Namnama
Ti balikas anamnama ket saan a maawatan no dadduma. Iti inaldaw a panagsasaotayo, ti balikas ket masansan nga addaan iti pamugtuan ti panagduadua. Kas pagarigan, mabalintayo a sawen a mangnamnamatayo iti panagbalbaliw iti tiempo wenno panagbisita ti maysa a gayyem. Nupay kasta, iti pagsasao ti ebanghelio, ti balikas a namnama ket sigurado, awanan panagduadua, ken aktibo. Agsao dagiti propeta maipapan iti kaadda ti “natibker a namnama” (Alma 34:41) ken “inanama a sibibiag” (1 Pedro 1:3). Insuro ni propeta Moroni, “Dakkel ti namnama ti mamati iti Dios iti nasaysayaat a lubong, wen uray pay iti lugar iti makanawan ti Dios, a yeg ti pammati dayta a namnama, a lumansad iti kaunggan dagiti tao, a mangikkat iti duaduada ken mamatibker kadakuada, a kanayon a mangsursurot kadagiti naimbag nga aramid, ta naibagnosda a mangigloria iti Dios” (Ether 12:4).
No adda namnamatayo, agtalektayo kadagiti kari ti Dios. Adda naulimek a pammatalgedtayo a no aramidentayo dagiti “aramid ti kinalinteg,” “awaten[tayonto] ti gunggona[tayo], a kas iti kappia iti daytoy a lubong, ken agnanayon a biag iti masungad a lubong” (DkK 59:23). Insuro ni Mormon nga aggapu ti kasta a namnama laeng babaen ti Pannubbot ni Jesucristo: “Ania ti namnamaenyo? Adtoy kunak kadakayo nga addanto namnamayo gapu iti panangsubbot ni Cristo ken ti pannakabalin ti panagungarna, nga agungar iti biag nga agnanayon, ket daytoy gapu iti pammatiyo kenkuana babaen ti kari” (Moroni 7:41).
Bayat ti panagkagumaam nga agbiag iti ebanghelio, dumur-aska iti kabaelan nga “umadu ti inanamayo, gapu iti pannakabalin ti Espiritu Santo (Taga Roma 15:13). Dumakkel ti namnamam bayat ti panagkararag ken panagkalikagummo iti pammakawan ti Dios. Iti Libro ni Mormon, impanamnama ti misionario nga agnagan iti Aaron iti maysa nga ari a Lamanite, “No ibabawim amin a basbasolmo, ket agtamedka iti Dios, ket awagam iti naganna iti pammati, a mamatika a maawatmo, maawatmo ngarud ti namnama a tartarigagayam” (Alma 22:16). Magun-odmo pay ti namnama bayat ti panagadalmo kadagiti nasantuan a kasuratan ken panangsurotmo kadagiti pannursuroda. Insuro ni Apostol Pablo, “Ta dagup dagiti immun-una a naisuraten, naisuratdan tapno pakasursuruantayo, tapno gapu iti anus ken iti liwliwa dagiti sursurat maaddaantayo koma iti inanama” (Taga Roma 15:4).
Ti pagbatayan ti namnama ket agtultuloy kadagiti kinaagnanayon, ngem makatulong pay daytoy kenka kadagiti inaldaw a karitmo iti biag. “Nagasat daydiay,” kuna ti Salmista, “adda kenkuana ti Dios ni Jacob a badangna, a ti inanamana adda ken Jehova a Diosna” (Salmo 146:5). Babaen iti namnama, masarakam ti rag-o iti biag. MMabalin a “maaddaankayo … iti anus, ket maibaklayyo dagiti tuok, nga addaan natibker a namnama nga, iti maysa nga aldaw, aginanakayonto manipud iti amin a rigrigatyo” (Alma 34:41). Mabalin nga “agtultuloykayo a sitatalingenngen ken ni Cristo, nga addaan iti naan-anay a kinalawag ti namnama, ken ayat iti Dios ken iti amin a tao. Gapuna, no agtultuloykayo, nga agpennek iti balikas ni Cristo, ken agibtur agingga iti panungpalan, adtoy, kuna ti Ama: Maaddaankayto iti biag nga agnanayon” (2 Nephi 31:20).