“Hunio 6–12. Ruth; 1 Samuel 1–3: ‘Ti Pusok agrag-o ken Jehova,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Hunio 6–12. Ruth; 1 Samuel 1–3,” Umaykayo, Sumurot Kaniak—Para kadagiti Indibidual ken Pamilia: 2022
Sadino Man ti Papanam, Ni Sandy Freckleton Gagon
Hunio 6–12
Ruth; 1 Samuel 1–3
“Ti Pusok Agrag-o ken Jehova”
Bayat ti panagadalmo iti biag da Ruth, Noemi, Anna, ken dadduma pay iti daytoy a lawas, dumngegka a naasideg iti Espiritu ket isuratmo dagiti ania man nga impresion a maawatmo. Ania ti makaparegta nga aramidem?
Isuratmo dagiti Impresionmo
No dadduma ipapantayo a nasken a sumurot ti biagtayo iti nalawag a dana manipud iti rugi agingga iti gibusna. Ti kababaan a distansia iti nagbaetan ti dua a puntos ket ti nalinteg a linia, iti likudan ti amin. Ngem masansan a napnuan ti biag kadagiti panangitantan ken at-atiddog a dalan a mangipan kadatayo kadagiti di ninamnama a turongen. Mabalin a matakuatantayo a maigiidiat ti biagtayo iti no ania ti impagaruptayo a nasken a pagbalinanda.
Awan duadua a naawatan da Ruth ken Anna daytoy. Ni Ruth saan nga Israelita, ngem nakikallaysa iti maysa, ket idi natay ti asawana, adda pili nga aramidenna. Agsubli kadi iti pamiliana ken ti sigud, pamiliar a biagna, wenno awatenna kadi ti pammati dagiti Israelita ken ti baro a pagtaengan a kadennana ti katuganganna a babai? (kitaen iti Ruth 1:4–18). Plano ni Anna para iti biagna ti agpasngay kadagiti annak, ket ti saanna a pannakabael a mangaramid iti daytoy ti nangibati kenkuana “iti kinapait ti kararua” (kitaen iti 1 Samuel 1:1–10). Bayat ti panangbasam maipapan kada Ruth ken Anna, ibilangmo ti pammati a nasken koma nga ikabilda ti biagda iti ima ti Apo ken agdaliasatda kadagiti saan a ninamnama a danada. Kalpasanna mabalin a panunotem maipapan iti bukodmo a panagdaliasat. Makitanto a maigiddiat daytoy iti panagdaliasat da Ruth ken Anna—ken iti panagdaliasat ti asino man. Ngem iti unos dagiti pannubok ken panagsiddaaw ditoy ken iti agnanayon a pagtungpalan, masursurom nga isao a kaduam ni Anna, “Ti pusok agrag-o ken Jehova” (1 Samuel 2:1).
Para iti pakagupgopan dagiti libro ti Ruth ken 1 Samuel, kitaen iti “Ruth” ken “Samuel, dagiti libro ti” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Mapagbalin ni Cristo ti trahedia iti balligi.
Idi natay ti asawa ni Ruth, adda nagbanagan ti trahedia para kenkuana a nakarkaro pay ngem iti mabalin a pakaipasanguan ti maysa a balo a babai iti agdama. Iti kultura dagiti Israelita iti dayta a panawen, ti maysa a babai nga awanan iti asawa wenno annak a lallaki ket awanan iti karbengan iti sanikua ken awanan iti wagas tapno agullo iti pagbiag. Bayat ti panangbasam iti estoria ni Ruth, makita a pinagbalin ti Apo ti trahedia kadagiti naindaklan a bendision. Ania ti madlawmo maipanggep ken ni Ruth a mabalin a nakatulong koma kenkuana? Ania ti akem ni Boaz iti panangsubbot ken ni Ruth manipud iti makaupay a kasasaadna? (kitaen iti Ruth 4:4–7). Ania dagiti kababalin a kas ken ni Cristo a makitam kada Ruth ken Boaz nga agpada?
Makapagtalekak a tarabayen ken tulongannakto ti Dios ania man ti kasasaadko.
Makitam kadi ti bagim kadagiti estoria da Ruth, Noemi, ken Anna? Nalabit a nagsagabaka unay iti pannakapukaw, kasta ti naaramid kada Ruth ken Noemi (kitaen iti Ruth 1:1–5). Wenno nalabit, kas ken ni Anna, nagtarigagayka kadagiti bendision a dimo pay naawat (kitaen iti 1 Samuel 1:1–10). Utobem no ania kadagiti mensahe ti masursurom manipud kadagiti pagwadan dagitoy napudno a babbai. Kasano nga impakita da Ruth ken Anna ti pammati iti Dios? Ania dagiti bendision a naawatda? Kasano a masurotyo dagiti pagwadanda? Ibilangmo no kasano a “nagtalekka” iti Apo (Ruth 2:12) uray no narigat ti biag.
Kitaen met ti Reyna I. Aburto, “Babaen ti Ulep ken ti Init, Apo, Agtalinaedka Kaniak!” Liahona, Nob. 2019, 57–60.
