Pammati
Insuro ni Apostol Pablo a “ti pammati ti pammatalged kadagiti banag a ninamnama, ti pammaneknek kadagiti banag a di makita” (kitaen iti Patarus ni Joseph Smith, Hebreo 11:1). Insao ni Alma ti kastoy met la a palawag: “No adda pammatim mangnamnamaka iti banag a saan a makita, ngem pudno” (Alma 32:21).
Ti pammati ket maysa a pagbatayan ti aramid ken bileg. Iti kanito nga itrabahom ti maysa a nasayaat a panggep a tun-oyen, ar-aramatem ti pammati. Ipakitam ti namnamam para iti maysa a banag a saanmo a makita.
Pammati ken ni Apo Jesucristo
Tapno maiturongnaka ti pammatim iti pannakaisalakan, nasken a maisentro daytoy ken ni Apo Jesucristo (kitaen iti Dagiti Aramid 4:10–12; Mosiah 3:17; Moroni 7:24–26; Pagannurotan ti Pammati 1:4). Maaramatmo ti pammati ken Cristo no addaanka iti pammatalged nga Isu ket sibibiag, maysa nga umisu a kapanunotan maipapan iti kinataona, ken maysa a pannakaammo nga ikagkagumaanam ti agbiag a mayannurot iti pagayatanna.
Ti kaadda ti pammati ken ni Jesucristo ket kayatna a sawen a panagpannuray a naan-anay Kenkuana—panagtalek iti awan patinggana a pannakabalinna, kinasaririt, ken panagayatna. Iraman daytoy ti panamati kadagiti pannursurona. Kayatna a sawen ti panangpati nga uray no saanmo a maawatan ti amin a banag, aramidenna. Laglagipem a gapu ta sinagabanan ti amin a saem, rigat, ken sakitmo, ammona no kasano a matulongannaka a mangrimbaw iti amin nga inaldaw a pagrigatam (kitaen iti Alma 7:11–12; DkK 122:8). Isu ket “pinarmek[na] ti lubong” (Juan 16:33) ken insaganana ti wagas a pakaawatam iti agnanayon a biag. Isu ket kanayon a nakasagana a tumulong kenka bayat pananglaglagipmo iti pakaasina; “Kitaendak iti tunggal panunot; saankayo nga agduadua, saankayo nga agbuteng” (DkK 6:36).
Panagbiag babaen ti Pammati
Ti pammati ket ad-adda pay nga amang ngem iti panamati nga awan ti aramiden. Ipasimudaagmo ti pammatim babaen ti aramid—babaen iti wagas a panagbiagmo.
Inkari ti Mangisalakan, “No adda pammatiyo kaniak, maaddaankayo iti pannakabalin nga agaramid iti ania man a banag a mainugot kaniak” (Moroni 7:33). Ti pammati ken ni Jesucristo ti makaguyugoy kenka a mangsurot iti naan-anay a pagwadanna (kitaen iti Juan 14:12). Ti pammatim ti makaiturong kenka nga agaramid iti naimbag, agtungpal kadagiti bilin, ken agbabawi kadagiti basolmo (kitaen iti Santiago 2:18; 1 Nephi 3:7; Alma 34:17). Ti pammatim ti makatulong kenka a mangparmek iti sulisog. Imbalakad ni Alma iti anakna a ni Helaman, “Isurom ida a mangparmek iti tunggal sulisog ti sairo, babaen ti pammatida iti Apo a Jesucristo” (Alma 37:33).
Agaramidto ti Apo kadagiti naindaklan a milagro iti biagmo a maibatay iti pammatim (kitaen iti 2 Nephi 26:13). Ti pammati ken ni Jesucristo ket mangtulong kenka nga umawat iti naespirituan ken pisikal a pannakaagas babaen ti Pannubbotna (kitaen iti 3 Nephi 9:13–14). No dumteng dagiti panawen ti pannubok, ti pammati ti mangted kenka iti pigsa nga agpatuloy ken mangsango kadagiti rigat nga addaan iti kinatured. Nupay kasla mapagduaduaan ti masakbayan, ti pammatim iti Mangisalakan ti makaited kenka iti kappia (kitaen iti Taga Roma 5:1; Helaman 5:47).
Panangpapigsa iti Pammatim
Ti pammati ket maysa a sagut manipud iti Dios, ngem nasken a taraonam ti pammatim tapno agtalinaed daytoy a napigsa. Ti pammati ket maipada iti piskel ti takiagmo. No watwatem daytoy, dumakkel a napigsa daytoy. No ibitinmo a nakabedbed daytoy iti tengngedmo samo baybay-an, kumapsut daytoy.
Mabalinmo a taraonan ti sagut ti pammati babaen ti panagkararag iti Nailangitan nga Ama iti nagan ni Jesucristro. Bayat ti panangipeksam iti panagyamanmo iti Amam ken bayat ti panagpakaasim Kenkuana nga agdawat kadagiti bendision a kasapulam ken kasapulan dagiti dadduma pay, umasidegkanto Kenkuana. Umasidegkanto iti Mangisalakan, a ti Pannubbotna ti mangaramid a mabalin para kenka ti agdawat iti panangngaasina (kitaen iti Alma 33:11). Agbalinkanto pay a managawat iti naulimek a pannarabay ti Espiritu Santo.
Mapapigsam ti pammatim babaen ti panagtungpalmo kadagiti bilin. Kas iti amin a bendision nga aggapu iti Dios, magun-od ken mapapigsa ti pammati babaen ti bukod a panagtungpal ken nalinteg nga aramid. No tarigagayam a mapabaknang ti pammatim iti kangatuan a mabalin a ragpaten a tukad, nasken a tungpalem dagiti katulagan nga inaramidmon.
Mapadur-asmo pay ti pammatim babaen ti panagadalmo kadagiti nasantuan a kasuratan ken dagiti balikas dagiti propeta iti ud-udina nga aldaw. Insuro ni propeta Alma a makatulong ti balikas ti Dios a mangpapigsa iti pammati. Iti panangyarigna iti balikas iti maysa a bukel, kinunana a ti “tarigagay a mamati” ket makaiturong kadakayo a “makaited iti lugar” a “pakaimulaan iti pusoyo” ti balikas. Kalpasanna mariknamto a nasayaat ti balikas, gapu ta rugiannan ti mangpadakkel iti kararuam ken manglawlawag iti pannakaawatmo. Daytoyto ti mangpapigsa iti pammatim. Bayat ti panagtultuloymo a mangaywan iti balikas iti pusom, “nga addaan iti kinaregta, ken anus a mangpaspasungad iti bungana, agramutto; ket adtoy agbalinto a kayo a rumangrangpaya nga agturong iti agnanayon a biag.” (Kitaen iti Alma 32:26–43.)