“Hunio 13–19. 1 Samuel 8–10; 13; 15–18: ‘Ti Gubat Kukua ni Jehova,’” Umaykayo, Sumurot Kaniak—Para iti Primary: Daan a Tulag 2022 (2021)
“Hunio 13–19. 1 Samuel 8–10; 13; 15–18,” Umaykayo, Sumurot Kaniak—Para iti Primary: 2022
Da David ken Goliat, ni Steve Nethercott
Hunio 13–19
1 Samuel 8–10; 13; 15–18
“Ti Gubat Kukua ni Jehova”
Nupay naisangrat dagiti aktibidad iti baba para kadagiti in-inaudi wenno in-inauna nga ubbing, mabalinmo nga ibagay dagitoy kadakuada a mangipaay iti kasapulan dagiti sursuruam.
Isuratmo dagiti Impresionmo
Yawis ti Panagbibinninglay
Ipakita ti ladawan da David ken Goliat manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Awisem dagiti ubbing a mangibinglay no ania ti ammoda maipapan iti estoria, ken agdamag kadagiti saludsod a makatulong kadakuada a manglagip kadagiti paset ti estoria a nagsardenganda.
Isuro ti Doktrina: In-inaudi nga Ubbing
Ammo ti Apo no ania ti adda iti pusok.
Ti panangibinglay iti estoria maipapan no kasano nga imbaga ti Apo ken ni Samuel a mangpili ken ni David kas ari ket makatulong kadagiti ubbing a mangammo nga am-ammonatayo ti Apo a saggaysa.
Dagiti Mabalin nga Aktibidad
-
Ibinglay no kasano nga imbaga ti Apo ken ni Samuel nga agbalin ni David nga ari ti Israel (kitaen iti 1 Samuel 16:1–13). Bayat ti panangisaritam iti estoria, mabalinmo nga ipalubos ti maysa nga ubing a mangibagi ken ni Samuel. Mabalinna ti mangted iti korona a papel iti sabali pay nga ubing, a mangibagi ken ni David. Ibinglaymo ti pammaneknekmo nga ammo ti Apo ti puso ni David ken am-ammona ti tunggal maysa kadatayo.
-
Ibinglaymo ti maysa a padas a nakariknaam nga am-ammonaka ti Apo. Agkansion iti maysa a kanta a mangisuro nga am-ammo ken ay-ayatennatayo ti Mangisalakan, kas iti “Jesus Is Our Loving Friend” (Children’s Songbook,58).
Makatulong kaniak ti pammati ken ni Jesucristo a maaddaan iti tured.
Nalaka a makipagrikna dagiti ubbing iti agtutubo a ni David uray no bassit ni David, pinarmekna ti dakkel a karit. Tulongam ida a mangkita a ti pagtaudan ti tured ken pigsa ket ti pammatina ken ni Jesucristo.
Dagiti Mabalin nga Aktibidad
-
Irebyum ti estoria da David ken Goliat kadagiti ubbing (kitaen iti “Da David ken Goliat” iti Dagiti Estoria iti Daan a Tulag), ket pagsisinnublatem ida a mangyakem iti estoria. Guyugoyem ti ubing nga agpammarang a Goliat nga agsao iti, “Ikkandak iti maysa a lalaki tapno agkabilkami” (1 Samuel 17:10). Guyugoyem ti ubing nga agpammarang a David nga agsao iti, “Umayak kenka iti nagan ni Jehova” (1 Samuel 17:45). Paneknekam a no addaantayo iti pammati iti Apo, tulongannatayonto a maaddaan iti tured kas ken ni David.
-
Usarem ti panid ti aktibidad iti daytoy a lawas a mangipakita no kasano ti katayag ni Goliat tapno maidasig iti maysa nga agtutubo kasla ken ni David. Ilawlawag a nagbuteng ti buyot ti Israel ken ni Goliat. Kiddawen kadagiti ubbing nga agpammarangda a mabuteng. Kalpasanna ipakitam ti ladawan ni Jesucristo, ket ibagam kadagiti ubbing a gapu ta adda pammati ni David iti Apo, mabalinna ti agbalin a natured. Kiddawem kadakuada a tumakder, a kasla naturedda.
