David ken Goliat, ni Steve Nethercott

Hunio 13–19

1 Samuel 8–10; 13; 15–18

“Ti Gubat Kukua ni Jehova”

Makatulong kenka dagiti singasing iti daytoy a balabala a mangilasin iti sumagmamano kadagiti napapateg a pagbatayan kadagitoy a kapitulo. Masarakam ti dadduma pay a pagbatayan bayat ti panagadalmo.

Isuratmo dagiti Impresionmo

Manipud pay a nagindeg dagiti tribu ti Israel iti naikari a daga, nagtultuloy dagiti Filisteo a mammutbuteng iti panagtalgedda. Namin-adu a gundaway iti napalabas, insalakan ti Apo dagiti Israelita manipud kadagiti kabusorda. Ngem ita indawat dagiti panglakayen ti Israel, “Kayatmi ti maysa nga ari… [a] rummuar iti sangomi, ken makibakal iti gubgubatmi” (1 Samuel 8:19–20). Naasian ti Apo, ket napulotan nga ari ni Saul. Ngem idi impukol ti nakabutbuteng a higante a ni Goliat ti karitna kadagiti buyot ti Israel, ken ni Saul—kas iti dadduma pay iti buyotna—“nagbutengda iti napalalo” (1 Samuel 17:11). Iti dayta nga aldaw, saan a ni Ari Saul ti nangisalakan iti Israel ngem ti napakumbaba nga ubing a pastor nga agnagan iti David, a saan a nakakawes iti kabal ngem nakakawes iti saan a matarusan a pammati iti Apo. Napaneknekan daytoy a gubat iti Israel, ken iti asino man nga addaan iti naespirituan a gubat a pakibakalan, a “ni Jehova saan a mangisalakan a maaramat ti kampilan ken ti pika” ken gapu ta “ ti gubat kukua ni Jehova” (1 Samuel 17:47).

Dagiti Kapanunotan para iti Bukod a Panagadal iti Nasantuan a Kasuratan

1 Samuel 8

Ni Jesucristo ti Arik.

Bayat ti panangbasam iti 1 Samuel 8, kitaem no kasano ti narikna ti Apo maipapan iti panagtarigagay dagiti Israelita iti maysa nga ari malaksid iti Bagina. Ania ti kayat a sawen ti mangpili iti Apo a “mangituray [kadakayo]”? (1 Samuel 8:7). Mabalinmo pay nga ibilang dagiti wagas a pakasulisogam a mangsurot kadagiti saan a nalinteg nga ayo iti lubong imbes a panangsurot ti Apo. Kasano a maipakitam a kayatmo ni Jesucristo nga agbalin nga Agnanayon nga Ariyo?

Kitaen met iti Uk-ukom 8:22–23; Mosiah 29:1–36; Neil L. Andersen,“Overcoming the World,” Liahona, Mayo 2017, 58–62.

1 Samuel 9:15–17; 10:1–12; 16:1–13

Awagan ti Dios dagiti tao babaen iti pammadto tapno agserbi iti pagarianna.

Pinili ti Dios da Saul ken David nga agbalin nga ari babaen ti pammadto ken pammaltiing (kitaen iti 1 Samuel 9:15–17; 10:1–12; 16:1–13). Daytoy pay ti panangawagna kadagiti lallaki ken babbai nga agserbi Iti Simbaanna iti agdama. Ania ti masursurom manipud kadagitoy a pakaammuan maipapan iti no ania ti kaipapanan ti “awagan ti Dios, babaen iti padto”? (Pagannurotan ti Pammati 1:5). Ania dagiti bendision a sumangbay manipud iti pannakaawag ken pannakapasingked (set apart) babaen dagiti napusgan a katulongan ti Apo?

Panangiladawan ken ni Samuel a mangpulpulot ken ni Saul, © Lifeway Koleksion/licensed from goodsalt.com

1 Samuel 13:5–14; 15

“Nasaysayaat ti agtungpal ngem iti agsakripisio.”

Nupay natayag iti pammagi ni Saul, nariknana a “bassit iti imatang[na]” idi nagbalin nga ari (1 Samuel 15:17). Nupay kasta, idi naparaburan isuna iti balligi, nangrugi nga ad-adda a nagtalek iti bagina ngem iti Apo. Ania ti pakakitaan a makitam iti daytoy iti 1 Samuel 13:5–14; 15? No kaduam koma idi ni Saul, ania koma ti imbagam kenkuana a mabalin a nakatulong kenkuana a mangparmek iti “kinasukir” ken “kinasungitna”? (1 Samuel 15:23).

Kitaen met iti 2 Nephi 9:28–29; Helaman 12:4–5; Doktrina ken Katulagan 121:39–40; Thomas S. Monson,“Ponder the Path of Thy Feet,” Liahona, Nob. 2014, 86–88.

1 Samuel 16:7

“Kumita ti Apo iti puso.”

