinunana, “Nasken a sarungkaranyo dagiti nakurapay ken makasapul ket ipaayyo ti kasapulanda” (DkK 44:6). Imbilinna pay, “Laglagipenyo iti amin a banag dagiti nakurapay ken agkasapulan, dagiti masaksakit ken agsagsagaba, ta isu a di mangaramid kadagitoy a banag, saan nga isu ti disipulok” (DkK 52:40).
Mabalinyo nga aywanan dagiti nakurapay ken agkasapulan iti adu a wagas. Maysa a napateg a wagas ket babaen ti panagayuno ken panangted kadagiti daton iti panagayuno, nga usaren ti bishop wenno branch president a pangtulong kadagiti miembro ti ward wenno branch nga agsagsagaba iti kinakurapay, sakit, wenno dadduma pay a pagrigatan. Mabalinmo pay ti mangted iti orasmo ken mangibinglay kadagiti talentom. Makapagserbika kadagiti awanan pagtaengan, baldado, balo, ken dadduma pay iti karruba ken komunidadmo.
Kas nayon iti panangted iti panangaywan a lokal wenno indibidual para kadagiti agkasapulan, tumultulong ti Simbaan iti sapasap a sangalubongan kadagiti tao, ania man ti pammatida, nga agsagsagaba kadagiti epekto dagiti kadawyan a kalamidad, kinakurapay, sakit, ken dadduma pay a pagrigatan. Mangipapaay ti Simbaan kadagiti makatulong iti biag a pamataudan a mangtulong kadagiti pamilia ken indibidual a makalung-aw ken makapagtrabaho agingga a makapagpannurayda iti bukodda a kabaelan. Dagiti donasion iti Perpetual Education Fund ti Simbaan ket mangipapaay kadagiti wagas para kadagiti napanglaw a Santo iti Ud-udina nga Aldaw tapno maituloyda ti panagadalda. Sitatallugod nga it-ited dagiti Church-service missionary dagiti panawen ken sanikuada tapno mapasayaat ti kabaelan nga agbasa ken agsurat, mangitandudo iti salun-at, ken mangipaay iti panagsanay wenno training.