-
Awisem dagiti ubbing nga agmartsa kasla isuda ni David a mapan makiranget ken ni Goliat bayat ti panagkansionda iti maysa a kanta maipapan iti panagbalin a natured, kas iti “I Will Be Valiant” (Children’s Songbook,162).
Mabalin a bendision kaniak dagiti nasayaat a gagayyem.
Ti panaggayyem da Jonatan ken David ti maysa a naindaklan a pagwadan dagiti bendision a mabalin a sumangbay manipud iti nasayaat nga aggayyem.
Dagiti Mabalin nga Aktibidad
-
Mangidrowing iti dua a ladawan iti pisarra, maysa a mangibagi ken ni David ken ti sabali a mangibagi ken ni Jonatan. Ibasam kadagiti ubbing ti sumagmamano a ragup ti balikas manipud iti 1 Samuel 18:1–4 a mangyunay-unay iti ayat a narikna dagitoy dua nga aggayyem iti tunggal maysa. Ikkam ti tunggal ubing iti papel a sinanpuso, ket saludsodem kadakuada no kasano a maipakitada ti ayat iti maysa a gayyem. Kalpasan ti panagibinglay ti tunggal ubing iti maysa a kapanunotan, awisem ti ubing a mangipaskil iti papel a sinanpuso iti pisarra.
-
Ibagam kadagiti ubbing maipapan iti nasayaat a gayyem a mangtulong kenka nga agbiag iti ebanghelio wenno mangbukel iti pammatim ken ni Jesucristo, ken awisem dagiti ubbing a mangibinglay no asino ti mangtulong kadakuada. Awisem dagiti ubbing a mangyakem nga agar-aramidda iti maysa a banag a nasayaat para iti maysa a gayyem.
Isuro ti Doktrina: In-inauna nga Ubbing
1 Samuel 8:6; 9:15–17; 10:1–24; 16:1–13
Awagan ti Dios dagiti agserbi iti Simbaan.
Dagiti pakaammuan iti panagpili ti Dios kada Saul ken ni David nga agbalin nga ari ket makatulong iti klasem a makaawat no kasano nga awagan ti Dios ti tao nga agserbi iti Simbaan iti agdama. Dagitoy a pakaammuan ti mabalin a mangbukel iti pammati a naggapu iti Dios dagiti awag babaen kadagiti napusgan a katulonganna.
Ladawan ni Samuel a mangpulpulot ken ni Saul, © Lifeway Koleksion/licensed from goodsalt.com
Dagiti Mabalin nga Aktibidad
-
Iti nagsisina nga akikid a papel, isuratmo dagiti sumaganad a palawag ken nasantuan a kasuratan: tinarigagayan dagiti tao ti maysa nga ari (1 Samuel 8:6); imbaga ti Apo ken ni Samuel nga agbalinto ni Saul nga ari (1 Samuel 9:15–17); pinulotan ni Samuel ni Saul (1 Samuel 10:1); Indatag ni Samuel ni Saul kadagiti tao (1 Samuel 10:24). Idawatmo kadagiti ubbing a mangbasa kadagiti binatog iti nasantuan a kasuratan ket ikabil dagitoy iti husto nga urnos.
-
Aggigiddan a masursuruan iti maikalima a pagannurotan ti pammati. Isaritam kadagiti ubbing no kasano a naawatmo ti awagmo a mangisuro iti Primary. Kasano ti pannakaammom nga inawagannaka ti Dios? Paneknekam a pinaregta ti Dios dagiti lider nga agserbi.
“Ti Apo kumita iti puso.”
Gagangay ti manghusga kadagiti dadduma a maibatay iti no ania ti makitatayo, ngem paset ti panagbalin nga ad-adda pay a kas ken ni Jesus ti panagsursuro no kasano ti kumita kas iti panangkitana—babaen ti ikikita “iti puso” (1 Samuel 16:7).
