“Hunio 6–12. Ruth; 1 Samuel 1–3: ‘Agrag-o ti Pusok ken Jehova’” Umaykayo, Sumurot Kaniak—Para iti Primary: Daan a Tulag 2022 (2021)
“Hunio 6–12. Ruth; 1 Samuel 1–3,” Umaykayo, Sumurot Kaniak—Para iti Primary: 2022
Sadino Man ti Papanam. ni Sandy Freckleton Gagon
Hunio 6–12
Ruth; 1 Samuel 1–3
“Agrag-o ti Pusok ken Jehova”
Bayat ti panangbasam iti Ruth ken 1 Samuel 1–3, kiddawem iti Nailangitan nga Ama no kasano a matulongam dagiti ubbing a makasursuro manipud kadagiti kinapudno kadagitoy a kapitulo. Isuratmo dagiti impresion a maawatmo.
Isuratmo dagiti Impresionmo
Yawis ti Panagbibinninglay
Kiddawem kadagiti ubbing a mangibinglay no ania ti ammoda maipapan kada Ruth, Noemi, Anna, wenno Samuel. Mabalin pay a makatulong nga ipakita kadakuada dagiti ladawan, kas kadagiti adda iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.
Isuro ti Doktrina: In-inaudi nga Ubbing
Ruth
Maipakitak ti ayat ken kinasayaat kadagiti adda iti aglawlawko.
Idi natay ti asawa ni Ruth, mabalinna koma ti agtalinaed iti naggapuanna a pagilian, ngem pinilina a kaduaen ti balo a katuganganna a babai, ni Noemi, ket inaywananna daytoy. Ibilangmo no kasano a nangparegta kadagiti ubbing a sursuruam ti pagwadan ni Noemi a kas ken ni Cristo tapno agbalinda a nasayaat kadagiti adda iti aglawlawda.
Dagiti Mabalin nga Aktibidad
-
Awisem dagiti ubbing a mangibagi kada Noemi, Ruth, Boaz wenno dadduma pay a tao bayat ti panangisaritam iti estoria manipud iti libro ni Ruth (kitaen iti “Da Ruth ken Noemi iti Dagiti Estoria iti Daan a Tulag). Awisem dagiti ubbing a mangingato kadagiti imada tunggal mangngeganda ti aramid ti kinaimbag iti estoria. Ania ti mariknatayo no nasayaat dagiti tao kadatayo? Ania ti mariknatayo no nasayaattayo kadagiti dadduma?
-
Aggigiddankayo nga agkansion iti maysa a kanta maipapan iti kinasayaat, kas iti “Kindness Begins with Me” (Children’s Songbook, 145). Tulongam dagiti ubbing a mangpanunot kadagiti wagas a pakapagbalinanda a nasayaat iti pamilia ken gagayyemda. No kasapulanda ti tulong, ipakitam kadakuada dagiti ladawan dagiti tao a mangipakpakita iti kinaimbag. Para iti tunggal kapanunotan a nadakamat, pagdrowingem dagiti ubbing iti puso iti pisarra.
Denggen ken sungbatan ti Nailangitan nga Ama dagiti kararagko.
Idi nagliday ni Anna gapu ta dina kabaelan ti maaddaan iti annak, immasideg isuna iti Apo iti pammati ket sinungbatanna ti kararagna. Tulongam dagiti ubbing a mangkita a kanayon a makapagkararagda iti Nailangitan nga Ama, nangnangruna no malidlidayanda.
Dagiti Mabalin nga Aktibidad
-
Iti bukodmo a balikas, isaritam kadagiti ubbing no apay a naliday ni Anna (kitaen iti 1 Samuel 1:2–8; kitaen met iti “Anna” iti Dagiti Estoria iti Daan a Tulag). Ania ti mabalin nga aramidentayo no malidlidayantayo? Ibasam kadagiti ubbing ti 1 Samuel 1:10, ket awisem dagiti ubbing a dumngegda iti no ania ti inaramid ni Anna. Saludsodem kadagiti ubbing no kasano ti mariknada no agkararagda. Basaem manipud iti bersikulo 18 tapno ilawlawag a kalpasan ti kararag ni Anna, “saanen a naladingit” daytoy.