Nagkararagak Para iti Daytoy nga Ubing, ni Elspeth Young
Makapagrag-o ti Pusok iti Apo.
Kalpasan nga innala ni Anna ni ubing a Samuel iti templo, nagsarita daytoy iti napipintas a balikas ti panagdayaw iti Apo, a nairekord iti 1 Samuel 2:1–10. Ad-adda pay a makatignay dagitoy a balikas no panunotem nga iti ababa a panawen a nasapsapa, “ni Anna adda idi iti kinapait ti kararua, … ket nagsangit iti nakaro unay” ((1 Samuel 1:10). Bayat ti panagadalmo kadagitoy a bersikulo, ania dagiti mensahe a masarakam a nangnayon iti riknam iti panagdayaw ken panagyaman iti Apo? Nalabit paregtaennakanto ti kanta ni Anna a mangsapul iti maysa a managpartuat a wagas a mangyebkas iti panagyamanmo iti Apo—maysa a kanta, maysa a naipinta a ladawan, maysa nga aramid ti serbisio, wenno ania man a banag mangisao kadagiti riknam a maiturong Kenkuana.
Siempre, saan nga amin a napasnek a kararag ti masungbatan iti wagas a kas iti kararag ni Anna. Ania ti masarakam iti mensahe ni Presidente Dieter F. Uchtdorf a “Grateful in Any Circumstances” a makatulong kenka no saan a nasungbatan dagiti kararagmo iti wagas a namnamaem? (Liahona, Mayo 2014, 70–77).
Dumngeg ken agtungpalak iti timek ti Apo.
Kas iti amin kadatayo, nasken a sursuruen ni Samuel no kasano ti mangilasin iti timek ti Apo. Bayat ti panagadalmo iti 1 Samuel 3, ania ti masursurom manipud iti daytoy nga ubing a lalaki maipapan iti panagdengngeg ken panagtungpal iti timek ti Apo? Ania dagiti padas a napasaramon iti panangdengngeg iti timekna? Ania dagiti gundaway nga adda kenka, kas ken ni Eli, a mangtulong kadagiti dadduma a mangilasin no agsasao ti Apo kadakuada? (kitaen iti 1 Samuel 3:7).
Kitaen met iti Juan 14:14–21; David P. Homer, “Hearing His Voice,” Liahona, Mayo 2019, 41–43.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Ruth 1:16–18; 2:5–8, 11–12.Mabalin ti pamiliam ti mangsapul kadagiti pagarigan ti kinaimbag ken kinapudno kadagitoy a bersikulo. Kasano nga ipakitatayo ti kinaimbag iti pamiliatayo ken iti dadduma ken ti kinapudnotayo ken ni Jesucristo? Makatulong iti pamiliam ti kapitulo a “Da Ruth ken Noemi” (iti Dagiti Estoria iti Daan a Tulag) nga agsursuro manipud iti pagwadan ni Ruth.
-
1 Samuel 1:15.Nalabit a mabalinmo ti mangibukbok iti maysa a banag manipud iti maysa a container a makatulong kadagiti miembro ti pamiliam a mangiladawan iti panunotda no ania ti kayat a sawen ni Anna idi kinunana, “Imbukbokko ti kararuak iti sango ni Jehova.” Apay a daytoy ti maysa a nasayaat a wagas a mangiladawan no ania ti nasken a kapada dagiti kararagtayo? Kasano a mapasayaattayo dagiti bukod ken sangapamiliaan a kararag?
-
1 Samuel 2:1–10.Ti daniw ni Anna iti panagdayaw iti Apo ket mabalin a mangiturong kenka a mangpanunot kadagiti kanta nga usarem a pagdaydayaw iti Apo. Mabalinyo a kantaen ti dadduma nga aggigiddan. Mabalin pay a panunoten dagiti miembro ti pamiliam dagiti dadduma pay a wagas a pangipeksaan iti riknada para ken ni Jesucristo. Kas pagarigan, mabalin nga agdrowingda kadagiti ladawan a mangipakita no apay nga ay-ayatenda ti Mangisalakan.
-
1 Samuel 3:1–11.Mabalin a naragsak a payakem ti estoria ti Apo a mangaw-awag ken ni Samuel, wenno mabalin a buyaen ti pamiliam ti video a “Samuel and Eli” (ChurchofJesusChrist.org). Mabalin nga isarita dagiti miembro ti pamilia maipapan kadagiti panawen idi nariknada a makisarsarita ti Apo kadakuada ken no kasano a nagtignayda segun kadagiti balikasna.
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “There Is Sunshine in My Soul Today,” Hymns, no. 227.
Panangpadur-as iti Bukod a Panagadal
Agpatarabayka iti Espiritu iti panagadalmo. Agkararagka nga iturongnakanto ti Espiritu Santo kadagiti banag a nasken a sursuruen. Agbalinka a managrikna kadagiti arasaasna, uray no daytoy ti mangiturong kenka nga agbasa maipapan iti maysa a topiko a saanmo a namnamaen wenno adalem iti sabali pay a wagas.
Panangiladawan ken ni Samuel a dumdumngeg iti Apo, ni Sam Lawlor