Ania dagiti sumagmamano a wagas a pangkedngan dagiti tao iti dadduma “iti akinruar a panagparang”? Ania ti kaipapanan ti kumita :”iti puso,” kas iti ar-aramiden ti Apo? (1 Samuel 16:7). Ibilangmo no kasano a mayaplikarmo daytoy a pagbatayan iti wagas a panangkitam kadagiti dadduma—ken iti bagim. Kasano a ti panangaramid iti kastoy makaapekto kadagiti pannakipulapol wenno pannakilangenmo iti dadduma?

1 Samuel 17

Babaen iti tulong ti Apo, maparmekko ti ania man a karit.

Bayat iti panangbasam iti 1 Samuel 17, utobem dagiti balikas ti nadumaduma a tao iti daytoy a kapitulo (kitaen iti listaan iti baba). Ania ti ipalgak dagiti balikasda maipapan kadakuada? Kasano nga ipakita dagiti balikas ni David ti tured ken pammatina iti Apo?

• Goliat: dagiti bersikulo 8–10, 43–44

• Eliab: bersikulo 28

• Saul: bersikulo 33

• David: dagiti bersikulo 26, 32, 34–37, 39, 45–47

Utobem dagiti bukodmo a gubat a sangsanguem. Ania ti masarakam iti 1 Samuel 17 a mangpapigsa iti pammatim a makatulong ti Apo kenka?

Kitaen met iti Gordon B. Hinckley, “Overpowering the Goliaths in Our Lives,” Ensign, Mayo1983, 46, 51–52.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

1 Samuel 9:15–21; 16:7.Ti panangbasa kadagitoy a bersikulo a karagpin dagiti sumaganad a balikas manipud ken ni Elder Dieter F. Uchtdorf ket makaparegta iti panaglilinnawag maipapan no apay a pinili ti Apo da Saul ken David: “No kumitatayo iti bagbagitayo babaen ti mortal a matatayo, mabalin a saantayo a makita ti bagbagitayo kas iti umdas a nasayaat. Ngem kitkitaennatayo ti Nailangitan nga Amatayo no asinotayo ken asino ti pakapagbalinantayo” (“It Works Wonderfully!” Liahona, Nob. 2015, 23). Nalabit a mabalin nga agsisinnublat dagiti miembro ti pamilia iti panangisarita maipapan no ania dagiti nasayaat a kababalin a makitada iti puso ti tunggal maysa (kitaen iti 1 Samuel 16:7).

1 Samuel 10:6–12.Kaano a naimatangantayon a bendisionan ti Dios ti maysa a tao iti naespirituan a bileg a mangipatungpal iti maysa a naidutok nga aramiden wenno awag kas idi binendisionanna ni Saul? Ania dagiti padas a maibinglaytayo idi “ti Dios intedna [kadatayo] ti sabali a puso” wenno “ti Espiritu ti Dios immapay [kadatayo]” iti serbisiona? (dagiti bersikulo 9–10).

1 Samuel 17:20–54.Mabalin a magustuan ti pamiliam ti aggigiddan iti panangbasada iti estoria da David ken Goliat (makatulong ti “David ken Goliat” iti Dagiti Estoria iti Daan a Tulag ) wenno panagbuya iti video “The Lord Will Deliver Me” (ChurchofJesusChrist.org). Mabalin a mangiturong daytoy iti panaglilinnawag maipapan kadagiti pannubok a sanguentayo a pakariknaan a kasla “dagiti Goliat” kadatayo. Mabalinmo pay nga isurat ti sumagmamano kadagitoy a karit iti maysa a target wenno maysa a drowing ni Goliat ken agsisinnublatda iti panangibato iti bambanag (kas kadagiti sinanbola a papel) iti daytoy.

Mabalin met a makaay-ayo a basaen ti maipapan iti kabal ken igam nga adda idi ken ni Goliat (kitaen kadagiti bersikulo 4–7). Ania ti adda idi ken ni David? (kitaen kadagiti bersikulo 38–40, 45–47). Ania ti impaay ti Apo a mangtulong kadatayo a mangabak kadagiti Goliattayo?

1 Samuel 18:1–4.Kasano a nasayaat nga aggayyem da David ken Jonathan iti tunggal maysa? Kasano a nangbendision kadatayo ti addaan iti nasayaat a gagayyem? Ania ti mabalintayo nga aramiden tapno agbalin a nasayaat a gagayyem—agraman kadagiti miembro ti pamiliatayo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I Will Be Valiant,” Children’s Songbook, 162.

Panangpadur-as iti Panangisurotayo

Iburaymo a masansan ti pammaneknekmo. “Ti simple, naimpusuan a pammaneknekmo iti naespirituan a kinapudno ket nabileg a makaimpluensia iti [pamiliam]. Kadakkelan ti bileg ti maysa a pammaneknek no naiburay daytoy a napudno ken naimpusuan. Saan a nasken a napintas wenno atiddog daytoy” (Panangisuro iti Wagas ti Mangisalakan,11).

Panangiladawan ken ni David, ni Dilleen Marsh