LadawanDa Anna ken SamuelTa Daytoy ti Ubing nga Inkararagko, ni Elspeth Young
-
Usarem daytoy a panid ti aktibidad iti daytoy a lawas a mangisuro kadagiti ubbing a mabalinda ti agkararag iti Nailangitan nga Ama ket tulongannanto ida. Bayat ti panagkolor dagiti ubbing, agkanta wenno agpatokar iti recording ti maysa a kanta a mangisuro maipapan iti kararag, kas iti “A Child’s Prayer” (Children’s Songbook, 12–13).
Inaramid ti Apo ti adu a nakaskasdaaw a banag para kaniak.
Impakita ni Anna ti panagyamanna iti Apo babaen ti maysa a napintas a daniw ti panagdayaw. Ti pagwadanna ti makatulong kadagiti ubbing nga agpanunot maipapan iti adu a banag a mabalin a pagyamananda iti Nailangitan nga Ama.
Dagiti Mabalin nga Aktibidad
-
Ibasam kadagiti ubbing ti sumagmamano ti no ania ti kinuna ni Anna kalpasan a pinaraburan ti Apo isuna iti maysa nga anak a lalaki (kitaen iti 1 Samuel 2:1–2). Ibinglaymo kadagiti ubbing ti maysa a bendision nga inawatmo manipud iti Apo ken no kasano ti nariknam iti daytoy. Kalpasanna awisem dagiti ubbing nga agsarita maipapan kadagiti bendision nga inted ti Apo kadakuada. Kasano a maipakitatayo ti panagyamantayo Kenkuana?
-
Aggigiddan nga agkansion iti maysa a kanta a mangiladawan iti sumagmamano kadagiti bendision nga ited ti Apo kadatayo, kas iti “My Heavenly Father Loves Me” (Children’s Songbook, 228–29). Awisem dagiti ubbing a mangidrowing kadagiti ladawan dagiti bendision a naawatda manipud iti Apo.
Isuro ti Doktrina: In-inauna nga Ubbing
Ruth
Maaddaanak iti pammati iti Apo.
Nagaramid ni Ruth kadagiti sakripisio nga agbalin a napudno iti Apo ken agtalinaed a napudno ken ni Noemi. Kasano a matulongam dagiti ubbing a makasursuro manipud kadagiti aramid iti pammati ni Ruth?
Dagiti Mabalin nga Aktibidad
-
I-display ti ladawan da Ruth ken Noemi (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.). Kalpasanna isuratmo ti tallo a paulo iti pisarra: Pannubok, Tignay, Bendision. Awisem dagiti ubbing a mangbasa iti Ruth 1:3–5, 8, 16; 2:1–3, 8–12; 4:13–17, ket isurat iti baba dagiti paulo ti no ania ti masarakanda kadagitoy a bersikulo. Kasano nga impakita ni Ruth ti pammatina iti Apo? Iburaymo iti maysa a pagarigan no kasano a nabendisionanka gapu ta adda pammatim ken ni Jesucristo, ken paibinglaymo kadagiti ubbing dagiti bukodda a padas.
-
Aggigiddankayo nga agkansion iti maysa a kanta maipapan iti pammati, kas iti “The Lord Is My Light” (Hymns, no. 89) wenno “Faith” (Children’s Songbook, 96–97). Ania ti isuro ti kanta kadatayo maipapan iti panagtalek ti Apo? Kasano a maaddaantayo iti namnama ken ni Jesucristo uray pay kabayatan dagiti naririgat a panawen?
Denggen ken sungbatan ti Nailangitan nga Ama dagiti kararagko.
Idi ni Anna “adda iti kinapait ti kararua,” immasideg iti Nailangitan nga Ama iti kararag (1 Samuel 1:10). Kasano a maallukoymo dagiti ubbing a sursuruam a mangaramid met iti kastoy?
