Ladawan ni Debora a mangidadaulo kadagiti buyot ti Israel, © Lifeway Koleksion/licensed from goodsalt.com

Mayo 30–Hunio 5

Uk-ukom 2–4; 6–8; 13–16

“Ni Jehova Namangon iti Mangisalakan”

Adu dagiti makaparegta nga estoria a masarakan iti Uk-ukom 2–4; 6–8; 13–16. Utobem no kasano a mausarmo dagitoy nga estoria a makatulong kadagiti ubbing nga umas-asideg iti Mangisalakan ken agtarigagay a mangsurot Kenkuana.

Isuratmo dagiti Impresionmo

Yawis ti Panagbibinninglay

Awisem ti tunggal maysa kadagiti ubbing a mangibinglay iti estoria manipud kadagiti nasantuan a kasuratan a nasursuroda itay nabiit. Awisem ida a mangibinglay no ania ti masursuroda manipud kadagitoy nga estoria.

Isuro ti Doktrina: In-inaudi nga Ubbing

Uk-ukom 3:9

Ni Jesucristo ti Mangisalakanko.

Idi nagkararag dagiti Israelita iti Apo, namangon iti mangisalakan para kadakuada. Tulongam dagiti ubbing a mangkita a ni Jesucristo ti Mangisalakanda a binangon ti Dios para kadatayo.

Dagiti Mabalin nga Aktibidad

• Ilawlawag kadagiti ubbing nga idi nagsardeng dagiti Israelita iti panagtungpal kadagiti bilin ti Dios, napukawda ti panagsaluadna ken inabak ida dagiti kabusorda. Basaem manipud iti Uk-ukom 3:9 ti ragup ti balikas a “dagiti annak ti Israel immasugda ken Jehova.” Ania ti inaramid dagiti Israelita idi kasapulanda ti tulong? Mangibinglay iti maysa a padas idi nagkararagka para iti tulong ket sinungbatan ti Dios ti kararagmo.

• Basaem manipud iti Uk-ukom 3:9 ti ragup ti balikas “ni Jehova namangon iti mangisalakan,” ket awisem dagiti ubbing a mangulit iti daytoy kadakayo iti sumagmamano a gundaway. Ilawlawag a maysa a tao a mangispal kadatayo ti mangisalakan. Ipakitam kadagiti ubbing ti sumagmamano a ladawan dagiti tao, a pakairamanan ti maysa a ladawan ni Jesucristo, ken ikabil dagiti ladawan a nakapaklebda iti suelo. Pagsisinnublatem dagiti ubbing a mangbaliktad kadagiti ladawan, a mangsapsapul iti ladawan ni Jesus, ken ingatoda daytoy. Paneknekam a ni Jesucristo ti Mangisalakan a binangon ti Dios a mangispal kadatayo manipud iti basol ken ipapatay.

Nagtalek ni Gideon iti Apo. © Lifeway Koleksion/licensed from goodsalt.com

Uk-ukom 6:11–16; 7:1–8

Mabalin nga usaren ti Apo dagiti babassit a banag nga agaramid iti naindaklan a banag.

Ibilang ni Gideon ti bagina a nakurapay ken awan pategna, ngem nakita ti Dios isuna a kas “lalaki a mannakabalin ken maingel” (Uk-ukom 6:12). Tulongam dagiti ubbing a makakita nga uray no mariknada a bassitda, makapagtrabaho ti Dios babaen kadakuada tapno agaramid kadagiti napapateg a banag (kitaen iti Alma 37:6–7).

Dagiti Mabalin nga Aktibidad

• Isaritam kadagiti ubbing a kasapulan ti Apo ti maysa a tao a mangtulong Kenkuana a mangisalakan iti Israel manipud kadagiti kabusorda, dagiti Midianita, ket pinilina ni Gideon. Ibasam ti Uk-ukom 6:15 kadagiti ubbing, ket saludsodem kadakuada no apay a di narkna ni Gideon a maaramidna no ania ti kayat ti Apo. Basaem ti bersikulo 16, ket saludsodem kadakuada no asino ti kinuna ti Apo a mangtulong ken ni Gideon. Isaritam kadagiti ubbing maipapan iti maysa a panawen idi indawat ti Apo kenka nga agaramid iti maysa a narigat a banag tapno agserbi Kenkuana ken nariknam a kinaduanaka.