Dagiti Mabalin nga Aktibidad
-
Awisem dagiti ubbing a mangipapan a naidawat kadakuada a pumili iti maysa a tao nga agbalin nga ari. Ania dagiti kalidad a sapsapulenda? Aggigiddan a mangbasa iti 1 Samuel 16:6–7 tapno ammuen no ania ti kinuna ti Apo ken ni Samuel bayat ti panagsapulna iti baro nga ari iti Israel. Ania ti masursurotayo manipud kadagiti pangiturong ti Apo?
-
Idatagmo ti maysa a banag nga adalen [object lesson] a mangiladawan kadagiti ubbing a dagiti pangngeddeng nga aramidentayo a batay “iti akinruar a panagparang” (bersikulo 7) ket mabalin nga umisu. Kas pagarigan, mabalinmo nga ipakita kadakuada ti sumagmamano a taraon wenno maysa a libro nga adda bungon wenno akkubna a saan a maipada kadagiti pudno a linaonna. Ania ti isingasing ti 1 Samuel 16:7 ken daytoy banag nga adalen maipapan no kasano a nasken nga kitaentayo ti bagbagitayo ken dagiti dadduma a tao?
-
Mangibinglay iti padas a pakasursuruanyo no apay a nasken a “kumitakayo iti puso,” saan laeng “iti akinruar a panagparang” (bersikulo 7). Paibinglay kadagiti ubbing dagiti ania man a maipada a padas a napasaranda. Agkansion iti maysa a kanta a mangyunay-unay iti daytoy a pagbatayan, kas iti “I’ll Walk with You” wenno “We Are Different” (Children’s Songbook, 140–41, 263).
Makatulong kaniak ni Jesuscristo a mangparmek iti ania man a karit.
Mabalin a maipasango dagiti ubbing kadagiti karit a kasla narigat kas iti panangabakda iti maysa a higante a kas ken ni Goliat. Mabalin a mangted ti pagwadan ni David iti namnama kadakuada a tumulongto ti Apo a makiranget kadagiti dangadangda.
Dagiti Mabalin nga Aktibidad
-
Dutokam dagiti ubbing a mangidrowing kadagiti ladawan iti nadumaduma a paset ti estoria iti 1 Samuel 17:20–54. I-display dagiti ladawan a siuurnos iti pisarra, ket awisem dagiti ubbing a mangibinglay iti estoria babaen ti pannakisarita maipapan iti tunggal maysa kadagiti naidrowingda a ladawan. Ania ti kayat ti Apo a masursurotayo manipud iti daytoy nga estoria?
-
Tulongam dagiti ubbing a mangilista iti pisarra ti sumagmamano a narigat a karit a mabalin a pakaipasanguan ti maysa a tao. Awisem ida a mangsapul kadagiti banag a kinuna ni David a makaallukoy iti maysa a tao a maipasango kadagiti karit kas kadagitoy (kitaen iti 1 Samuel 17:26, 32, 34–37, 45–47). Ibagam kadagiti ubbing no kasano a tinulongannaka ni Jesucristo iti panawen dagiti pannubok.
Yallukoy ti Panagsursuro iti Pagtaengan
Agsaludsod kadagiti ubbing maipapan iti maysa a banag a nasursuroda ita nga aldaw. Isuratmo ti saludsod, ken ikkam iti maysa a kopia ti tunggal ubing a yawid ken paglilinnawagan iti pamiliana.
Panangpadur-as iti Panangisurotayo
Tulongam dagiti ubbing a mangiladawan iti panunotda dagiti nasantuan a kasuratan. Masansan a mangted dagiti ubbing iti dakdakkel nga atension iti maysa nga adalen no mabalinda a kitaen dagiti ladawan a mainaig kadagiti estoria iti nasantuan a kasuratan wenno pannursuro. Ibilangmo ti panangusar kadagiti ladawan iti Libro ti Arte ti Ebanghelio wenno iti ChurchofJesusChrist.org.