Dagiti Mabalin nga Aktibidad
-
Tapno matulongam dagiti ubbing a makasursuro maipapan ken ni Anna iti 1 Samuel 1, ikkam ti tunggal ubing iti sumagmamano a bersikulo a basaenda manipud iti kapitulo (wenno ipabuya ti video a “Hannah’s Faith,” ChurchofJesusChrist.org). Kalpasanna, ipasippaw ti maysa a bola wenno bassit a banag iti maysa nga ubing ken awisem isuna a mangisarita iti paset ti estoria sakbay ti panangipasana iti bola iti sumaruno nga ubing a mangisarita iti sabali pay a paset ti estoria. No nalpasen ti estoria, idawatmo kadagiti ubbing a mangibinglay iti maysa a banag a nasursuroda manipud iti pagwadan ni Anna.
-
Aggigiddan a mangbasa iti 1 Samuel 1:15, ket paglilinnawagan no ania ti kayat a sawen ti mangibukbok iti kararuatayo iti sango ti Apo. Kadua dagiti ubbing, agaramid iti listaan dagiti banag a mabalintayo nga ibaga iti Dios no agkararagtayo. Aggigiddan nga agkansion iti kanta maipapan iti kararag, kas iti “A Child’s Prayer” (Children’s Songbook, 12–13). Paneknekam ti ayat ti Dios para kadagiti annakna ken ti tarigagayna a dumngeg ken mangsungbat kadagiti kararagda.
-
Kiddawen kadagiti ubbing a mangilista (a saggaysa wenno kada grupo) kadagiti pagarigan dagiti tao iti nasantuan a kasuratan a nagkararag iti Nailangitan nga Ama. (No kasapulanda ti tulong, mabalinmo nga itudo kadakuada iti Lucas 22:41–43; Enos 1:2–6; Joseph Smith—Pakasaritaan 1:14–17.) Awisem ida a mangibinglay no ania ti masursuroda manipud kadagitoy nga estoria.
Mabalinko a denggen ken tungpalen ti timek ti Apo.
Idi ubing pay ni Samuel, nangngegna ti timek ti Apo ngem saanna a nailasin idi damo. Kasano a matulongam dagiti ubbing a sursuruam a dumngeg ken agtignay kadagiti parikna a maawatda?
Dagiti Mabalin nga Aktibidad
-
Awisem ti maysa nga ubing nga agpammarang a ni Samuel ken ti sabali pay nga ubing nga agpammarang nga Eli bayat ti panangbasam iti 1 Samuel 3:1–10 (wenno ipabuyam ti video a “Samuel and Eli,” ChurchofJesusChrist.org). Ania ti masursurotayo manipud ken ni Samuel maipapan iti no kasano a dumngeg iti timek ti Apo? Kasano nga ipakitatayo a natallugodtayo a dumngeg no makisao ti Apo kadatayo?
-
Awisem dagiti ubbing a mangpanunot maipapan no kasano nga ilawlawagda iti maysa a tao no kasano a makisao ti Apo kadakuada. Awisem ida a mangsapul kadagiti sungbat iti maysa wenno ad-adu pay kadagiti sumaganad a nasantuan a kasuratan: Doktrina ken Katulagan 6:22–23; 8:2–3; 9:7–9.
Yallukoy ti Panagsursuro iti Pagtaengan
Allukoyem dagiti ubbing a mangpanunot iti maysa a tao wenno maysa a banag a mabalin nga ikararaganda iti daytoy a lawas. Mangted kadakuada kadagiti gundaway iti masakbayan a mangibinglay no kasano a sinungbatan ti Nailangitan nga Ama dagiti kararagda.
Panangpadur-as iti Panangisurotayo
Dagiti ubbing nga addaan iti pagkurangan. Bisitaem koma ti disability.ChurchofJesusChrist.org tapno ammuen no kasano a nasaysayaat a maipaaymo ti kasapulan dagiti ubbing nga addaan iti pagkurangan.