• I-display dagiti ladawan dagiti ubbing wenno agtutubo nga agar-aramid kadagiti dadakkel a banag iti serbisio ti Dios (kitaen iti Libro ti Arte ti Ebanghelio, dagiti num. 19, 23, 90, 102), wenno isaritam maipapan kadagiti pagarigan a nakitamon. Tulongam dagiti ubbing a mangpanunot kadagiti wagas a mabalinda a makiraman iti aramid ti Dios, ket awisem ida a mangidrowing kadagiti ladawan ti bagbagida nga agar-aramid kadagitoy a banag.

• Usarem ti panid ti aktibidad iti daytoy a lawas a mangisuro kadagiti ubbing maipapan iti no kasano a pinabassit ti Apo dagiti buyot ti Israel tapno maammuan dagiti Israelita nga insalakan ida ti bilegna manipud kadagiti kabusorda. Ibinglaymo dagiti pagarigan dagiti babassit a banag nga agaramid iti dadakkel a banag, kas kadagiti uyokan a mangummong iti nektar tapno makaaramid iti tagapulot ti uyokan. Paneknekam a makatulong ti Dios kadatayo nga agaramid iti dakkel a banag, uray no mariknatayo a bassittayo.

Isuro ti Doktrina: In-inauna nga Ubbing

Uk-ukom 3:7–9, 12–15

Ni Jesucristo ti Mangisalakanko.

Iladawan tiUk-ukom 3 ti maysa a siklo [cycle] a mabalinmo nga usaren a mangisuro kadagiti ubbing nga ispalennatayo ti Dios manipud iti basol babaen iti Mangisalakan a ni Jesucristo.

Dagiti Mabalin nga Aktibidad

• Isurat ti sumaganad iti pisarra: “inaramidda daydiay a dakes,” “immasugda ken Jehova,” ken “namangon iti mangisalakanda.” Awisem ti sumagmamano kadagiti ubbing a mangsapul kadagitoy a ragup ti balikas iti Uk-ukom 3:7–9, ken awisem dagiti dadduma pay a mangsapul kadagitoy iti Uk-ukom 3:12–15. Ilawlawag kadagiti ubbing a nadagdagullit iti libro ti Uk-ukom a dagiti Israelita “inaramidda daydiay a dakes.” Kalpasanna, idi dimmarup dagiti kabusorda, “immasugda iti Apo,” ket ti Apo “namangon iti mangisalakanda” a mangtulong kadakuada. Ania ti masursurotayo maipapan iti Apo manipud iti daytoy a siklo?

• Aggigiddan a mangkansion iti maysa a kanta a makatulong kadagiti ubbing a makaawat a ni Jesucristo ti Mannubbot ken Mangisalakanda, kas iti “He Sent His Son”(Children’s Songbook, 34–35). Awisem dagiti ubbing a mangibinglay iti riknada maipapan iti no ania ti inaramid ti Mangisalakan a mangispal kadatayo manipud iti basol, pannubok, panagladingit, ken ipapatay.

Uk-ukom 4:1–15

Makapagbalinak a napudno iti Apo uray no saan a napudno dagiti dadduma.

Nupay adu dagiti Israelita ti tumallikud iti Apo, adda dagiti nagtalinaed a napudno Kenkuana ken nakabael a timmulong iti adu a dadduma pay a makapagsubli iti kinalinteg. Kasano a maallukoymo dagiti ubbing nga agtalinaed a napudno iti Apo uray no ania ti ar-aramiden dagiti dadduma?

Dagiti Mabalin nga Aktibidad

• Ibagam kadagiti ubbing a kabayatan ti panawen idi nagbalin a nadangkes dagiti Israelita, maysa a nalinteg a babai nga agnagan iti Debora ken ti komander ti buyot dagiti Israelita, ni Barak, insalakanna ti Israel manipud kadagiti kabusorda (kitaen iti Uk-ukom 4:1–15). Aggigiddan a mangbasa iti Uk-ukom 4:14, ket kiddawen kadagiti ubbing a mangsarak iti maysa a banag a kinuna ni Debora a nangipakita a napigsa ti pammatina iti Apo. Kalpasanna kiddawem kadakuada a mangbasa iti Doktrina ken Katulagan 84: 88 a mangsapul iti maysa a pagbatayan nga adda met iti Uk-ukom 4:14. Allukoyem ida a mangibinglay no ania ti kaipapananna kadakuada ti kari ti Apo nga “Addaakto iti sangoyo.”

• Agkansion iti maysa a kanta maipapan iti panagtungpal kadagiti bilin, a kas iti “Choose the Right” (Hymns, no. 239) wenno “Choose the Right Way” (Children’s Songbook, 160–61). Kasano a maitakdertayo iti kinalinteg ken agtungpal kadagiti bilin uray no saan nga ar-aramiden dagiti dadduma iti aglawlawtayo?

Uk-ukom 7

Maigiddiat dagiti wagas ti Dios iti wagas ti lubong.

Indawat ti Apo ken ni Gideon a mangaramid kadagiti banag a nalabit a dina naawatan iti dayta a kanito. Ania ti mangparegta kenka maipapan iti estoriana? Kasano ti mariknam a mabalin a mangbendision kadagiti ubbing a sursuruam?

Dagiti Mabalin nga Aktibidad

• Kiddawen kadagiti ubbing a mangipapan a nasken a mangummongda iti maysa a buyot a mapan iti dangadang. Mano a tattao ti kayatda iti buyotda? Iti panangusar iti Uk-ukom 7:4–7, awisem dagiti ubbing a mangyakem no kasano a tinulongan ti Apo ni Gideon a mangpili iti buyot a mangispal iti Israel manipud kadagiti Midianita. Apay a kayat ti Apo nga agbalin a bassit unay ti buyot ni Gideon? (kitaen iti Uk-ukom 7:2). Apay a mabalin a narigat para ken ni Gideon ket ti buyotna ti panagtungpalda iti bilin ti Apo? Awisem dagiti ubbing a mangibinglay kadagiti padasda idi nasursuroda ti agtalek iti Apo uray no narigat unay ti panangamid iti daytoy.

• Awisem dagiti ubbing a mangidrowing kadagiti ladawan ti espada wenno kampilan, kalasag, tangguyob, lampara, ken gorgorita. Kiddawen kadagiti ubbing no ania kadagitoy a banag ti itugotda iti maysa a pannakidangadang. Awisem ida a mangbasa iti Uk-ukom 7:16 tapno maammuan no ania ti intugot ti buyot ni Gideon. Apay a kasapulan ti tured a mangaramid iti daytoy? Aggigiddan a mangbasa iti Uk-ukom 7:19–21 tapno maammuan no kasano nga inusar ti buyot dagiti tangguyob ken gorgorita a pinangabakda kadagiti Midianita. Ania ti masursurotayo maipapan iti Apo manipud iti daytoy nga estoria?

Yallukoy ti Panagsursuro iti Pagtaengan

Awisem dagiti ubbing a mangibinglay iti maysa a miembro ti pamilia ania ti nasursuroda ita nga aldaw a mamagtarigagay kadakuada nga agtungpal kadagiti bilin.

Panangpadur-as iti Panangisurotayo

Ibagay dagiti aktibidad tapno maipaay dagiti kasapulan. Dimo pagarupen a dagitoy a balabala ket kas pangiturong a nasken a surotem. Ketdi, usarem dagitoy a kas paggapuan dagiti kapanunotan a mangparayray iti bukodmo nga inspirasion bayat ti panangutobmo iti kasapulan dagiti ubbing a sursuruam. Kas pagarigan, iti sumagmamano a kasasaad, mabalin a mariknam a naparegtaka a mangibagay iti maysa nga aktibidad para kadagiti in-inaudi nga ubbing a mangisuro kadagiti in-inauna nga ubbing, wenno vice versa.